سه‌رۆك كۆمار: عیراق له‌بری هه‌موو جیهان شه‌ڕی تێرۆر ده‌كات

.

ئه‌مڕۆ 30-8-2015 سه‌رۆك كۆمار فوئاد مه‌عسوم له‌كۆشكی سه‌لام له‌به‌غدا پێشوازیكرد له‌ خالید عوبه‌یدی وه‌زیری به‌رگری عیراق.

له‌و دیداره‌دا سه‌رۆك مه‌عسوم ته‌ئكیدیكرده‌وه‌ له‌سه‌ر پێویستی گرنگیدان به‌ به‌هێزكردنی توانی سوپا هه‌ر له‌پڕچه‌ككردن و مه‌شق پێكردن و ئاماده‌كردنی وه‌ك دامه‌زاروه‌یه‌كی نیشتمانی كه‌ ئه‌ركی پارێزگاریكردن بێت له‌ئاسایش و ئۆقره‌یی و ده‌ستكه‌وته‌ نیشتیمانییه‌ باڵاكان، به‌تایبه‌ت له‌كاتی ئێستادا كه‌ عیراق له‌جه‌نگێكی چاره‌نوسازدایه‌و به‌نوێنه‌رایه‌تی هه‌موو جیهان شه‌ڕی تێرۆر ده‌كات، به‌بایه‌خیشه‌وه‌ باسی له‌و ده‌ستكه‌وت و سه‌ركه‌وتنانه‌ی ئه‌م دواییه‌ كرد كه‌ له‌زۆربه‌ی لایه‌نی ئۆپه‌راسیۆنه‌كان به‌دیهاتووه‌.

له‌لای خۆیه‌وه‌ وه‌زیری به‌رگری باسی له‌ئۆپه‌راسییۆنه‌ سه‌ربازییه‌كانی ئێستاكرد كه‌ له‌ئه‌نبار و سه‌لاحه‌دین به‌ڕێوه‌ده‌چێت, له‌گه‌ڵ ئه‌و ئاماده‌كارییانه‌ی كه‌ ده‌كرێت بۆ رزگاركردنه‌وه‌ی موسڵ و ناوچه‌كانی تر، ئاماژه‌شی به‌رۆڵی یه‌كه‌ جیاكانی سوپا كرد له‌به‌گژاچونه‌وه‌ی تێرۆر.

هه‌روه‌ك عوبه‌ییدی ته‌ئكیدی كرده‌وه‌ له‌سه‌ر وره‌و گیانی ده‌ستپێشخه‌ری سه‌ربازان كه‌ رۆژ به‌ رۆژ له‌به‌رزبونه‌وه‌دایه‌، سوربون و شێلگیربونی زیاتریش هه‌یه‌ بۆ تێكشكاندنی تێرۆر و له‌ناوبردنی تێرۆریستان و ئازادكردنه‌وه‌ی ته‌واوی خاكه‌كان و گێڕانه‌وه‌ی ئاسایش و ئۆقریه‌ی بۆیان، به‌بایه‌خیشه‌وه‌ باسی له‌و گرنگیدان و به‌دواداچونه‌ی سه‌رۆك كۆمار كرد بۆ دۆخی سه‌ربازی له‌شانۆی پرۆسه‌ سه‌ربازییه‌كاندا.

PUKmedia تایبه‌ت