په‌یامی كۆسره‌ت ره‌سوڵ به‌بۆنه‌ی 24ـه‌مین ساڵیادی راپه‌ڕینه‌كه‌ی گه‌لی كورد‌

گه‌رمترین پیرۆزبایی ئاڕاسته‌ی گه‌له‌كه‌مان ده‌كه‌م

به‌بۆنه‌ی بیست و چواره‌مین ساڵیادی راپه‌ڕینی خه‌ڵكی كوردستان، كۆسره‌ت ره‌سوڵ عه‌لی جێگری سه‌رۆكی هه‌رێمی كوردستان په‌یامێك ئاڕاسته‌ی كۆمه‌ڵانی خه‌ڵكی كوردستان ده‌كات.

ده‌قه‌كه‌ی:
به‌ناوی خوای گه‌وره‌و میهره‌بان
له‌ بیست و چواره‌مین ساڵیادی راپه‌ڕینی خه‌ڵكی كوردستان به‌رامبه‌ر زوڵم و زۆرداری و سته‌می چه‌ند ساڵه‌ی حزبی به‌عس، گه‌رمترین پیرۆزبایی ئاڕاسته‌ی گه‌له‌كه‌مان ده‌كه‌م و ده‌خوازم ئه‌م رۆژه‌ گرنگ و مێژووییه‌ ببێته‌ خاڵی وه‌رچه‌رخان و سه‌ركه‌وتنی كۆتایی گه‌له‌كه‌مان.

مێژوو شاهێده‌ كه‌ ئه‌وی رۆژێ گه‌له‌كه‌مان له‌ به‌رامبه‌ر زوڵم و زۆرییه‌كانی به‌عس چۆكی دانه‌داو به‌ هاوكاری و پاڵپشتی و پشتیوانی هێزی پێشمه‌رگه‌ له‌ سه‌رجه‌م شاره‌كانی كوردستان راپه‌ڕین و رانیه‌ی ده‌روازه‌ی راپه‌ڕینیش بووه‌ یه‌كه‌م وێستگه‌ی ئه‌و قاره‌مانه‌تییه‌ی گه‌له‌كه‌مان و دواجار به‌ رزگاركردنی سه‌رجه‌م شارو شارۆچكه‌كان كۆتایی هات و بووینه‌ خاوه‌نی حكومه‌ت و په‌رله‌مانی خۆمان.

هاووڵاتیانی خۆشه‌ویست...
ئه‌مڕۆ كه‌ 24 ساڵ تێپه‌ڕ ده‌بێ به‌سه‌ر راپه‌ڕین و ئازادكردنی شاره‌كانی كوردستان، گه‌له‌كه‌مان له‌ قۆناغێكی هه‌ستیارو دژواردایه‌و به‌ درێژایی سه‌دان كیلۆمه‌تر له‌گه‌ڵ دڕنده‌ترین رێكخراوی تیرۆرستی جیهان له‌ شه‌ڕداین و له‌ سایه‌ی پێشمه‌رگه‌ قاره‌مانه‌كانمان و به‌ هاوكاری هاوپه‌یمانان سه‌ركه‌وتنی گه‌وره‌مان به‌ده‌ستهێناوه‌و كوردستان ئارامه‌، بۆیه‌ ئه‌مڕۆ له‌ هه‌موو رۆژێك زیاتر پێویستمان به‌ ته‌بایی و یه‌كڕیزی نێوان لایه‌نه‌ سیاسییه‌كان هه‌یه‌و ده‌بێ هه‌موومان تێبكۆشین بۆ رزگاری یه‌كجاری و گه‌یشتنمان به‌ ئاواته‌ له‌مێژینه‌ییه‌كانمان و شادكردنی رۆحی ئه‌و شه‌هیدانه‌ی كه‌ له‌ پێناوی خاك و نیشتماندا خوێنیان به‌خشی.

كۆسره‌ت ره‌سوڵ عه‌لی
جێگری سه‌رۆكی هه‌رێمی كوردستان

PUKmedia  تایبه‌ت