له‌باره‌ی شه‌ڕه‌كه‌ی نێوان حدكا و په‌كه‌كه‌وه‌

ئومێد بابان

ئومێد بابان
به‌ره‌به‌یانی ئه‌مڕۆ یه‌كشه‌ممه‌، له‌سه‌قه‌ر و خڕیله‌وه‌رانی رۆژهه‌ڵاتی كوردستان، شه‌ڕێكی قورس له‌نێوان پێشمه‌رگه‌كانی حزبی دیموكراتی كوردستانی ئێران و پارتی كرێكارانی كوردستاندا هه‌ڵگیرسا و به‌گوێره‌ی ئاژانسه‌كانی هه‌واڵیش، هێشتا شه‌ڕو پێكدادان به‌رده‌وامه‌ و قوربانیشی لێ كه‌وتووه‌ته‌وه‌.
ئه‌و شه‌ڕه‌ی نێوان حزبی دیموكراتی كوردستانی ئێران و پارتی كرێكارانی كوردستان له‌م دۆخه‌ ناسك و هه‌ستیاره‌ی ئێستادا جا به‌ هه‌ر پاساوێك بێت، له‌ به‌رژه‌وه‌ندیی هیچ لایه‌كدا نییه‌ و دووباره‌ نه‌شته‌ر به‌ برینه‌كانی ڕابردووماندا ده‌هێنێته‌وه‌ و شه‌ڕی براكوژیی كورد و كوردمان دێنێته‌وه‌ یاد.
له‌ ساڵانی ڕابردوودا كه‌ شه‌ڕی خۆكوژیمان زۆر ئه‌زموون كرد، جگه‌ له‌ماڵ وێرانی و نه‌هامه‌تی و كه‌مكردنه‌وه‌ له‌ پێگه‌ی سیاسی له‌ ئاستی نێوده‌وڵه‌تیدا، هیچی دیكه‌مان نه‌چنییه‌وه‌، بۆیه‌ جێی خۆیه‌تی هه‌رچی زووه‌ لایه‌نه‌ سیاسییه‌كانی چوار پارچه‌ی كوردستان بێنه‌ سه‌ر هێڵ و به‌په‌له‌ ئاگری ئه‌و شه‌ڕه‌ نه‌گریسه‌ خامۆش بكه‌ن.
ئێستا كه‌ له‌باشووری كوردستاندا شه‌ڕی سه‌خت له‌گه‌ڵ تیرۆریستانی داعشدا درێژه‌ی هه‌یه‌ و كوردستانیان له‌بری هه‌موو جیهان شه‌ڕی تیرۆر ده‌كه‌ن، له‌ ڕووی نێوده‌وڵه‌تییه‌وه‌ هه‌رێم متمانه‌ی زیاتری به‌ ده‌ست هێناوه‌ و ڕۆژ دوای رۆژیش سه‌نگی هه‌رێمی كوردستان له‌كۆمه‌ڵگای نێوده‌وڵه‌تیدا ڕوو له‌هه‌ڵكشانه‌، بۆیه‌ ئه‌م شه‌ڕه‌ نه‌خوزراوه‌ له‌م ئان و ساته‌دا، زیان به‌ناوبانگی كوردستان له‌ناوچه‌كه‌ و جیهانیشدا ده‌گه‌یه‌نێت، له‌به‌ر ئه‌وه‌ پێویسته‌ هه‌رسێ سه‌رۆكایه‌تییه‌كه‌ی هه‌رێمی كوردستانیش هه‌ڵوێستی ڕوون ده‌ببڕن و دژی ئه‌و شه‌ڕی براكوژییه‌ بوه‌ستنه‌وه‌ و ته‌نانه‌ت هه‌موو هه‌وڵێكیش بخه‌نه‌ گه‌ڕ تا شه‌ڕه‌كه‌ كۆتایی پێ بێت و چیدیكه‌ خوێنی كورد به‌ ده‌ستی كورد نه‌ڕژێت.
دواجار ماوه‌ته‌وه‌ بڵێین، ئێستا له‌هه‌موو كات زیاتر كورد له‌هه‌ر چوار پارچه‌ی كوردستاندا پێویستی به‌ یه‌كده‌نگی و یه‌كهه‌ڵوێستی هه‌یه‌ و پشتیوانیكردنی یه‌كتریش، ئه‌ركی له‌پێشینه‌ و سه‌ره‌كی گشت لایه‌نه‌ سیاسییه‌كانی كوردستانی گه‌وره‌یه‌، نه‌ك دژایه‌تی و بوغزاندن و هه‌ڵگیرساندنی شه‌ڕی براكوژی.
به‌ درێژایی مێژووی كۆن و نوێ، قه‌ت وه‌ك ئێستا كورد یه‌كهه‌ڵوێست و هاوده‌نگ نه‌بووه‌ و ئه‌و یه‌كهه‌ڵوێستی و هاوده‌نگییه‌ش پاڵپشتیی زیاتری كۆمه‌ڵگای نێوده‌وڵه‌تیمان بۆ مسۆگه‌ر ده‌كات كه‌ بۆ داهاتووی هه‌ر چوار پارچه‌ و له‌ هه‌موو ڕووه‌كانه‌وه‌ گرینگ و جێبایه‌خه‌، بۆیه‌ ده‌شێ ناكۆكییه‌كان به‌لاوه‌ بنێین و هه‌رچی زیاتر هه‌وڵی لێكتێگه‌یشتن و لێكنزیكبوونه‌وه‌ بده‌ین، نه‌ك له‌جیاتی ئه‌وه‌، ته‌نانه‌ت له‌ ململانێی سیاسیشه‌وه‌ بۆ شه‌ڕی براكوژی په‌ل بهاوێژین.

PUKmedia