باج خرایە سەر سێویش

بۆ هەر كیلۆیەك 350 دینار باج دەخاتە سەر سێوی هاوردەكراو

وەزارەتی كشتوكاڵ و سەرچاوەكانی ئاوی حكومەتی هەرێم رایدەگەیەنێت، لەئەمڕۆوە لەپێناو پاراستن و ساغبونەوەی بەرهەمی سێوی خۆماڵی بۆ هەر كیلۆیەك 350 دینار باج دەخاتە سەر سێوی هاوردەكراو، ئەم باج خستنەسەرەش تا كۆتایی ئەمساڵ درێژەی دەبێ.

ماجید دەباغ بەڕێوەبەری راگەیاندنی وەزارەتی كشتوكاڵ و سەرچاوەكانی ئاوی حكومەتی هەرێمی كوردستان لەلێدوانێكی رۆژنامەوانیدا رایگەیاند: وەزارەتی كشتوكاڵ و سەرچاوەكانی ئاو بەهاوئاهەنگی لەگەڵ وەزارەتی دارایی و ئابوری حكومەتی هەرێم باج دەخاتە سەر بەروبومی سێوی هاوردەكراو، ئەم هەنگاوەش بۆ ئەوەیە هاوسەنگی لەكاتی پێگەیشتنی بەروبومی خۆماڵی بێتە دروست بوون و بەرهەمی خۆماڵی ساغ ببێتەوە.

وتیشی: چەند رۆژێكە بەروبومی سێوی خۆماڵی پێگەیشتووە، بۆ ئەوەی جوتیارانی خۆماڵی زیان نەكەن، بەڵكو سود بكەن و بەرهەمەكانیان ساغ ببێتەوە، لەئەمڕۆوە بۆ هەر كیلۆیەك سێوی هاوردەكراو لەدەرەوە 350 دینار، واتە بۆ هەر تۆنێك 350 هەزار دینار باجی دەخرێتەسەر.

راشیگەیاند: باج خستنە سەر سێویش كە لەئەمڕۆوە دەستپێدەكات و تا رۆژی 1/12ی كۆتایی ئەمساڵ درێژەی دەبێ، راگرتنی هاوسەنگی لەبازاڕەكانی هەرێم پێویستن بۆ ئەوەی جوتیاران بەئاسانی لەساتی پێگەیشتنی هەر بەروبومێكی خۆماڵی بەرهەمەكانیان ساغ ببێتەوە.

PUKmedia