موچه‌ی شه‌هیدان و ئه‌نفالكراوان و زیندانیانی سیاسی دابه‌شده‌كرێت

"نازانین سبه‌ینێ چ وه‌زاره‌تێك موچه‌ وه‌رده‌گرێت"

له‌ئێستا دابه‌شكردنی موچه‌ی مانگانه‌ی فه‌رمانبه‌رانی حكومه‌تی هه‌رێمی كوردستان یه‌كێكه‌ له‌ باسه‌ گرنگه‌كان به‌هۆی ئه‌وه‌ی له‌سه‌ره‌تای ساڵی تازه‌وه‌ موچه‌ دواده‌كه‌وێت، هه‌ربۆیه‌ رۆژانه‌ موچه‌ی هه‌ر وه‌زاره‌ت و ده‌سته‌یه‌ك دابه‌شبكرێت راگه‌یاندنه‌كان بڵاویده‌كه‌نه‌وه‌ بۆ ئه‌وه‌ی ئه‌و فه‌رمانبه‌رانه‌ی كه‌ چاوه‌ڕوانی موچه‌كانیان ده‌كه‌ن زانیارییان هه‌بێت.

بڕیاره‌ ئه‌مڕۆ 23-11-2014، موچه‌ی مانگی 9ی، شه‌هیدان و ئه‌نفالكراوان و زیندانیانی سیاسی، دابه‌شبكرێت.

له‌وباره‌یه‌وه‌ گه‌زیزه‌ محێدین جێگری به‌ڕێوه‌به‌ری بانكی هه‌رێم به‌ PUKmedia راگه‌یاند: ئه‌مڕۆ موچه‌ی شه‌هیدان و ئه‌نفالكراوان و زیندانیانی سیاسی، دابه‌شده‌كرێت.

سه‌باره‌ت به‌و وه‌زاره‌تانه‌ی كه‌ ماون ناوبراو وتی: هیچ لیستێك له‌به‌رده‌ستماندا نیه‌ بۆ ئه‌وه‌ی بزانین سبه‌ینێ موچه‌ی چ وه‌زاره‌تێك دابه‌شده‌كرێت.

جێی باسه‌ له‌سه‌ره‌تای ئه‌مساڵه‌وه‌ تا ئێستا به‌هۆی هه‌نارده‌كردنی نه‌وتی هه‌رێمی كوردستان كێشه‌ كه‌وتووه‌ته‌ نێوان حكومه‌تی هه‌رێم و به‌غدا.

به‌وهۆیه‌شه‌وه‌ حكومه‌تی به‌غدا به‌شه‌ بودجه‌ی هه‌رێمی كوردستان نانێرێت و  هه‌رچه‌نده‌ له‌ چه‌ند رۆژی رابردوودا رێككه‌وتنێك له‌ نێوان هه‌رێم و به‌غدا ئیمزا كرا به‌ڵام تائێستا به‌ته‌واوه‌تی نه‌گه‌یشتوونه‌ته‌ ئه‌نجام.

PUKmedia   هۆزان رۆسته‌م