په‌یامی سه‌رۆك كۆمار له‌ یادی دامه‌زراندنی كۆمه‌ڵه‌ی خوێندكارانی كوردستاندا

د. فوئاد مه‌عسوم سه‌رۆك كۆماری عیراق

به‌بۆنه‌ی 39 ه‌مین ساڵیادی دامه‌زراندنی كۆمه‌ڵه‌ی خوێندكارانی كوردستان له‌ په‌یامێكدا د.فوئاد مه‌عسوم پیرۆزبایی ئاڕاسته‌ی سكرتارییه‌ و ئه‌ندامانی رێكخراوه‌كه‌ ده‌كات.

له‌ به‌شێكی په‌یامه‌كه‌دا سه‌رۆك كۆمار رایده‌گه‌یه‌نێت: ده‌توانن شانازی به‌ خۆتان و خه‌باته‌كه‌تانه‌وه‌ بكه‌ن كه‌ به‌درێژایی تێكۆشانی كۆمه‌ڵانی خه‌ڵكی كوردستان رۆڵێكی ئێجگار گرنگ و پر شانازیتان گێڕاوه‌، به‌ شێوه‌یه‌ك له‌ هه‌موو شۆڕش و راپه‌رینه‌كاندا خوێنتان به‌خشیوه‌و فیداكاریی و خۆنه‌ویستیتان نواندووه‌.

ئاماژه‌ی بۆئه‌وه‌شكردوه‌: نه‌ك هه‌ر ئه‌مه‌، به‌ڵكو ده‌توانن شانازیش به‌و راستییه‌وه‌ بكه‌ن كه‌ زۆربه‌ی هه‌ره‌ زۆری سه‌ركرده‌ سیاسییه‌كانی میلله‌ته‌كه‌مان هه‌ڵقوڵاوی ناو ریزه‌كانی خوێندكاران و قاڵبووی ناو خه‌باتی خوێندكارانن.

له‌ به‌شێكی په‌یامه‌كه‌دا  د. فوئاد مه‌عسوم ده‌ڵێت: شانازیش به‌و راستییه‌وه‌ بكه‌ن كه‌ زۆربه‌ی هه‌ره‌ زۆری سه‌ركرده‌ سیاسییه‌كانی میلله‌ته‌كه‌مان هه‌ڵقوڵاوی ناو ریزه‌كانی خوێندكاران و قاڵبووی ناو خه‌باتی خوێندكارانن.


ده‌قی پیرۆزباییه‌كه‌ی سه‌رۆك كۆمار له‌ یادی دامه‌زراندنی كۆمه‌ڵه‌ی خوێندكارانی كوردستاندا..

  به‌رێزان سكرتاریه‌ت و ئه‌ندامانی
 كۆمه‌ڵه‌ی خوێندكارانی كوردستان

به‌ بۆنه‌ی یادی دامه‌زراندنی كۆمه‌ڵه‌كه‌تان پیرۆزباییه‌كی گه‌رم له‌ ئێوه‌و هه‌موو خوێندكارانی كوردستان ده‌كه‌م، هیوادارم ئه‌م بۆنه‌ پرشنگداره‌ هانده‌رتان بێت بۆ زیاتر كاركردن و فیداكاری له‌ پێناو باشتر خزمه‌تكردنی خوێندكاران و هێنانه‌دی ئاوات و ئامانجه‌كانیان.

خوێندكارانی ئازیز ..

ئێوه‌ ده‌توانن شانازی به‌ خۆتان و خه‌باته‌كه‌تانه‌وه‌ بكه‌ن كه‌ به‌درێژایی تێكۆشانی كۆمه‌ڵانی خه‌ڵكی كوردستان رۆڵێكی ئێجگار گرنگ و پر شانازیتان گێڕاوه‌، به‌ شێوه‌یه‌ك له‌ هه‌موو شۆڕش و راپه‌رینه‌كان دا خوێنتان به‌خشیوه‌و فیداكاریی و خۆنه‌ویستیتان نواندووه‌، نه‌ك هه‌ر ئه‌مه‌، به‌ڵكو ده‌توانن شانازیش به‌و راستییه‌وه‌ بكه‌ن كه‌ زۆربه‌ی هه‌ره‌ زۆری سه‌ركرده‌ سیاسییه‌كانی میلله‌ته‌كه‌مان هه‌ڵقوڵاوی ناو ریزه‌كانی خوێندكاران و قاڵبووی ناو خه‌باتی خوێندكارانن.

بۆیه‌ ئه‌مڕۆش كه‌ عیراق و كوردستان گیرۆده‌ی مه‌ترسی تیرۆریستانی داعش بووه‌ته‌وه‌، دیسان ئێوه‌ له‌ هه‌موو گۆڕه‌پانه‌كانی خه‌بات و تێكۆشانی خوێنده‌واریی و جه‌ماوه‌ریی و پێشمه‌رگایه‌تی و رووناكبیری ئاماده‌ییتان هه‌یه‌و به‌ هه‌موو تواناتانه‌وه‌ به‌رگری له‌ ده‌ستكه‌وته‌ دیموكراتی و باڵاكانی ووڵات ده‌كه‌ن  كه‌ ئه‌مه‌ش شانازییه‌كی ترتانه‌ له‌ ناو كاروانه‌ نه‌پساوه‌كه‌ی تێكۆشانتاندا.

له‌ كۆتایی دا هیوادارم ئێوه‌ی خوێندكاران هه‌رده‌م  له‌ڕیزی پێشه‌وه‌ی خه‌بات دا بن  و وه‌ك نه‌وه‌یه‌كی خزمه‌تگوزاری خه‌ڵكی كوردستان بمێننه‌وه‌.

هه‌ر شادو سه‌ركه‌وتووبن


  دڵسۆزتان
  دكتۆر فوئاد مه‌عسوم
 سه‌رۆك كۆماری عیراق