لەتیف شێخ عومەر: یـەكێتی‌و گــۆڕان ئیـرادەیان هەیە نــموونەیەكی جوانتر لەسلێمانی پێشكەش بكەن ‌

لەتیف شێخ عومەر

لەتیف شێخ عومەر، لێپرسراوی مەڵبەندی رێكخستنی سلێمانی، لەمیانی ئەم دیدارە رۆژنامەنووسیدا، چەندین پرسی گرنگ‌و هەنووكەیی دەوروژێنێت، بەتایبەت لەمەڕ پرسی دواكەوتنی دانانی پارێزگای سلێمانی‌و دوا هەوڵەكانی گفتوگۆی نێوان یەكێتی‌و گۆڕان، هەروەك رەخنەی ئەوەشی هەیە كە ئەوەی لەهەولێرو دهۆك كرا بۆ دابەشكردنی پۆستە گەورەكانی حكومەتی خۆجێیی، نەده‌بوو بەم شێوەیە بوایە، ئەمە جگە لەوەی مەسەله‌ی داعش‌و گفتوگۆی نێوان هەرێم‌و بەغداو پرسی نەوت، تەوەری تری دیدارەكە دەبێت.



 *وەكو دەزانین داعش گروپێكی تیرۆریستییەو لەکه‌مترین كاتدا چەندین شارو شارۆچكەیان لەسوریاو عیراق داگیركردو ئێستاش وەكو خۆیان دەڵێن، خەلافەتیان راگەیاندووە، چی لەپشتبوون‌و مانەوەی داعش دەخوێننەوە؟

ـ مێژووی داعش بەشێكە لەمێژووی توندڕەویی كە لەم ناوچەیەدا مێژوویەكی دوورودرێژی هەیە، رەنگە ئەگەر زۆر وردی بكەینەوە درێژەبكێشێت بۆ چەند سەد ساڵێك لەمەوبەریش، داعش لەخۆیەوە پەیدا نەبووە، بیروباوەڕو ئایدۆلۆژیای لەپشتەو مەرام‌و ئامانجی سیاسیی گەورەو زەبەلاحیشی بەدواوەیە، وردكردنەوەی ئەوەی كە تاچەند ئەم هێزە پەیوەندی هەیە بەئیسلامی سیاسییەوەیه‌و لەكوێی ئیسلامی سیاسیدایە، رەنگە ئیشی ئەم چاوپێكەوتنەمان نەبێت، بەڵام دەبێت ئەو راستیە بزانین كە ئەوان لەهەموو هەنگاوێكیاندا چ سیاسی بێت چ سەربازیی، بەپشتیوانیی سەرچاوە بنچینەكانی ئایدۆلۆژیای ئیسلامی كە قورئان‌و سوننەی نەبەویە هەڵسوكەوت دەكەن، ئەمە ئیشی بیرمەندەكانی ئیسلامەو هێزە ئیسلامییەكانە كە شوێنی داعش لەناو ئیسلامدا دیاری بكەن‌و ئەستۆپاكی خۆشیان رابگەیەنن، بەڵام لای ئێمە وەكو هاووڵاتی‌و وەكو میللەتێكیش كە قوربانی دەستی داعش‌و توندوتیژی ئەو جۆرە هێزە توندەڕوانەین، ئەوەی كە دەیبینین‌و دەیبستین، مامەڵە لەگەڵ ئەمە دەكەین، ئەمە لەلایەك، لەلایەكی ترەوە هیچ هێزێكی سیاسیی لەم ناوچەیەدا بەداعش‌و هاوشێوەكانی بەبێ‌ پشتیوانیی هێزی ئیقلیمی‌و هێزی نێودەوڵەتی وا بەپەلەو خێرایی تەشەنە ناكات‌و گەورەنابێت‌و بەم شێوەیە بەهێز نابن، بۆیە بەبێگومان پشتیوانیان هەیە.
*مەبەستت لە پشتیوانیی ئیقلیمی و نێودەوڵەتی چییە، ئەی ئەوە نییە هاپەیمانێتیەكی نێودەوڵەتی لەدژی داعش دروستبووە؟
ــ رەنگە یەك هێز نەبووبێت لەناوچەكەدا که‌ پشتیوانیی داعشی كردبێت، چ لەدروستبوونیان چ لەگەشەكردنیاندا هێزێك بێت‌و لەنیوەی رێگا گەڕابێتەوەو هێزێك بێت ئامانجێكی دیاریكراوی پێیان بێت، جا ئامانجەکه‌ بەدیهاتبێ یان شكستی هێنابێ، بەڵام ئەوەی كە جێگیرە ئەوەیە كە هێزی گەورەی ناوچەیی‌و نێودەوڵەتی لەپشتیانەوە بووە لەدروستبوون‌و لەگەشەكردنیاندا، ئەو هاوپەیمانێتییە نێودەوڵەتیەی ئێستاش لەدژیان دروستبووە، دوای ئاشكرابوونی مەرامە سەرەكییەكانی داعش دێت‌و دوای ئەم هاوپەیمانێـتیە روون نییە چەند هێز پاشەكشەی كردووە لەپشتیوانی كردنیان‌و چەند لەگەڵیان ماون، ئەمە بابەتێكی ترە، بەڵام تا ئێستاشی لەگەڵ بێت چ بەنهێنی‌و چ بەئاشكرا پشتیوانیان هەیە لەدەوروبەرەوە. بۆ ئێمەی خەڵكی كوردستان، ئەوەی كە گرنگە ئەوەیە داعش خستینیە بەردەم قۆناغێكی تازە لەوەی یەكەم كە بزانین كوردستان بۆ ماوەیەكی دورودرێژی تریش چ وەكو پڕۆژەی سەربەخۆیی، چ وەك پڕۆژەی جێبەجێكردنی مافی چارەنووس، مەترسیی گەورەی لەسەرە. ئەو دروشمانەی یەكێتیش راست دەرچوو كە هەردەم دەمانوت مەترسییەكان لەسەر كوردستان كۆتایی نەهاتووە، پێویستمان بەوەیە یەك دەنگ‌و یەك گوتاربین‌و خۆمان كۆبكەینەوە، بۆیە دەبێت میللەتەكەمان هۆشیاربكەینەوەو گەنجەكانمان ئامادەبكەین‌و مقەوماتی سەربازیی‌و سیاسیی بۆ رووبەڕووبوونەوەی مەترسییەكان دروستبكەین.
مه‌ترسییه‌کان به‌رده‌وام ده‌بن
* بەپێی ئەو بۆچوونی ئێوە بێت، ئەگەر شەڕی داعشیش كۆتایی بێت، مەترسییەكانی سەر هەرێمی كوردستان هەر بەردەوام دەبێت؟
ــ من پێموایە تاكو پڕۆژەو خەونی سەربەخۆیی كوردستان هەبێ‌و بەردەوام بێت‌و خەڵكی كوردستان دڵی بۆی لێبدات، مەترسییەكان بەردەوام دەبن‌و دەبێت بەشێك لەخۆئامادەكردن بۆ پرسی چارەنووس، دەبێت خۆئامادەكردن بێت بۆ مەترسییەكانی دوای ئەم.
*ئەی مەسەلەی سوپای عیراق چی لەسەر دەڵێن، بەتایبەت كە داعش وەكو دەڵێن شكۆو سەروەری سوپاكەی نەهێشت‌و لەبەر‌یەكی هەڵوەشاندوە، ئەی لە 2003ەوە حكومەتی عیراق چی كردووە كە نەیتوانیوە سوپایەكی یەكگرتوو و تۆكمە دروست بكات؟
ــ لەهەموو وڵاتێكدا ئەوە پڕەنسیپە، كە سوپا بەشێك نەبوو لەپێكهاتەی نیشتمانیی ئەو وڵاتە، ئامادەنەكرابوو بۆ بەرگریكردن لەوڵاتەكە، یەكەم لەڕووی بیروباوەڕەوە، دووەمیش لەڕووی مەشق‌و پێداویستی‌و كەرەستەی سەربازییەوە، بێگومان شكست دێنێت، سوپای عیراق سوپای خەڵكی هەموو عیراق نەبوو، بەهەموو پێكهاتەكانی گوزارشتی نەكردبوو لەبۆچوونی هەموو لایەك، تاكو هەموو لایەكیش بپارێزێت، دیارە ئەو جەنگە تائیفیەی كە هەبووە لەعیراقدا لەناو سوپاكەشدا رەنگی داوەتەوە، وایكردوە ئەم سوپایە هێندە توندوتۆڵ نەبێت لەوەی خۆی بگرێت لەبەرامبەر رووبەڕوونەوەو هێرشەكانی داعشدا، دیارە لەڕووی مەشق‌و خۆئامادەكردنیشەوە دەركەوت كە ئامادەنەبوون‌و نەیانتوانی ئەو ئەركەی كە پێیان سپێردراوە جێبەجێی بكەن‌و لەیەكەم هەنگاویاندا نەوەك هەر نەیانتوانی بەرگری بكەن، بەڵكو تێكشكان‌و ئەمەش لەمێژووی سوپای وڵاتاندا وێنەی نەبووە، چونكە دەكرێت سوپایەك لەشەڕێكدا شكست بێنێت، نەك هەڵوەشێتەوە، ئەوەی عیراقیش وابوو، هێشتا مەترسیی نەگەیشتبۆوه‌ سه‌ر‌ لەبەریەك هەڵوەشایەوە، ئەمەش پێشینەیەكی زۆر سەیرەو پێویستی بەدیراسەكردن هەیە. ئەمەش ئەوە دەسەلمێنێت كە دیارە ئەو دەنگۆیانەی لەعیراق هەیە لەبواری گەندەڵی لەهەموو كایەكاندا، دامەزراوە سەربازییەكانی ئەو وڵاتەشی گرتۆتەوە، ئەگینا ئەمەی روویدا ئاسایی نەبوو.
* به‌بۆچوونی تۆ ئایا بەم سوپا هەڵوەشاوەی كە ئاماژەتان بۆ كرد، كەی‌و چۆن عیراقییەكان دەتوانن داعش تێکبشکێنن‌و رووبه‌ڕوویان ببنه‌وه‌؟ بەتایبەت كە هێزەكانی ئەمریكاو هاوپەیمانەكانی بەردەوامن لەگورزی ئاسمانی بۆ سەر داعش؟.
ــ ئەو پلانەی كە هاوپەیمانن دایانناوە بۆ لەناوبردنی داعش، ئەوەیە كە ئەوان لەئاسمانەوە هێرش بكەن‌و سوپای عیراق‌و پێشمەرگە لەسەر زەمین هێرش بكەن، ئەوەی پەیوەستە بەپێشمەرگەوە، زۆر بەسەركەوتوویی ئەنجامی داوەو سەركەوتنی زۆری بەدەستهێناوە، تەنانەت بەپێوەرەكانی ئەوانیش هەر وایە، بۆ عیراقیش هیچ ئەگەرێكی تری لەبەردەم نییە، تەنیا ئەوە نەبێـت كە بەزووترین كات سوپایەكی نیشتمانیی دروستبكات، چونكە هیچ هێزێكی سەربازیی تر ناتوانێت ئەركەكانی سوپایەكی نیشتمانیی عیراقیی جێبەجێبكات، ئەوە ئیشی عیراقییەكانە كە بەزووترین كات خۆیان رێكبخەنەوەو لەڕێگەی ئەو پشتیوانییە نێودەوڵەتییەی كە هەیە بۆ چەكداركردن‌و بۆ مەشقپێكردنیان دەبێت خۆیان بگرنەوە، ئێستا لەهەنگاوی یەكەمیدا، لانی كەم سوپای عیراق توانیویەتی بەهاوكاری هێزەكانی پێشمەرگە لەو شوێنانەشی كە لەدەرەوەی ماددەی 140یشن، توانیویەتی بەر بە تەشەنەسەندن‌و پێشەوەچوونی داعش بگرێت، ئەمە زۆر گرنگە، چونكە لەهەندێك شوێن پێشڕەویان كردووەو چوونەتە پێش، لەڕووی مەعنەویشەوە بۆ سوپای عیراق گرنگە، كە بیكاتە سەرەتایەك بۆ خۆ رێكخستنەوەی سوپاكەی. كە دیارە پڕۆژەی تریش هەیە بۆ رێكخستنەوەو سوودوەرگرتن لەهێزە عەشایەرەكانی ناوچە رەنگە ئەمەش لەپڕۆژەیەكی نیشتمانیدا كۆبكرێتەوەو ببێتە پشتیوانیەكی باش بۆ سوپای عیراق.
تێکه‌ڵکردنی ستراتیژه‌کان تووشی کێشه‌مان ده‌کات
*تەوەرێكی تر كە دەمەوێت لەگەڵ ئێوە قسەی لەسەر بكەم، كێشەی نێوان هەرێم‌و بەغدایە، ئەم مەسەلەیە چۆن دەبینی، بەتایبەت كە ئێستا رێككەوتنێكی سەرەتایی لەهەولێر لەنێوان بەغداو هەرێم واژۆ كراوە؟
ــ لەگەڵ ئەوەی كە رێككەوتنەكە زۆر روون نییە بۆ هەمووان، بەڵام باشترین سەرەتایە لەدوو ساڵی دوایدا كە لەنێوان هەرێم‌و بەغدا روویدابێت، هەروەك دەكرێت بكرێتە سەرەتایەكی باش بۆ گەشەپێدان، بەڵام بابەتە سەرەكییەكەی پشت ئەمە ئەوەیە كە بەشەكەی ئێمە وەكو كورد وەكو هەرێمی كوردستان دەبێت هەڵبژاردەو بەدیلەكان زۆر روون بێت، كە دیارە بۆ یەكێتیی نیشتمانیی كوردستان تاڕادەیەكی زۆر ئەمە وابوو، تا ئەو شوێنەی ئێمە دەمانەوێت لەگەڵ عیراق بمێنینەوەو بەشێك بین لەو سیستمە فیدڕاڵیەی لەعیراقدا هه‌یه‌، دەبێت بەمەنتیقی ئەو سیستمە ئیش بكەین‌و هەڵسوكەوت بكەین، لەو شوێنەوە كە ئیتر نیازێكی ترو مەرامێكی ترمان هەیە، دەمانەوێت بەدیلێكی تر هەڵبژێرین، ئەگەر پێداویستییەكان ئامادەیەو خۆمان تەیار كردووە بەپێداویستییەكانی، دەتوانین رێگایەكی تر هەڵبژێرین، بەڵام تێكەڵكردنی ئەم دوو ستراتیژیەتەو ناڕۆشنی لەنێوان ئەم دوو ستراتیژیەتە، دەمانخاتە بەردەم ئاستەنگی گەورە كە رەنگە بەشێكی لەوەی روویدا، ئەوەندەی كە پەیوەندی بەئێمەوە هەیە ئەنجامی ئەمە بووبێت، من لەمەدا نامەوێت پاكانە بۆ سیاسەتەكانی حكومەتی عیراقی بكەم، هەمووشمان ئەوە دەزانین كە ئەو سیاسەتانە هەموو سیاسەتی عەقڵیەتی داگیركاری پێشوو بووە لەعیراق، بەڵام لەگەڵ ئەمانەش قسەكردن لەهەڵەكانی خۆمان بەمانای پەردەپۆشی بۆ هەڵەو مەرامەكانی ئەوان نییە، بەڵام ئێمە پێویستمان بەوەیە بەستراتیژو سیاسەتەكانی خۆماندا بچینەوەو لەو شوێنانەی كە گلەییمان لێی هەیە قسەی دیاریكراو بكەین، بۆ ئەوەی دووبارەی نەكەینەوە، ئێستا ئێمە لەگەڵ حكومەتی ناوەندا لەسەرەتایەكی تازەین‌و درەنگیش نییە بۆ ئەوەی كە بەڕوونیی مامەڵە لەگەڵ ئەم وەزعەدا بكەین، ئەگەر ئێمە ئێستا ئامادەنین بۆ بەدیلێكی تر كە سەربەخۆیی یان ریفراندۆمە، دەبێـت توند دەستبگرین بە بەدیلی یەكەمەوە كە ئەویش لەو چوارچێوەیەدا كە ئێمەو ناوەند لەو مەنزومەیەدا بەیەكەوە دەبەستێتەوە. چونكە ناكرێت لەلایەك بەشێك بین لەعیراق، لەلایەكی تریش بەشێك بین لەستراتیژی سەربەخۆیی، دەبێت ئەم دوو قۆناغە لەیەك جیابكرێنەوەو هیچ هەڵەیەكی تێدا نییە، ئەگەر ئێمە لەڕووی سیاسی‌و ئابووری‌و هۆشیاریی‌و جەماوەرییەوه‌ ئامادەین بۆ ئەوەی سەربەخۆیی رابگەیەنین كە مافێكی لێبڕاوانەی خۆمانە، ئەگەر ئامادەنین دەبێت ئەو شێوازی پەیوەندیەمان لەگەڵ عیراق بكەینە بەشێك لە خۆئامادەكردن بۆ قۆناغێكی دوای ئەمه‌، بەڵام تێكەڵكردن لەنێوان ئەو دوو ستراتیژە تووشی هەڵەیەكی گەورەمان دەكات.
* بێگومان، سەرهەڵدانی كێشەكە بەپلەی یەكەم لەسەر مەسەلەی نەوت‌و گازە، تۆ ئەم مەسەلەیە چۆن دەبینی، چونكە هەردوولایان چ هەرێمی كوردستان‌و چ حكومەتی بەغدا دەڵێن ئێمە بەپێی دەستوور مامەڵە دەكەین؟
ــ كێشەی نەوت‌و گاز، كێشەیەكی زۆر ئاڵۆزە، لەبەر ئەوەی لەعیراقدا هێشتا یاسای نەوت‌و گاز دەرنەچووە، لەدەستوور بڕگەیەك هەیە ئەم مەسەلەیەی روونكردۆتەوە، بەڵام ئەم بڕگەیەش بایی ئەوەندە ناڕۆشنە كە تەفسیرو لێكدانەوەی جیای بۆ بكرێت، هەم خەڵكی كوردستان‌و حكومەتی كوردستان تەفسیرێكی بۆ بكات، هەم حكومەتی عیراق تەفسیرێكی تری بۆ بكات، رەنگە جیاكردنەوەی ئەوەی كە كاممان هەنگاوی دەستووریمان ناوە، كاممان نادەستووری، ئیشێكی زۆر زەحمەتە، بەڵام تا ئەو شوێنەی حكومەتی هەرێم هەوڵیدابێت، بۆ ئەوەی سیاسەتێكی نەوتی، لەبەرژەوەندی خەڵكی كوردستان جێبەجێبكات، بەو مەرجەی كە لەگەڵ دەستووری عیراق نەگونجاو نەبێت‌و ئەو پردانە بێڵێتەوە، كە ئێمەو بەغدا بەیەكەوە دەبەستێتەوەو وامان لێنەكات كە هەموو پردەكانی نێوانمان بپچڕێت، لەكاتێكدا ئێمە بۆمان دەركەوت كە ئامادەنین لەئێستادا بۆ سەربەخۆیی‌و بانگەوازی سەربەخۆیی، دەبێت حكومەتی هەرێم ئاگای لەمە بێت‌و ئاگاشی لێبوایە، چونكە ئێمە پێویستمان بەوەیە دیسانەوە تا ئەو شوێنەی دەمانەوێت لەگەڵ عیراق بمێنینەوە، دەبێت هۆكارەكانی مانەوە پەرەپێبدەین، لەشوێنێك بڕیارماندا نەمێنینەوە، ئەو كات بڕیارێكی تر دەدەین.
ده‌رگا بۆ چاره‌سه‌رکردنی کێشه‌کان کراوه‌ته‌وه‌
* ئەگەر بچمە سەر دوا تەوەری دیدارەكەمان، ئەویش مەسەلەی دواكەوتن‌و دانانی پارێزگای سلێمانی‌و سەرۆكی ئەنجومەنی پارێزگایە، بەتایبەت كە چەندینجار كۆبوونەوەكان دواخراوە، ئێوەش ئەندامێكی وەفدی دانوستكاری یەكێتین لەو بۆ ئه‌و مه‌سه‌له‌یه‌، نێوانی ئێوەو گۆڕان لەسەر ئەم مەسەله‌یه‌ به‌کوێ گه‌یشتووه‌‌؟
ــ ئەوەی كە من ئێستا لێی تێگەیشتووم‌و دوای بڕیارو دەستپێشخەرییەكەی مەكتەبی سیاسییی یەكێتی‌و پێشوازییە گەرمەكەی گۆڕانیش لێی‌و دانیشتنی یەكەم كە لەماڵی بەڕێز مام جەلال بەڕێوەچوو، ئێستا دەرگای گەورەكراوەتەوە بۆ چارەسەركردنێكی جیاوازی كێشەكانی پارێزگارو هەموو ئەو كێشانەی كە لەنێوان ئێمەو گۆڕاندایە، دیارە كە لەمەكتەبی سیاسیی بڕیاردراوە پەیوەندییەكان ئاسایی بكرێتەوە، ئەوەش دەزانین كە ئاساییكردنەوە باجی خۆی هەیەو دەبێت هەردوولامان ئەو باجە بدەین، تا پەیوەندییەكانمان ئاسایی بكەینەوە، لەبەر ئەوە ئێستا لەهەموو كاتێك زیاتر لەو شەش مانگەی رابردوو، دەرفەتەكانی لێكگەیشتن‌و پێگەیشتن‌و چارەسەركردنی كێشەی پارێزگای سلێمانی لەبەردەماندایە. لای خۆم  ئێستا كە سەیری دەكەم، زۆر ئاسانترە وەكو لەپێش دانیشتنەكانی نێوان یەكێتی‌و گۆڕان لەماڵی بەڕێز مام جەلال دا، چونكە ئەوەی من دەیبینم هەردوولامان ئیرادەی ئەوەمان تێدایە كە بەزووترین كات‌و بەو نموونەیەی كە هەموو لایەك رازی بن پێی‌و بەو پەیمانەی بەخەڵكی كوردستان‌و خەڵكی سلێمانیمان دا، که‌ دەمانەوێت نموونەیەكی جوانتر لەسلێمانی جێبەجێ بكەین، كە بنچینەكەی بەشداریكردن‌و رازیكردنی هەمووان بێت، لێرە جێبەجێی بكەین، من نامەوێت بچمە سەر وردەكارییەكەی. دەتوانم ئەوەندە بڵێم كە پەیوەندییەكانمان لەسەر ئەو مەسەلەیە بەگەرمی بەردەوامە، چاوەڕێی ئەوەی لێدەكەین لەماوەیەكی زوودا بگەینە ئەنجام.
* ئەوەندەی ئێمە ئاگادارین داواكاری گشتی‌و دادگاش چیتر لەسەر ئەم دواخستنە رازی نین، بۆیە دەبێت ئێوەش مژدەیەك بدەنە خەڵكی سلێمانی‌و بگەنە رێككەوتن؟
ــ ئەو بڕیارەی دادگاو هەموو ئه‌و بڕیارانه‌ی كە پەیوەندیان بەیاساوە هەیە من ناچمە سەری‌و ئیشی من نییە، بەڵكو ئیشی ئەنجومه‌نی پارێزگا خۆیەتی، بەڵام بەهەموو حوكمێك ئەنجومەنی پارێزگا وەختی ئەوەی هاتووە یەكلابكرێتەوەو هەمووشمان بەشداربین لەچارەسەركردنیدا.
ده‌مانه‌وێت له‌سلێمانی نموونه‌یه‌کی جیاواز بین
* مەسەلەیەكی تر كە جێگای پرسیارە، ئەو شێوە دانانەی پارێزگارو سەرۆكی ئەنجومەنی پارێزگاو پۆستە باڵاكانی شارەكانی هەولێرو دهۆكە، كە پارتی هەمووی بەخێرایی بۆخۆی یەكلاكردەوە، كەچی یەكێتی كە هێزی دووەمەو یان لایەنەكانی تر تا ئێستا هیچ پۆستێكیان نییە، ئەمە لەكاتێكدایە بەپێی زانیاری ئێمە لەپارێزگای هەڵەبجە یەكێتی براوەی یەكەمە، كەچی بەقەد خۆی كورسی داوە بەپارتی‌و گۆڕانیش بەهەمان شێوە، ئەمە چۆنە؟
ــ راستیەكەی ئەوەیە كە ئێمە هەر لەیەكەم رۆژەوە هەموو هێزە سیاسییەكان لەپێشیانەوەش یەكێتی، وتمان دەمانەوێت نموونەیەكی جیاوازو جوان لەئەنجومەنی پارێزگای سلێمانی پێشكەشبكەین، راستە دواكەوتنەكەی بوو بە لەكەیەك بەسیاسەتی هەموومانەوە، بەڵام لەگەڵ ئەوەشدا ئەگەر هەرلایەكمان، بەتایبەت یەكێتی ئەگەر بمانویستایە وەكو هەولێرو دهۆك كۆتایی پێبێنین‌و یەكلایی بكەینەوە، ئەمە دەمانتوانی بەزووترین كات بیكەین، رەنگە بۆ یەكێتی ئیشێكی زۆر زەحمەت نەبووبێت كە زۆرینە دروستبكات، بەڵام ئێمە لەیەكەم رۆژەوە وتمان رێگای دروستكردنی17 كورسی‌و پەنجا زائید یەك، نموونە تازەكە نییە لەكوردستان، بەڵكو ئێمە دەمانەوێت گۆڕان‌و هەموو لایەنەكانی تر بەشداربن لەحوكمڕانی خۆجێی سلێمانی، تاكو نموونەیەكی جیاواز پێشكەشبكەین، ئەوەی روویداوە لەدانانی پارێزگاو سەرۆكی ئەنجومەنی پارێزگای هەولێرو دهۆك دڵخوازی ئێمە نییەو یەكێتی لەگەڵ ئەوە نییە ئەمە دووبارە بكاتەوە لەسلێمانی‌و هەڵەبجە، بەكاردانەوەش نایكەین، چونكە وەكو حاڵمان وایە لەهەولێرو دهۆك، كەچی وەكو خۆت وتت لەهەڵەبجە بەپێی ئەو رێككەوتنە سەرەتاییەی كە كراوە چانسێكی گەورەیان داوە بەپارتی، لەسلێمانیش ئێمە بەشێوەیە رەفتار دەكەین‌و لەگەڵ ئەمەش دەمانەوێت پەیامێك بدەین بەبرایانمان لەهەولێرو دهۆك كە هەڵبژاردن بۆ ئەوە دەكرێت كە ئەنجامەكانی لەحوكمڕانیدا دەركەوێت، لەوێ‌ ئەو ئەنجامانە ئیشی پێنەكراوە، ئەوەی بۆ سلێمانی حساب دەكرێت وەكو لەكە بۆ دواكەوتن، زۆر باشترە لەوەی كە بەو رێگایەی هەولێرو دهۆك چارەسەربكرێت، دوا كەوتین، بەڵام دەمانەوێت نموونەیەكی جوانترو جیاوازتر پێشكەشبكەین، خەڵكی سلێمانیش دەنگی داوە بەهێزی جیاجیا هەقی خۆیەتی نوێنەرەكانی خۆی ببینێت لەئەنجومەنی پارێزگا كە كاران‌و دەسەڵاتیان هەیەو پۆستە گرنگەكان لەسەر بنچینەی ئەم نوێنەرایەتییە دابەشبكرێت. دیارە ئەمەش بۆ هەولێرو دهۆكیش هەر راستەو ئێمە ئەو پەڕی هەوڵی خۆمان دەدەین كە قەناعەت بەبرایانمان لەپارتی بكەین كە دەبێ‌ وابكەن‌و پێویستە وابكەن.

PUKmedia  له‌ كوردستانی نوێ-ه‌وه‌