هێڵه‌كانی ئینته‌رنێت دانیشتوانی پێنجوێنی نیگه‌ران كردووه‌

.

نزیكه‌ی 350 ئیمزا بۆ زیادكردنی خزمه‌تگوزاری ئینته‌رنێت له‌سنوری قه‌زای پێنجوێن كۆكراوه‌ته‌وه‌و چاوه‌رِێش ده‌كرێت له‌ئاینده‌یه‌كی نزیكدا، بدرێت به‌ نوسینگه‌ی سلێمانی په‌رله‌مانی كوردستان و به‌رِێوه‌به‌ری پۆسته‌و گه‌یاندنی پێنجوێنیش نیگه‌رانه‌ له‌بوونی ته‌نیا هێڵێكی ئینته‌رنێت له‌سنوره‌كه‌یاندا.

له‌و باره‌یه‌وه‌، كه‌مال محه‌مه‌د حسێن، له‌لێدوانێكی تایبه‌تدا بۆ PUKmedia  وتی: له‌پێنجوێن ته‌نیا هێڵێكی ئینته‌رنێت هه‌یه‌ كه‌له‌ڕێگه‌ی كۆمپانیای ئه‌لسه‌رده‌وه‌ له‌ئێرانه‌وه‌ هاتووه‌، پێشتریش زۆر هه‌وڵمانداوه‌ كه‌ هێڵێكیتۆیش بهێنن به‌ڵام تائێستا كاری بۆ نه‌كراوه‌.

رونیشیكرده‌وه‌: له‌كۆتایی هه‌فته‌ی رابردوودا بۆ ئه‌و مه‌به‌سته‌ له‌گه‌ڵ به‌رِێوه‌به‌ری یه‌كێك له‌ هێڵی ئینته‌رنێت، قسه‌مان كرد كه‌ له‌هه‌روه‌كو چۆن (سه‌یدسادق)و چه‌ند قه‌زایه‌كی تر كراوه‌ته‌وه‌ با لێره‌ش بكرێته‌وه‌، به‌ڵام ئه‌وان وتیان كه‌ ئه‌وه‌ كاتێكی زۆری ده‌وێت.

ناوبراو وتیشی: به‌داخه‌وه‌ له‌به‌رئه‌وه‌ی له‌پێنجوێن یه‌ك هێڵی ئینته‌رنێتی تێدایه‌و هیچ كێبرِكێییه‌ك نییه‌، بۆیه‌ دانیشتوانی ئه‌م شارۆچكه‌یه‌ زه‌ره‌رمه‌ندی یه‌كه‌من له‌ڕووی نرخه‌وه‌.
هاوكات ئاماژه‌ی به‌وه‌شكرد كه‌ له‌ساڵی 2006وه‌ هیچ پاره‌یه‌ك له‌لایه‌ن حكومه‌تی هه‌رێمه‌وه‌ به‌هۆی كۆنترِۆڵكردنی هێڵه‌كانی ئینته‌رنێت له‌لایه‌ن كۆمپانیاكان و كه‌رتی تایبه‌ته‌وه‌ بۆ ئه‌و بواره‌ خه‌رجنه‌كراوه‌.

راشیگه‌یاند: له‌ماوه‌ی رابردوودا 350 ئیمزا له‌لایه‌ن دانیشتوانی پێنجوێن كۆكراوه‌ته‌وه‌ تا به‌شێوه‌یه‌كی ره‌سمی به‌رپرسانی ئه‌و كۆمپانیایه‌ ئاگاداربكرێنه‌وه‌ له‌وه‌ی كه‌ هێڵه‌كه‌یان باشتر بكه‌ن و برِیاریشه‌ له‌ئاینده‌یه‌كی نزیكدا دوای كۆكردنه‌وه‌ی 500 ئیمزا بدرێت  به‌ نوسینگه‌ی سلێمانی په‌رله‌مانی كوردستان.

PUKmedia    رێبین حه‌سه‌ن  /  پێنجوێن