لێكۆلینه‌وه‌ له‌ 5 ملیۆن دۆلاره‌كه‌ی پایته‌ختی گه‌شتیاری ده‌كرێت

له‌خه‌رجكردنی پاره‌كه‌دا گه‌نده‌ڵی تێدا كراوه‌

به‌دواداچوون و لێكۆڵینه‌وه‌ له‌سه‌ر خه‌رجكردنی ئه‌و 5 ملیۆن دۆلاره‌ی كه‌ بۆ شاری هه‌ولێر له‌كاتی بوونی به‌پایته‌ختی گه‌شتیاری ته‌رخانكرابوو به‌رده‌وامه‌ و رۆژی 20/5/2015، لیژنه‌ی ده‌ستپاكی له‌په‌رله‌مانی كوردستان، به‌سه‌رۆكایه‌تی عومه‌ر ساڵح كۆچه‌ر سه‌رۆكی لیژنه‌ ئاماده‌بوونی جێگری سه‌رۆكی لیژنه‌ و بڕیارده‌ر و  ژماره‌یه‌ك له‌ئه‌ندامانی و راوێژكاری لیژنه‌كه‌، له‌هۆڵی لیژنه‌ له‌ته‌لاری په‌رله‌مان، له‌گه‌ڵ لیژنه‌ی چاودێری و ده‌ستپاكی و سكاڵای ئه‌نجومه‌نی پارێزگای هه‌ولێر كۆبۆوه‌.

 ته‌وه‌ری یه‌كه‌می كۆبوونه‌وه‌كه‌ بریتیبوو له‌هه‌ماهه‌نگی و ئالوگۆڕكردنی زانیاری له‌نێوان هه‌ردوو لیژنه‌كه‌دا، به‌ مه‌به‌ستی روبه‌ڕووبونه‌وه‌ی گه‌نده‌ڵی و به‌دواداچوونی زیاتر له‌سه‌ر ئه‌و كه‌یسانه‌ی كه‌ له‌سه‌ر پرسی گه‌نده‌ڵی  ده‌گه‌نه‌ ده‌ستی هه‌ردوو لیژنه‌ بۆ به‌ ئه‌نجام گه‌یاندنیان.

هه‌ر له‌كۆبونه‌وه‌كه‌دا باس له‌و 5 ملیۆن دۆلاره‌ كرا كه‌ بۆ شاری هه‌ولێر له‌كاتی بوونی به‌پایته‌ختی گه‌شتیاری خه‌رجكرابوو، له‌وباره‌یه‌وه‌ عومه‌ر ساڵح كۆچه‌ر سه‌رۆكی لیژنه‌ی ده‌ستپاكی رایگه‌یاند: ئه‌و راپۆرته‌ی كه‌ له‌لایه‌ن دیوانی چاودێریی دارایی هاتووه‌ خستمانه‌ ده‌ست لیژنه‌ی چاودێری و ده‌ستپاكی و سكاڵای ئه‌نجومه‌نی پارێزگای هه‌ولێر، چونكه‌ ئه‌و بابه‌ته‌ په‌یوه‌ندیی به‌وانیشه‌وه‌ هه‌یه‌ء داوامانكرد كه‌ به‌دواداچون و لێكۆڵینه‌وه‌ بكه‌ن و وه‌ڵامێكی پێویستمان بده‌نه‌وه‌ تاوه‌كو بزانین ئه‌و پاره‌یه‌ چۆن خه‌رج كراوه‌.

ئاماژه‌ی به‌وه‌شدا: چاوه‌ڕێی وه‌ڵامی لیژنه‌كه‌ی ئه‌نجومه‌نین بۆ روونكردنه‌وه‌ی زیاتر، ئه‌گه‌ر وه‌ڵامه‌كه‌یان بڕواهێنه‌ر نه‌بوو ئه‌و كات له‌سه‌ر ئه‌و كه‌یسه‌ بانگهێشتی پارێزگاری هه‌ولێر ده‌كه‌ین بۆ په‌رله‌مان.

سه‌رۆكی لیژنه‌ی ده‌ستپاكی، ئه‌وه‌شی راگه‌یاند: به‌پێی راپۆرتی دیوانی چاودێریی دارایی له‌خه‌رجكردنی پاره‌كه‌دا گه‌نده‌ڵی تێدا كراوه‌، به‌ڵام پێویستیی به‌به‌دواداچونی زیاتر هه‌یه‌ تاوه‌كو كه‌یسه‌كه‌ یه‌كلایی بكه‌ینه‌وه‌.

PUKmedia راگه‌یاندنی په‌رله‌مان