دلێر محه‌مه‌د: ئاستی زانستی زانكۆی سلێمانی په‌ره‌پێده‌ده‌ین

ده‌بێت كار بۆ به‌رزكردنه‌وه‌ی ئاستی زانستی زانكۆكانمان بده‌ین

به‌مه‌به‌ستی هه‌ڵبژاردنی نوێنه‌ری مامۆستایان له‌ئه‌نجومه‌نی زانكۆی سلێمانی رۆژی  16-2-2015 به‌ئاماده‌بوونی دادوه‌ر له‌زانكۆی سلێمانی هه‌ڵبژاردنی نوێنه‌ری گشتی مامۆستایانی زانكۆی سلێمانی به‌ڕێوه‌چوو.

بۆ ئه‌و مه‌به‌سته‌ش سه‌ره‌تا هه‌شت كه‌س خۆیان كاندیدكرد، دواتر پێنج له‌كاندیده‌كان كشانه‌وه‌و ته‌نها پرۆفیسۆری یاریده‌ده‌ر دلێر محه‌مه‌د ساڵح و د. رزگار ساڵح و  د. خه‌سره‌و محێدین به‌شداریان له‌ كێبركێكه‌ كرد، له‌ئه‌نجامی هه‌ڵبژاردنه‌كه‌ پرۆفیسۆری یاریده‌ده‌ر دلێر محه‌مه‌د له‌به‌شی كیمیا سكوڵی زانستی فاكه‌ڵتی زانسته‌كان هه‌ڵبژێردرا.

له‌ دوای به‌ڕێوه‌چوونی پڕۆسه‌ی ده‌نگدان ‌و جیاكردنه‌وه‌ی ده‌نگه‌كان، ئه‌نجامه‌كان به‌م شێوه‌یه‌ بوون:

1- پرۆفیسۆری یاریده‌ده‌ر دلێر محه‌مه‌د - 290 ده‌نگ.

2- د. رزگار سالح- 230 ده‌نگ.

3- د. خه‌سره‌و محێدین- 55 ده‌نگ.

هه‌روه‌ها 24 ده‌نگیش به‌ تاڵ بوون.

هه‌ڵبژاردنه‌كه‌ له‌هه‌ردوو كه‌مپی كۆن‌ و نوێی زانكۆی سلێمانی له‌سه‌عات 9 ی به‌یانی 16-2-2015 ده‌ستیپێكردو، تاسه‌عات 2 ی پاش نیوه‌ڕۆی خایاند، به‌ به‌شداری 603 مامۆستا.

دلێر محمه‌د نوێنه‌ری گشتی مامۆستایانی زانكۆی سلێمانی له‌ئه‌نجومه‌نی زانكۆ له‌لێدوانێكی تایبه‌ت به‌ PUKmedia رایگه‌یاند: هه‌میشه‌ هه‌وڵ ئه‌ده‌م خزمه‌ت به‌ئاستی زانستی و ئه‌كادیمی زانكۆی سلێمانی بده‌م و نوێنه‌رایه‌تی راسته‌قینه‌ی مامۆستایانی زانكۆ ده‌بم.

وتیشی: زانكۆی سلێمانی پێگه‌یه‌كی تایبه‌تی هه‌یه‌ له‌یه‌كه‌ زانستییه‌كانی جیهان و ناوچه‌كه‌، بۆیه‌ ده‌بێ هه‌موومان هه‌وڵی په‌ره‌پێدانی ئاستی ئه‌كادیمی و زانستی ئه‌م زانكۆیه‌بین، منیش لای خۆمه‌وه‌ ئه‌و ئه‌ركه‌ی پێمان سپێردراوه‌و ئه‌و متمانه‌یه‌ی پێمان دراوه‌ هه‌میشه‌ پارێزه‌ری ده‌بم و له‌ئاست ئه‌و به‌رپرسیاریه‌تیه‌ ده‌بم.

نوێنه‌ری گشتی مامۆستایانی زانكۆی سلێمانی له‌ئه‌نجومه‌نی زانكۆ سوپاسی هه‌موو ئه‌ندامانی یه‌كێتیی نیشتمانیی كوردستانی كرد كه‌پاڵپشتی بوون له‌سه‌ركه‌وتنی له‌م هه‌ڵبژاردنه‌ له‌گه‌ڵ هه‌موو هاورێ و براده‌ران.

وتیشی: وه‌ك نوێنه‌ری گشتی مامۆستایانی زانكۆی سلێمانی ئه‌ركی سه‌رشانم دور له‌مۆركی حزبی له‌ناو زانكۆدا جێبه‌جیده‌كه‌م.

PUKmedia