سلێمانی‌..پیاوێك ژنه‌كه‌ی‌ ده‌كوژێت و كچه‌كه‌شی بریندارده‌كات

به‌ وته‌ی تۆمه‌تباره‌كه‌ كێشه‌ی‌ له‌گه‌ڵ‌ خێزانه‌كه‌ی هه‌بووه‌

شه‌وی‌ رابردوو 4-8-2015 له‌ گه‌ڕه‌كێكی‌ شاری‌ سلێمانی‌ پیاوێك به‌ گوللـه‌ ژنه‌كه‌ی‌ خۆی ده‌كوژێت و كچه‌كه‌شی‌ بریندارده‌كات.

نه‌قیب سه‌ركه‌وت ئه‌حمه‌د، وته‌بێژی‌ به‌ڕێوه‌به‌رایه‌تی‌ پۆلیسی‌ پارێزگای‌ سلێمانی‌، به‌ PUKmedia ی راگه‌یاند: شه‌وی‌ رابردوو سه‌عات 11:30 ده‌قیقه‌ی شه‌و پیاوێك به‌ چه‌كی ده‌مانچه‌ چه‌ند گوللـه‌یه‌ك ده‌نێت به‌ خێزانه‌كه‌یه‌وه‌و پاشان كچه‌كه‌شی بریندارده‌كات.

وتیشی: رووداوه‌كه‌ له‌ گه‌ڕه‌كی‌ گرده‌بڕاوه‌كه‌ی‌ شاری‌ سلێمانی‌، روویداوه‌و دوای ده‌ستگیركردنیشی تۆمه‌تباره‌كه‌ دانی به‌تاوه‌نه‌كه‌یدا ناوه‌.

راشیگه‌یاند: ژنه‌ كوژراوه‌كه‌ ناوی‌ (ز. ق. م) ه‌ ‌و ته‌مه‌نی‌ 53 ساڵانه‌ ‌و مێرده‌كه‌شی‌ كه‌ ته‌قه‌ی‌ لێكردووه‌ ناوی‌ (ع. ك. ش) ه‌.

نه‌قیب سه‌ركه‌وت ئه‌حمه‌د ئه‌وه‌شی‌ خسته‌ڕوو: ‌ شه‌وی‌ رابردوو‌ پۆلیس نه‌یتوانی‌ تۆمه‌تباره‌كه‌ ده‌ستگیربكات، به‌ڵام به‌یانی‌ ئه‌مڕۆ تاوانباره‌كه‌ له‌ لایه‌ن پۆلیسه‌وه‌ ده‌ستگیركرا.

جێی باسه‌، به‌ وته‌ی تۆمه‌تباره‌كه‌ كێشه‌ی‌ له‌گه‌ڵ‌ خێزانه‌كه‌ی هه‌بووه‌، بۆیه‌ ئه‌و كاره‌ی كردووه‌.

PUKmedia دیار ستار