هه‌ڵه‌بجه‌ .. داوای كردنه‌وه‌ی به‌شی گۆڕه‌ به‌كۆمه‌ڵه‌كان ده‌كرێت

ده‌بێت چاوه‌روانبین تا تیمه‌ پسپۆره‌كان سه‌ردانی ناوچه‌كه‌ ده‌كه‌ن

زیاتر له‌ 50  گۆری به‌ كۆمه‌ڵ لسنوری پارێزگای هه‌ڵه‌بجه‌دا هه‌ن و به‌ڵام هێشتا به‌شێك یان تیمێكی پسپۆر به‌هه‌ڵدانه‌وه‌ی گۆره‌ به‌كۆمه‌ڵه‌كان له‌هه‌ڵه‌بجه‌دانیه‌ وه‌زیری شه‌هیدان و ئه‌نفالكراوه‌كانیش رایده‌گه‌یه‌نێت له‌گه‌ڵ دروستكردنی به‌رێوبه‌رایه‌تیه‌ گشتیه‌كان ئه‌و به‌شه‌ له‌هه‌ڵه‌بجه‌ ده‌كه‌ینه‌وه‌.

سه‌عدون محه‌مه‌د به‌ریۆبه‌ری شه‌هیدان و ئه‌نفالكرانی هه‌ڵه‌بجه‌ له‌لێدوانێكی تایبه‌تدا به‌ PUKmedia ی راگه‌یاند: زیاد له‌ 50 گۆری به‌كۆمه‌ل له‌سنوری هه‌ڵه‌بجه‌دا هه‌ن و پێویسته‌ هه‌رچی زووه‌ تیمێكی تایبه‌ت به‌هه‌ڵگرتنه‌وه‌ی رووفات له‌ هه‌ڵه‌بجه‌ دروست بكرێت .

ووتیشی: زۆر جار به‌هۆی ئه‌وه‌ی تیمی تایبه‌ت نیه‌ له‌ هه‌ڵه‌بجه‌ ده‌بێت چاوه‌روانبین تا تیمه‌ پسپۆره‌كان سه‌ردانی ناوچه‌كه‌ ده‌كه‌ن.
 
مه‌حمود حاجی ساڵج وه‌زیری شه‌هیدان له‌ لێدوانێكدا به‌ PUKmedia ی رایگه‌یاند:  ئێمه‌ به‌رێوبه‌رایه‌تیه‌كمان هه‌یه‌ له‌دیوانی وه‌زاره‌ت كه‌ تیمێكی پسپۆرن له‌ دۆزینه‌وه‌ و هه‌ڵدانه‌وه‌ و ناسینه‌وه‌ی گۆره‌ به‌كۆمه‌ڵه‌كان كه‌رۆژانه‌ له‌ شوێنه‌ جیاجیاكاندا كاری پشكنین ده‌كه‌ن و هه‌موو رێكاره‌كان بۆ راده‌ستكردنه‌وه‌ی رووفاته‌كان به‌چه‌ندین هه‌نگاوی جیاجیا  ئه‌نجامده‌ده‌ن بو هه‌موو گۆره‌ به‌كۆمه‌له‌كان.

ووتیشی: له‌گه‌ڵ هه‌نگاوه‌ ئیداریه‌كانی پارێزگای هه‌ڵه‌بجه‌ و دروستكردنی به‌رێوبه‌رایه‌تی گشتی به‌شێك به‌ناوی گۆره‌ به‌كۆمه‌ڵه‌كان له‌هه‌ڵه‌بجه‌ ده‌كه‌ینه‌وه‌ كه‌سه‌ر به‌ به‌رێوبه‌رایه‌تی دیوانی وه‌زاره‌ت ئه‌بێت.

به‌هۆی شه‌ری عیراق_ئێران و زوڵم و سته‌می به‌عسی رووخاو ده‌رهه‌ق به‌هه‌ڵه‌بجه‌ و هه‌ورامان و شاره‌زوور رۆژانه‌ و مانگانه‌ ئێسك و پروسكی چه‌ندین هاووڵاتی و سه‌رباز له‌ هه‌ڵه‌بجه‌ ده‌دۆزرینه‌وه‌ به‌ڵام له‌ نه‌بوونی تیمێكی پسپۆردا زۆرجار له‌لایه‌ن چه‌ند ده‌زگایه‌كه‌وه‌ كۆده‌كرێنه‌وه‌ كه‌ په‌یوه‌ندیدارنین به‌هه‌ڵگرتنه‌وه‌ی رووفات له‌ئێستاشدا زیاد له‌ 50 گۆری به‌كۆمه‌ڵ هه‌ن كه‌ساڵانه‌ تیمه‌ پسپۆره‌كان سه‌ردانی شاری هه‌ڵه‌بجه‌ ده‌كه‌ن و كاركردن بۆ هه‌ڵدانه‌وه‌یان ئه‌نجام ئه‌ده‌ن.


PUKmedia
فه‌رحان حه‌مه‌خان-هه‌ڵه‌بجه‌