سازانی شۆخ ‌و شه‌نگ ناسازێ‌

به‌هار مسته‌فا

سازان ئه‌و كچه‌ باڵابه‌رز و خوێن گه‌رمه‌ بوو كه‌ من له‌نزیكه‌وه‌ ئه‌یناسم.. ماوه‌ی سێ ساڵ ده‌بێت لاوێكی خوێن گه‌رم شه‌یدای ده‌بێت و چه‌ندین جار ده‌یه‌وێت هاوسه‌رگیری له‌گه‌ڵدا بكات، به‌ڵام له‌به‌ر جیاوازی ته‌مه‌ن كه‌ كوڕه‌كه‌ له‌ سازان بچوكتره‌، سازان ناتوانێ‌ هاوسه‌رگیری له‌گه‌ڵدا بكات ... ڕۆژ به‌ رۆژ هه‌تادێت خۆشه‌ویستی سازانی خوێن گه‌رم له‌ دڵی كوڕه‌ لاوه‌كه‌ زیاتر و زیاتر ده‌بێت .
سازانیش بێ ئه‌وه‌ی وشه‌یه‌كی تر بڵێت ته‌نها ئه‌وه‌ دووباره‌ ده‌كاته‌وه‌ و پێی ده‌ڵێ‌ كه‌ جارێكی تر ئه‌و بابه‌ته‌ دووباره‌ مه‌كه‌ره‌وه‌ له‌به‌ر جییاوازی ته‌مه‌نمان پێت ڕازی نیم و ئه‌گینا هیچی تر نییه‌، بۆ ماوه‌یه‌ك لێكترازان و بێده‌نگی هه‌بوو له‌نێوانییاندا به‌ڵام به‌هۆی ئه‌و سازان سازانه‌ی له‌ میدیاكانه‌وه‌ رۆژانه‌ باسی لێوه‌ده‌كرێت.. سازانی زۆر ناڕه‌حه‌ت و بێتاقه‌ت كردووه‌ و ده‌ڵێ‌ ناو نه‌ما له‌ ناوی من زیاتر، ڕۆژانه‌ سازان سازان، چونكه‌ له‌و ڕۆژه‌وه‌ گه‌نجه‌كه‌ كه‌ هه‌موو رۆژێك ئه‌م ناوه‌ی به‌رگوێ ده‌كه‌وێت سازانه‌كه‌ی خۆی بیردێته‌وه‌ زیاتر گه‌رم و گوڕتر ده‌بێت له‌ پێناوی ئه‌وه‌ی سازانی ده‌ست بكه‌وێ، به‌ڵام سازان تا دێت له‌ ڕه‌فتاركردن له‌گه‌ڵیدا ڕه‌قتر و سه‌ختتر ده‌بێت..
منیش حه‌زم كرد ئه‌م به‌سه‌رهاته‌ی سازان بزانن و خۆزگه‌ش ده‌خوازێت و ده‌ڵێ‌، حزبه‌ سییاسیه‌ كورده‌كان خێرا ڕێك بكه‌ون و ئیتر ناوی سازان ئه‌وه‌نده‌ دووباره‌ مه‌كه‌نه‌وه‌ تاكو ئاهێكم به‌ به‌ردابێته‌وه‌ و ڕزگارم بێت له‌م ناوهێنانه‌ كه‌ كوڕه‌كه‌ی شێت و وێڵ و سه‌رگه‌ردان كردووه‌.
بۆیه‌ له‌ كۆتاییدا منیش ده‌ڵێم: به‌خوا ناو (سازان) چ له‌بواری سیاسی و چ له‌ڕووی خۆشه‌ویستییدا بێت سه‌خت بووه‌ و به‌ئاسانی كه‌س پێی ناگات و هیچ له‌ بارودۆخه‌كانی پێ چاره‌سه‌ر ناكرێت!