سه‌لیم جبوری: سبه‌ینێ بودجه‌ په‌سه‌ند ده‌كرێت

لیژنه‌ی دارایی بۆ دواجار راپۆرته‌كه‌ی خۆی له‌سه‌ر بودجه‌ی 2015 ده‌خوێنێته‌وه‌

وابڕیاره‌ سبه‌ینێ پێنج شه‌ممه‌ دوایه‌مین كۆبونه‌وه‌ی ئه‌نجومه‌نی نوێنه‌رانی عیراق له‌سه‌ر تاوتوێكردنی پڕۆژه‌ یاسایی بودجه‌ی ساڵی 2015 ی عیراق به‌ڕێوه‌بچێت و لیژنه‌ی دارایش  بۆ دواجار راپۆرته‌كه‌ی بخوێنێته‌وه‌.

سه‌لیم جبوری سه‌رۆكی ئه‌نجومه‌نی نوێنه‌رانی عیراق له‌وباره‌یه‌وه‌ ئه‌مڕۆ له‌ چاوپێكه‌وتنێكی كه‌ناڵی ئاسمانی فورات نیوزدا رایگه‌یاندوه‌" سبه‌ینێ پێنج شه‌ممه‌ 29-1-2015 دوای پێشكه‌شكردنی راپۆرتی كۆتایی لیژنه‌ی دارایی له‌دانیشتنی ئاسایی  ئه‌نجومه‌نی نوێنه‌رانی عیراق له‌سه‌ر پڕۆژه‌ یاسای بودجه‌ی ساڵی 2015 و تاوتوێكردنی له‌لایه‌ن ئه‌ندامانی ئه‌نجومه‌نه‌كه‌وه‌ ده‌نگی له‌سه‌ر ده‌درێت.

جبوری له‌درێژه‌ی چاوپێكه‌وتنه‌كه‌دا ئاماژه‌ی به‌وه‌شدا " كێشه‌و به‌ربه‌سته‌كانی به‌رده‌م پڕۆژه‌ یاساكه‌ به‌شێوه‌یه‌كی گشتی چاره‌سه‌ركراون و ئومێدێكی زۆر باش هه‌یه‌ كه‌ سبه‌ینێ هه‌موو لایه‌ك له‌سه‌ری رێكبكه‌ون و په‌سه‌ندبكرێت.

PUKmedia  و/ سامان یاروه‌یس