قوباد تاڵه‌بانی: هه‌موو هه‌وڵێكمان خستوه‌ته‌گه‌ڕ بۆ چاره‌سه‌ركردنی قه‌یرانی دارایی

دیداری قوباد تاڵه‌بانی و باڵیۆزی به‌ریتانیا له‌ عیراق

چاره‌سه‌ركردنی قه‌یرانی دارایی له‌ پێشینه‌ی كاره‌كانی حكومه‌تی هه‌رێمی كوردستاندایه‌ و باڵیۆزی به‌ریتانیا ئاماده‌یی وڵاته‌كه‌ی بۆ هه‌ر هاوكارییه‌كی پێویست ده‌رده‌بڕێت.

جێگری سه‌رۆكی حكومه‌تی هه‌رێمی كوردستان و باڵیۆزی به‌ریتانیا له‌ عیراق پرسی ئابوری و سیاسی هه‌رێمی كوردستانیان تاوتوێ كرد،له‌ دیداره‌كه‌دا كه‌ كاروان جه‌مال تاهیر نوێنه‌ری حكومه‌تی هه‌رێمی كوردستان له‌ به‌ریتانیا ئاماده‌ی بوو، قوباد تاڵه‌بانی به‌ وردیی رۆشنایی خسته‌سه‌ر بارودۆخی ئابوری هه‌رێمی كوردستان و به‌رچاو روونی پێویستی بۆ وه‌فدی میوان خسته‌ڕوو.

هاوكات له‌ دیداره‌كه‌دا كه‌ ئه‌مڕۆ له‌ ته‌لاری ئه‌نجومه‌نی وه‌زیران به‌ڕێوه‌چوو جێگری سه‌رۆكی حكومه‌تی هه‌رێمی كوردستان رایگه‌یاند: حكومه‌تی هه‌رێم هه‌موو هه‌وڵێكی خۆی خستوه‌ته‌گه‌ڕ بۆ چاره‌سه‌ركردنی قه‌یرانی دارایی و بۆ ئه‌م مه‌به‌سته‌ش هه‌نگاوه‌كان و پێویستییه‌كانی چاره‌سه‌ركردنی گرتووه‌ته‌به‌ر.

لای خۆیه‌وه‌ فرانك به‌یكه‌ر باڵیۆزی به‌ریتانیا له‌ عیراق هاوكاری و هه‌ماهه‌نگی حكومه‌تی به‌ریتانیای بۆ چاره‌سه‌ركردنی قه‌یرانه‌ داراییه‌كان گه‌یانده‌ جێگری سه‌رۆكی حكومه‌ت و هیوای خواست هه‌وڵه‌كانی حكومه‌تی هه‌رێمی كوردستان بۆ ده‌رباز بوون له‌ قه‌یرانه‌كان به‌ ئه‌نجام بگات.

PUKmedia