وه‌زاره‌تی سامانه‌سروشتییه‌كان وه‌ڵامی عزه‌ت سابیر ده‌داته‌وه‌

.

ته‌ها زه‌نگه‌نه‌ بریكاری وه‌زاره‌تی سامانه‌سروشتییه‌كان، له‌روونكردنه‌وه‌یه‌كدا كه‌ كۆپییه‌كی ده‌ست PUKmedia كه‌تووه‌، به‌چه‌ند خاڵێك وه‌ڵامی د. عزه‌ت سابیر ئه‌ندامی په‌رله‌مانی كوردستان ده‌داته‌وه‌ .

ده‌قی روونكردنه‌وه‌...
به‌ڕێزتان له‌ئه‌كاونتی تایبه‌تی خۆتان له‌تۆڕی كۆمه‌ڵایه‌تی فیسبووك به‌ناونیشانی گه‌نده‌ڵیه‌كی تری وه‌زاره‌تی سامانه‌ سروشتیه‌كان كه‌ تێیدا هاتووه‌ به‌ واژۆی بریكاری وه‌زاره‌ت ئه‌نجام دراوه‌ بۆ روونكردنه‌وه‌ی ئه‌م بابه‌ته‌ وا له‌ خواره‌وه‌ روون كردنه‌وه‌یه‌كی پشت ئه‌ستوور به‌ دۆكۆمێنته‌كان ئه‌خه‌ینه‌ ڕوو:
1- هه‌موو ساڵێك له‌كاتی هاتنی وه‌رزی زستان بۆ دابین كردنی نه‌وتی سپی بۆ هاووڵاتیان وه‌زاره‌تمان له‌ رێگای بانگێشتی ئاشكرا نه‌وتی  سپی دابین ده‌كات .
2- له‌سه‌ره‌تای وه‌رزی زستانی ساڵی ڕابردوو به‌ هه‌مان شێوه‌ بانگێشتی ئاشكرا بۆ دابین كردنی نه‌وتی سپی ئه‌نجامدرا ، به‌ڵام به‌هۆی قه‌یرانی دارایی نه‌بوونی سیوله‌ی نه‌قدی لێژنه‌ی باڵای وه‌زاره‌تمان بڕیاریدا له‌ به‌رامبه‌ر هێنانی نه‌وتی سپی به‌نزین بدرێت به‌ كۆمپانیا به‌ژداربوه‌كان .
ئه‌مه‌ش به‌ڕێگای ته‌نده‌رینگ كراوه‌ له‌ شێوه‌ی بانگێشتی راسته‌وخۆی ژماره‌ (4\2015) كه‌ تێیدا هاتووه‌ به‌رامبه‌ر به‌پێدانی بڕی  1000000 یه‌ك ملیۆن لیتر به‌نزین چه‌نده‌ نه‌وتی سپی دابین ده‌كه‌ن بۆ ئه‌م پڕۆسه‌یه‌ زیاتر له‌ 20  كۆمپانیا به‌ژداری تێداكردو به‌پێی به‌رزترین هێنانی نه‌وتی سپی كۆمپانیاكان قه‌بوڵ كران كه‌ به‌رزترین بڕی هێنانی نه‌وتی سپی 750000 حه‌وت سه‌دو په‌نجا هه‌زار لیتر بووه‌ .
3- بۆیه‌ سوته‌مه‌نی جۆری به‌نزین به‌كار هات بۆ ئاڵووێر ، چونكه‌ به‌رهه‌مێكی زۆر له‌جۆری به‌نزین هه‌بووه‌ له‌و به‌رواره‌دا له‌پێداویستی هه‌رێم .
به‌م پێیه‌ (5) كۆمپانیا ته‌نده‌ری بۆ ده‌رچوو به‌بڕی جیاواز  كه‌ بریتی بوون له‌ كۆمپانیاكانی (تانج،ساوپ كوردستان، ئیدریس سورچی،میلله‌ت،نیمۆ) سه‌رجه‌م  ئه‌م پڕۆسه‌یه‌ش به‌ڕه‌زامه‌ندی جه‌نابی وه‌زیر و لیژنه‌ی باڵا ئه‌نجام دراوه‌ ، كه‌ لێژنه‌ی باڵا پێك هاتووه‌ له‌ به‌ڕێوه‌به‌ری گشتی دیوانی وه‌زاره‌ت، به‌ڕێوه‌به‌ری گشتی وه‌به‌رهێنان و كانزاكان، به‌ڕێوه‌به‌ری گشتی پشكنین و سانسۆری ناوخۆ، به‌ڕێوه‌به‌ری نوسینگه‌ی تایبه‌تی وه‌زیر، بریكاری وه‌زاره‌ت و به‌سه‌رۆكایه‌تی جه‌نابی وه‌زیر .
بۆ ڕاست و دروستی كۆیی پڕۆسه‌كه‌ش لێژنه‌یه‌كی لێكۆڵینه‌وه‌ی باڵا دروست بكرێت. ده‌رده‌كه‌وێت كه‌ به‌ چ شێوه‌یه‌ك ئه‌م كاره‌ ئه‌نجام دراوه‌ و بڕیاری تاكه‌ كه‌سی تێدا نه‌بووه‌ و له‌به‌ر به‌رژه‌وه‌ندی گشتی بووه‌.

PUKmedia تایبه‌ت

هاوپێچ سه‌رجه‌م دۆكۆمێنته‌كان.....