چه‌ند سه‌ركرده‌یه‌كی داعش ده‌كوژرێن

چه‌ند سه‌ركرده‌یه‌كی بیانی داعش كوژراون

فڕۆكه‌ جه‌نگیه‌كانی عیراق دوو كاروانی ئۆتۆمبێله‌ سه‌ربازیه‌كانی داعش له‌ شاری قائمی رۆژئاوای پارێزگای ئه‌نبار ده‌كه‌نه‌ ئامانج و زیانی زۆر به‌تیرۆرستانی داعش ده‌گه‌یه‌نن و چه‌ند سه‌ركرده‌یه‌كی داعش كوژراون.

سه‌رچاوه‌یه‌ك له‌شاری قائم له‌رۆژئاوای رومادی به‌ PUKmedia ی راگه‌یاند: شه‌وی رابردوو 25/26-2-2015 فڕۆكه‌ جه‌نگیه‌كانی سوپای عیراق كاروانی ئۆتۆمبیله‌كانی داعشیان له‌سه‌ر رێگه‌ی موسڵ - قائم و كاروانێكی تریشیان  له‌ناوه‌ندی قه‌زای قائم كردوه‌ته‌ ئامانج.

سه‌رچاوه‌كه‌ وتیشی: به‌پێی ئه‌و زانیاریانه‌ی ده‌ستكه‌وتوون ژماره‌یه‌كی زۆر تیرۆرست كوژراون و حه‌وت ئۆتۆمبێلی سه‌ربازیش سوتێنراون.

سه‌رچاوه‌كه‌ ئه‌وه‌شی ئاشكراكرد: هه‌ریه‌ك له‌ والی فورات و چوار سه‌ركرده‌ی بیانی داعش له‌ناو كوژراوه‌كاندان .

ئاماژه‌ی به‌وه‌شدا: ماوه‌ی چه‌ند رۆژێكه‌ ئۆتۆمبیله‌ سه‌ربازیه‌كانی داعش هاتوچۆیه‌كی زۆر له‌نێوان شاری موسڵ و قه‌زای قائم ده‌كه‌ن و به‌پێی زانیاریه‌ سه‌ره‌تاییه‌كان گوایه‌ ئه‌بوبه‌كر به‌غدادی له‌و رێگه‌یه‌وه‌ چوبێته‌ ناو خاكی سوریاوه‌.

PUKmedia   سامان عه‌لی