راسپێردراوی نه‌ته‌وه‌ یه‌كگرتووه‌كان له‌گه‌ڵ ئیداره‌ی كه‌ركوك كۆده‌بێته‌وه‌

بۆ قسه‌كردنه‌ له‌سه‌ر ئه‌و كێشانه‌ی به‌غدا بۆ پارێزگاكه‌ی دروست كردوه‌

یان كۆبیش راسپێردراوی نه‌ته‌وه‌ یه‌كگرتووه‌كان له‌عیراق، بۆ تاوتویكردنی دواهه‌مین بارودۆخی پارێزگای كه‌ركوك و ئه‌و قه‌یرانانه‌ی كه‌ حكومه‌تی عیراق بۆ پارێزگاكه‌ دروستیكردون له‌گه‌ڵ ئیداره‌ی پارێزگای كه‌ركوك كۆده‌بێته‌وه‌.

سه‌رچاوه‌یه‌كی به‌رپرس له‌ پارێزگای كه‌ركوك به‌ PUKmedia ی راگه‌یاند: له‌ سه‌عات 11ی ئه‌مڕۆ 24-5-2015 یان كۆبیش راسپێردراوی نه‌ته‌وه‌یه‌كگرتووه‌كان له‌ عیراق له‌گه‌ڵ پارێزگارو به‌رپرسه‌ ئیداریه‌ باڵاكانی شاری كه‌ركوك چوونه‌ته‌ هۆڵی كۆبونه‌وه‌، بۆ قسه‌كردن له‌سه‌ر دواهه‌مین پێشهاته‌كانی ناوچه‌كه‌. 

رونیشكرده‌وه‌ :یه‌كێك له‌ ته‌وه‌ره‌ سه‌ره‌كیه‌كانی كۆبونه‌وه‌كه‌ بۆ قسه‌كردنه‌ له‌سه‌ر ئه‌و كێشانه‌ی كه‌ حكومه‌تی ناوه‌ند بۆ پارێزگاكه‌ی دروستكردوه‌، به‌تایبه‌ت نه‌ناردنی به‌شه‌ بودجه‌گشتی  پارێزگاو بودجه‌ی پترۆ دۆلارو ده‌یان گرفتی تر. 

جه‌ختیكرده‌وه‌: كۆبونه‌وه‌كه‌ داخراوه‌و رێگه‌ به‌ هیچ كه‌ناڵێكی راگه‌یاندن نه‌دراوه‌ بچنه‌ ناو هۆڵی كۆبونه‌وه‌و پێده‌چێت زیاتر له‌ سێ سه‌عات بخه‌یانێت.

PUKmedia  سامان یاروه‌یس