وەفدەکەی یەکێتی لەگەڵ کوتلەی ئەحرار کۆبۆوە

سەرجەم هێزە کوردستانیەکان یەک هەڵوێست بووین سەبارەت بە بەشداریکردنمان لە حکومەت"

له‌چوارچێوه‌ی دیدارو كۆبوونه‌وه‌كانیدا له‌شاری به‌غدا، وه‌فده‌ باڵاكه‌ی یه‌كێتیی نیشتمانیی كوردستان ئێواره‌ی ئه‌مڕۆ 31/10/2014 له‌گه‌ڵ كوتله‌ی ئه‌حراری سه‌ر به‌ڕه‌وتی سه‌در كۆبۆوه‌.

دوابه‌دوای ئه‌وه‌ی وه‌فده‌ باڵاكه‌ی یه‌كێتی كه‌پێكهاتبوون له‌ مه‌لا به‌ختیار لێپرسراوی ده‌سته‌ی كارگێڕی و عومه‌ر فه‌تاح ئه‌ندامی ده‌سته‌ی كارگێڕی و رزگار عه‌لی ئه‌ندامی مه‌كته‌بی سیاسی و د.خه‌سره‌و گوڵ محه‌مه‌د له‌باره‌گای مه‌كته‌بی سیاسی كوتله‌ی ئه‌حرار له‌لایه‌ن د.نه‌سار روبه‌یعی ئه‌ندامی مه‌كته‌بی سیاسی و ئه‌میر كه‌نانی و جواد جه‌بوری و ژماره‌یه‌ك له‌په‌رله‌مانتارانی سه‌ر به‌كوتله‌ی سه‌در پێشوازیكران، له‌كۆبوونه‌وه‌یه‌كیشدا بیروڕای پێویست سه‌باره‌ت به‌ڕه‌وشی ئێستای عیراق و دواگۆڕانكارییه‌كان و  چۆنێتی چاره‌سه‌ركردنی كێشه‌ سیاسی و ئابوری و چۆنێتی به‌ره‌نگاربوونه‌وه‌ی تیرۆرو مه‌ترسییه‌كانی داعش ئاڵوگۆڕ كرا.

له‌سه‌ره‌تای كۆبوونه‌وه‌كه‌دا مه‌لا به‌ختیار لێپرسراوی ده‌سته‌ی كارگێڕی ئاماژه‌ی بۆ كۆی ئه‌و كێشانه‌ كرد كه‌ له‌دوای رژێمی به‌عسه‌وه‌ له‌عیراقدا كه‌ڵه‌بوون و له‌و رووه‌شه‌وه‌ خوێندنه‌وه‌ی بۆ ئه‌و بارودۆخه‌ كرد كه‌ ئێستای عیراق و ناوچه‌كه‌و كوردستانیشی پێدا تێده‌په‌ڕێت و دووپاتیكرده‌وه‌ كه‌چاره‌سه‌رنه‌كردنی كێشه‌كان له‌عیراقدا له‌به‌رژه‌وه‌ندی دژومنه‌كانماندایه‌و دوپاتیشیكرده‌وه‌: وه‌كو كورد به‌گشتی هه‌روه‌ها یه‌كێتی به‌لامانه‌وه‌ گرنگه‌ په‌ند له‌ئه‌زموونی رابردوو وه‌ربگرین و وه‌ك هه‌میشه‌ به‌شێكین له‌چاره‌سه‌رو پابه‌ندین به‌ده‌ستوره‌وه‌.

 مه‌لا به‌ختیار رونكردنه‌وه‌ی پێویستیشی سه‌باره‌ت به‌كۆی هه‌ڵه‌كانی حوكمداری له‌عیراقدا كرد كه‌ وایكرد كاریگه‌ری ناته‌ندروست له‌سه‌ر په‌یوه‌ندییه‌كانی نێوان هه‌رێمی كوردستان و به‌غدا دروست بكات و به‌گرنگیشی زانی كه‌ په‌یوه‌ندییه‌كان بچنه‌وه‌ دۆخی ئاسایی و پێویستی خۆیان و  ئومێدیشی خواست كه‌ ئه‌و مه‌ترسیانه‌ی روبه‌ڕوومان بۆته‌وه‌ پاڵنه‌رو هانده‌رمان بێت بۆ ئه‌وه‌ی به‌زوویی چاره‌سه‌ری كێشه‌كان بكه‌ین.

 وتیشی: وه‌ك هێزو لایه‌نه‌ سیاسییه‌كانی كوردستان خاوه‌ن یه‌ك بڕیارو هه‌ڵوێست بوین سه‌باره‌ت به‌ به‌شداربوونمان له‌حكومه‌ت و خۆمان به‌ به‌شێكیش له‌چاره‌سه‌ر ده‌زانین.

 راشیگه‌یاند: چاوه‌ڕێی ئه‌وه‌ش له‌ره‌وتی سه‌درو سه‌رجه‌م هێزو لایه‌نه‌ كانی عیراق ده‌كه‌ین كه‌ چ له‌په‌رله‌مان و چ له‌حكومه‌ت پێكه‌وه‌ ده‌رفه‌ته‌كه‌ له‌پێناو چاره‌سه‌ركردنی كێشه‌كاندا بقۆزینه‌وه‌.

 له‌كۆتایی وته‌كانیشدا مه‌لا به‌ختیار ئاماژه‌ی به‌سه‌رهه‌ڵدان و مه‌ترسییه‌كانی داعش له‌سه‌ر ته‌واوی نه‌ته‌وه‌و پێكهاته‌كانی عیراق و كردو له‌و رووه‌شه‌وه‌ رۆڵی پێشمه‌رگه‌و رووبه‌ڕووبونه‌وه‌و به‌رگرییه‌كانی به‌رامبه‌ر به‌داعش به‌رزنرخاند.


PUKmedia راگه‌یاندنی مه‌كته‌بی سیاسی