نێچیر دگه‌رێن شێلی دا...!

زكی قبلان

نێچیر دگه‌رێن شێلی دا...!
به‌رسڤه‌ك بۆ رێناس جانو و رۆژناما ئه‌ڤرۆ

ئه‌ڤه‌ ده‌مه‌كه‌ چه‌ند كادر و كه‌ساتیێن پارتی دیموكراتی كوردستان و بتایبه‌تی ژی ئه‌ندام په‌رله‌مانێن عیراقێ و كوردستانێ ل سه‌ر لیستا زه‌ر, ل جهێ خزمه‌تكرنا خه‌لكی و بده‌ستڤه‌ئینانا ماف و بجه ئینانا وان ئه‌رك و سوزێن دبه‌رنامێ خۆیێ هه‌لبژاردنان دا داینه‌ خه‌لكێ ده‌نگ ژێرا دای, كارێ خۆ كریه‌ هێرش كرن و ناڤزراندن ل دژی ئێكه‌تی نیشتیمانی كوردستان. ب هه‌لكه‌فت و بێ هه‌لكه‌فت و بێی به‌لگه‌ و دوپاتكرن وه‌كی توبزێ ل كه‌ندالی د دیدار و داخۆیانیێن خۆدا ئێكه‌تی كریه‌ دسه‌متا ستێركا هێرشێن خۆدا.
دوماهی داهینان ژی دڤی واریدا, چه‌ند گوتنه‌كێن پرت و به‌لاڤ و بێ واتایێن به‌رێز رێناس جانوی بوون كو د رۆژناما ئه‌ڤرۆ ژماره‌ (1572) یا رۆژا چواڕشه‌مبی 12/1/2015 د لاپه‌رێ دوویێ دا ل ژێر مانشێتێ (ئێكه‌تی سیاسه‌ته‌كا دووریاتیێ بكار دئینیت) هاتینه‌ وه‌شاندن. هه‌لبه‌ت ئه‌ڤه‌ نه‌ ئێكه‌م جاره‌ رێناس جانو مینا ڤان جوره‌ گوتنا ل سه‌ر لاپه‌رێن هه‌مان رۆژنامه‌ و هنده‌ك كه‌نالێن دی یێن راگه‌هاندنێ ل دژی ئێكه‌تی نیشتیمانی به‌لاف دكه‌ت و به‌لگه‌ ژی ل به‌رده‌ست دزورن.
دڤێ خه‌له‌كێدا ژ زنجیره‌ دراما خویا بێ سیناریو, به‌رێز رێناس جانو دبێژیت: (پێدڤیه‌ مه‌كته‌با سیاسیا ئیكه‌تیێ هه‌لویستێ خوه‌ یێ فه‌رمی هه‌بیت) بێی كو دیار بكه‌ت كا ئێكه‌تیێ هه‌لویست ل هه‌مبه‌ر چ روودان, چ بویه‌ر, چ كریز هه‌بیت..!
رێزدار باشتر بوو ته‌ دیاركربا كا ته‌ هه‌لویستێ فه‌رمیێ ئێكه‌تیێ ل به‌رامبه‌ر چ دڤێت, دا خوانده‌ڤا د مه‌به‌ستا ته‌ گه‌هشتبا و زانیبا جه‌نابێ ته‌ به‌حسێ چ قه‌یران دكه‌ی و ئێكه‌تیێ هه‌لویست ل هه‌مبه‌ر وه‌رنه‌گرتبیت. ئان كو جارێ بزانه‌ تو چ دبێژی و پاشی داخوازا هه‌لویستی ژ ئێكه‌تیێ بكه‌. ئه‌گه‌ر نه‌, نا هێته‌ كرن هه‌لویستێن هه‌مه‌لایه‌نێن ئێكه‌تیێ دڤێ به‌رسڤێدا رێز بكه‌م. یان ژی بدیتنا جه‌نابێ ته‌ هه‌لویست تنێ ئه‌وه‌ سه‌ما ل به‌ر فیتیێن ده‌ره‌كی بهێته‌ كرن..؟
دگوتنه‌كا دیدا رێناس جانو دبێژیت: ( ئێكه‌تیا نیشتیمانی یا بێ خودانه‌ و دناف سه‌ركردایه‌تیا وێ دا دووبه‌ره‌كیه‌كا مه‌زن هه‌یه‌) جارێ به‌رێز هه‌ر كادره‌ك و ئه‌ندامه‌كێ ئێكه‌تیێ خودانیێ ل حزبا خۆ دكه‌ت و ل ده‌مێن پێدڤی ئه‌ڤ راستیه‌ سه‌لماندیه‌ و پێدڤی ب به‌لگه‌ و گروڤا ناكه‌ت. لێ پسیار ئه‌وه‌ ئه‌گه‌ر ئێكه‌تیێ خودان هه‌بیت یان نه‌بیت, ته‌ چ په‌یوه‌ندی ب ڤێ پرسێ ڤه‌ هه‌یه‌..؟ ئه‌ز دبێژم ئه‌ڤه‌ كریزه‌كا نافخویا ئێكه‌تیێ بخویه‌ و كارتێكرنێ ل چ كه‌س و لایه‌نه‌كی ناكه‌ت, دیسان ئه‌ز باوه‌ر ناكه‌م جه‌نابێ ته‌ ژ دل پێڤه‌بوون بو ئێكه‌تیێ ڤێ پرسێ دئازرینی, به‌لكو تنێ ڤه‌كرنا ده‌رگه‌هه‌كێ ناڤزراندنێ یه‌ و ڤه‌ژه‌نا هه‌سته‌كێ ده‌مارگیره‌ و دئه‌نجامدا تنێ دل ره‌قی و دووبه‌ره‌كی و تێكدان ژێ په‌یدا دبیت, و بدیتنا من كه‌سه‌كێ وه‌كی ته‌یێ په‌رله‌مانتار پێدڤیه‌ خه‌مخورێ ئێك رێزی و پاراستنا ئێكه‌تیا ناف مالا كوردی بیت.
دگوتنه‌كا دیدا به‌رێز رێناس جانو دبێژیت:(دووبه‌ره‌كیه‌كا مه‌زن ژ داخویانیێن وان دیار دبیت و ئه‌ڤه‌ وێ چه‌ندێ رادگه‌هینیت كو یا بێ سه‌ره‌)..!
به‌رێز ره‌نگه‌ هه‌تا نوكه‌ جه‌نابێ ته‌ نزانیت كو ئێكه‌تی نیشتیمانی یا ل سه‌ر بنه‌مایێ فره‌ه مینبه‌ری و ئازادیا راده‌ربرینێ هایته‌ ئاڤاكرن, دناف ئێكه‌تیێ دا ده‌ڤ دایێخستن نینه‌. لێ یا گرنگ بو ته‌ دیاركربا چ جوره‌ دووبه‌ره‌كی یه‌ تو به‌حس ژێ دكه‌ی و ل سه‌ر چ جوره‌ داخویانی و دنافبه‌را كێ دا..؟ چما تو كه‌سه‌كێ رۆژنامه‌ڤان و ره‌وشه‌نبیری و باش دزانی ئاخفتنا بێ به‌لگه‌ و بنه‌ما به‌رتێوه‌ركرنا تراشێ یه‌.
په‌رله‌مانتار رێناس جانو دبێژیت: (ئێكه‌تیا بێ سه‌ره‌)..! گه‌لو دێ پسیار كه‌ین لایه‌نه‌كێ بێ سه‌ر چه‌وا دشێت دپروسه‌كا هه‌لبژاردنان دا (21) كورسیێن په‌رله‌مانه‌كێ وه‌كیێ عیراقێ بده‌ستڤه‌ بینیت..؟ ئه‌رێ لایه‌نه‌كێ بێ سه‌ر دێ شێت به‌رهنگاریا دوژمنه‌كێ مینا رێكخستیا داعش كه‌ت و شكه‌ستنێ دهه‌می سه‌نگه‌ر و میحوه‌رێن خودا پێ ئینیت بێی كو ئێك بوهستا ئاخێ بو به‌رده‌ت..؟ ئێكه‌تیه‌كا بێ سه‌ر چه‌وا دێ ته‌ڤلی یاریێن سیاسیێن نافخویی و هه‌رێمایه‌تی بیت و هه‌فكێشێن وان یاریا دقازانجا خودا داكێشیت كو دئه‌نجامدا بو به‌رژه‌وه‌ندیا گه‌لێ كوردستانێ یه‌..؟ لێ دیسان دێ ڤێ پسیارێ ئاراسته‌ جه‌نابێ ته‌ كه‌م, ئه‌گه‌ر ئێكه‌تیا نیشتیمانی یا بسه‌ر بیت یان یا بێ سه‌ر بیت جه‌نابێ ته‌ چ په‌یوه‌ندی ب ڤێ پرسێ ڤه‌ هه‌یه‌..؟ ب راستی من پێ باشه‌ كه‌كێ رێناس به‌رسڤێ بده‌ت. به‌رێز وه‌كو په‌رله‌مانتاره‌ك ئه‌ركێن ته‌ دزور و دگرانن و باشتره‌ تو ل سه‌ر لاپه‌رێن رۆژناما بو خه‌لكی بده‌یه‌ خویاكرن كا هه‌تا نوكه‌ هه‌وه‌یێن نوینه‌ر ل به‌غدا چ بده‌ستڤه‌ ئینایه‌ و دماوێ مایێ خولا خودا هه‌وه‌ لبه‌ره‌ چ بكه‌ن و چ ده‌ستكه‌فت مسوگه‌ر بكه‌ن, نه‌ك كارێ خو بكه‌یه‌ دابه‌زین ل سه‌ر لایه‌نێن سیاسیێن كوردستانی و ئه‌ز باوه‌ر دكه‌م ئه‌ڤه‌ تنێ بوچونێن ته‌یێن كه‌سوكی نه‌, نه‌ ده‌ربرینه‌ ژ سیاسه‌تا فه‌رمیا پارتی دیموكراتی كوردستان, چما ئه‌م ڤان جوره‌ داخویانیێن دونكی شوتی دئورگانێن راگه‌هاندنا پارتیدا نا بهیسین و مه‌یزه‌ ناكه‌ین, و بو دووباره‌ بیرئینان رێككه‌فتنه‌كا ل سه‌ر ئاستێ مه‌كته‌بێن سیاسیێن پارتی و ئێكه‌تیێ هاتیه‌ واژوكرن كو رێ بو هیچ كه‌ناله‌كێ راگه‌هاندنێ و هیچ كادره‌كێ حزبیێ هه‌ردوولایه‌نا نه‌هێته‌ دان ناڤزراندنێ ب لایه‌نێ دی بكه‌ت. ئه‌فجا نزانم كا پێگیریا جه‌نابێ ته‌ ب بریار و پروتوكولێن حزبا ته‌ موركرین..؟
رێناس جانو د په‌ره‌گرافه‌كێ ئاخفتنێن خودا ل سه‌ر لاپه‌رێ دوویێ ژ رۆژناما ئه‌ڤرۆ ژماره‌ (1572) دبێژیت: (پێدڤیه‌ مه‌كته‌با سیاسیا ئێكه‌تی نیشتیمانی ب فه‌رمی بهێته‌ ده‌نگ و هه‌لویستێ وان یێ فه‌رمی بهێته‌ راگه‌هاندن و دیاركرن)..! دیسان دێ بێژم جه‌نابێ ته‌ دیار نه‌كریه‌ مه‌كته‌با سیاسی ل سه‌ر چ بابه‌ت بهێته‌ ده‌نگ و هه‌لویستێ فه‌رمی راگه‌هینیت..؟ پاشان خو ئه‌ندامێن مه‌كته‌با سیاسیا ئێكه‌تیێ فه‌رمانبه‌ر نینن ل به‌ر ده‌ستێ جه‌نابێ ته‌ كه‌نگی ته‌ خواست بریار و هه‌لویستا ده‌رببرن..! چاك بزانه‌ كه‌كێ رێناس هه‌رده‌مێ پێدڤی بوو و ل سه‌ر هه‌ر مژاره‌ك و كریزه‌كێ بیت, ئێكه‌تی دهێته‌ ده‌نگ و شه‌رم ژ هه‌لویستێن خو ناكه‌ت و هیچ حسابه‌كێ ژی بو كه‌سێ ناكه‌ت. چما ئێكه‌تی خودی دیروك و رابردوویه‌ك شه‌ره‌فمه‌ندانه‌یه‌ و هه‌لویست و كارڤه‌دانێن ئێكه‌تیێ ل هه‌مبه‌ر بویه‌را د دیار و به‌رچاڤن و دیروك لسه‌ر شاهده‌.
پاشان به‌رێز رێناس جانو دهێت و داخوازێ ژ سه‌ركردایه‌تیا كوردستانێ دكه‌ت ب فه‌رمی داخوازێ ژ ئێكه‌تیێ بكه‌ت دا هه‌لویستێ خو یێ فه‌رمی راگه‌هینیت..! ئه‌رێ به‌رێز دیاره‌ جه‌نابێ ته‌ فه‌رمانێ ل سه‌ركردایه‌تیا كوردستانی ژی دكه‌ت و ئه‌م نزانین..؟ كه‌واته‌ سه‌ركردایه‌تیا كوردستانی ژی یا خه‌تابار و بێ هه‌لویسته‌ ل هه‌مبه‌ر بێ هه‌لویستی یا ئێكه‌تیێ, پسیار ژی ئه‌وه‌ مه‌به‌ستا جه‌نابێ ته‌ كیژان سه‌ركردایه‌تیا كوردستانی یه‌..؟
ده‌رباری تومه‌تێن جه‌نابێ ته‌ به‌حس كرین, ب راستی نزانم چ تومه‌ت ل سه‌ر ئێكه‌تیێ هه‌نه‌..! باشتربوو ته‌ دیاركربان, ئه‌گه‌ر نه‌ ئه‌ڤا جه‌نابێ ته‌ دكه‌ت تنێ نێچیره‌ دگه‌رێن شێلی دا ژبو مه‌ره‌مه‌كێ (فی نفس یعقوب)..!
من وه‌ها بیردكر دقوناغا ته‌مه‌نێ خویێ په‌رله‌مانی دا كه‌كێ رێناس دێ ژبو نه‌هشتنا شاشی و كێماسیێن هه‌یی گراڤا پێك ئینیت, كه‌مپینا راگه‌هینیت, كارتێن گڤاشتنا بكار ئینیت, لێ جهێ داخێ یه‌ بشتی من چه‌ندین دیدار و نڤیسینێن به‌رێزی دیتین و بهیستین بو من خویا بوو كو رێناس جانو هه‌تا نوكه‌ ئه‌لیف بێتكێن سیاسه‌تێ فێهم نه‌كرینه‌, له‌ورا ئه‌ز داخوازێ ژ به‌رێزی دكه‌م لێزڤرینه‌كێ دبوچوون و بابه‌تێن خودا بكه‌ت و هه‌ول بده‌ت ببیته‌ ئالاڤ و فاكته‌رێ ئاڤاكرنێ, چما كه‌كێ رێناس ئه‌م هه‌می دزانین كو خرابكرن و هه‌رفاندن زور یا ئاسانه‌ و پالێن وێ ژی دمشه‌نه‌, لێ ئاڤاكرن یابزه‌حمه‌ته‌ و زه‌لامێن وێ دكێمن.
بو كه‌كێ رێناس دبێژم ئێدی ئه‌و سه‌رده‌مه‌ نه‌مایه‌ خه‌لكه‌ك ره‌ش و سپی ژێك ڤاڤێر نه‌كه‌ت, نه‌ هه‌ر رسته‌كا بریقه‌دار ل سه‌ر لاپه‌رێ رۆژنامه‌كێ بهێته‌ به‌لافكرن دێ سه‌ره‌نجا خه‌لكی راكێشیت.. نه‌خێر ئه‌ڤرۆكه‌ خه‌لك یێ بوویه‌ پیڤه‌ر و ب ژیری هه‌ر تشته‌كی دخوینیت و موخل و بێژینگ دكه‌ت و دترازیا به‌رژه‌وه‌ندا گشتی دا دهه‌لسه‌نگینیت. ئه‌فجا بو جه‌نابێ ته‌ پێشنیار دكه‌م سێ كوچكێ زه‌رده‌شتێ كال (هزرا قه‌نج, گوتنا قه‌نج, ره‌فتارا قه‌نج) ژخورا بكه‌ بیروكه‌ و په‌یره‌و بكه‌ و ده‌مێ خامێ خو هه‌لدگری چه‌ندین جار بیر بكه‌ كا دێ چ بێژی و دارێژی و بو كێ نڤێسی, و بزانی ئه‌گه‌ر خانیێ مروڤی ژ شوشه‌ی بیت پێدڤیه‌ به‌را دخانیێن خه‌لكی وه‌رنه‌كه‌ت. هه‌ر وه‌سا هیڤی دكه‌م و ئومێده‌وارم ئالیێن سیاسی و ده‌زگه‌هێن راگه‌هاندنێ ژی ئێدی ده‌لیڤێ نه‌ده‌نه‌ هزر و بابه‌تێن وێرانكار, چما ره‌وش و قوناغا ئه‌ڤرۆیا كوردستان تێدا ده‌رباز دبیت یا پێدڤی ئێك رێزی و گوتاره‌كا ئێك گرتیه‌ و ئه‌ف چه‌نده‌ ژی دێ ب بشته‌ڤانی و پالبشتیا په‌رله‌مانتاران هێته‌ دی ئه‌گه‌ر ب وه‌فاداری كار بكه‌ن كو ئه‌ڤرو خو ب نوینه‌رێن ڤی ملله‌تی دزانن.
خاله‌كا دی كو من دڤێت ل سه‌ر راوستم رۆژناما ئه‌ڤرۆ بخویه‌, كو لاپه‌رێن خو بو بابه‌تێن ناڤزراندنێ ڤه‌كرینه‌, لێ وه‌كو ره‌وشته‌كێ رۆژنامه‌گه‌ری ژی ئاماده‌ نینه‌ به‌رسڤا پێچه‌وانه‌ به‌لاف بكه‌ت. رۆژنامێ د ژمارا خویا (1502) ل 30/9/2014 و دلاپه‌رێ دوویێ دا دیسان دیداره‌ك دگه‌ل به‌رێز رێناس جانوی به‌لافكربوو و تێدا به‌رێزی راست و چه‌ب گورزێن كوره‌ داوه‌شاندبوونه‌ ئێكه‌تیێ, لێ ده‌ما هه‌ڤاله‌كێ ئێكه‌تی نیشتیمانی به‌رسڤا كاك رێناسی دای و خواست د رۆژناما ئه‌ڤرۆ دا به‌لاف ببیت و من بخو به‌رسڤ گه‌هاندبوو ده‌ستێ سكرتێرێ نڤیسینێ, هنده‌ك به‌هانه‌ گرتن و به‌رسڤ به‌لاف نه‌كر. دژمارا (1564) یا رۆژا 11/1/2015 دا رۆژناما ئه‌ڤرۆ دیداره‌ك دگه‌ل په‌رله‌مانتار عه‌ره‌فات كه‌ره‌م ئه‌نجام دابوو و تێدا ناف هاتی و ل گوره‌ی د رۆژنامێدا هاتیه‌ وه‌شاندن, ئێكه‌تی نیشتیمانی ب مه‌ترسیا مه‌زنا بشتی داعش ل سه‌ر كوردستانێ ل قه‌له‌م دابوو و چه‌ندین گوتنێن نه‌ ژهه‌ژی ئاراسته‌ی ئێكه‌تیێ و سه‌ركردێن وێ كربوون. دهژمارا (2714) یا رۆژا 14/1/2015 دا به‌رسڤا دیدارا عه‌ره‌فات كه‌ره‌م ژلایێ به‌رێز قادر حسن عیدو ڤه‌ هاته‌ دان و به‌لافكرن, لێ دهه‌مان ده‌مدا په‌ره‌مانتار عه‌ره‌فات كه‌ره‌م رونكرنه‌ك د مالپه‌رێ فه‌رمیێ پارتی دیموكراتی كوردستان دا به‌لاف كر و تێدا حاشاتی ل وان داخویانیا كر یێن رۆژناما ئه‌ڤرۆ لسه‌ر ناڤێ وی به‌لاف كرین. ژلایێ خوڤه‌ رۆژنامێ بێ ده‌نگی هه‌لبژارت,ئه‌فجا نه‌ هاته‌ زانین كا بدورستی ئه‌و گوتنه‌ یێن به‌رێز عه‌ره‌فاتی نه‌ یان گوتنێن وی هاتینه‌ ڤاژی كرن..؟ بدیتنا من پێدڤی بو رۆژناما ئه‌ڤرو راستیا وان گوتنا ب به‌لگه‌ دووپات كربا ئه‌گه‌ر نه‌ راستگویا وێ دیدارێ و ئه‌نجامده‌رێ وێ جهێ گومانێ نه‌.

زكی قبلان