riklam

پێشمه‌رگه‌و پێشوازیی باکوور ‌

kurdistani 12:26 PM - 2014-10-31
ته‌حسین ته‌ها چۆمانی‌

ته‌حسین ته‌ها چۆمانی‌

ئه‌مڕۆ ئه‌گه‌ر کۆبانێ رووبه‌ڕووی دۆخێكی تایبه‌ت له‌ جه‌نگی دژی تیرۆر بۆته‌وه‌، ئه‌وا ئه‌م دۆخه‌ له‌گه‌ڵ خۆیدا کوردی خستۆته‌ به‌رده‌م به‌رپرسیارێتییه‌کی مێژوویی گرنگ که‌:
یه‌که‌م: کۆششی رووبه‌ڕووبوونه‌وه‌ی تیرۆر که‌ رووی له‌ هه‌مووانه‌و زیاتر له‌ده‌وری خاک و جوگرافیای کورد له‌باشوورو رۆژئاڤا وه‌ک هه‌ڕه‌شه‌ به‌دەرده‌که‌وێت، کوردی خستۆته‌ دۆخێکه‌وه‌ که‌ ئه‌م هه‌ڕه‌شه‌یه‌ به‌ هه‌ڕه‌شه‌یه‌کی مه‌ترسیدار له‌سه‌ر بارگۆڕینی جیۆپۆلتیکی خۆی بزانێت که‌ رووی له‌ کرانه‌وه‌یه‌، چونکه‌ کورد له‌وه‌ تێگه‌یشتووه‌ که‌ ئه‌م قۆناغه‌ی پێیدا ره‌ت ده‌بێت، قۆناغی وه‌رگرتنه‌وه‌ی ماف و ئازادی و حکومڕانییه‌تی له‌سه‌ر خاکی خۆی، وه‌ک ده‌شبینرێت وڵاتانی ئه‌وروپاو ئه‌مریکا له‌به‌رده‌م ئه‌م قۆناغه‌ی کورد به‌ هه‌ستیارییه‌وه‌ مامه‌ڵه‌ ده‌که‌ن. له‌م رووه‌وه‌ کورد که‌ ستراتیژی سه‌ره‌کی له‌م قۆناغه‌دا رووبه‌روبوونه‌وه‌ی تیرۆره.‌ به‌هه‌ر جۆرێک بێت ده‌یه‌وێت ئه‌م قۆناغه‌ له‌به‌رژه‌وه‌ندی خۆی کۆتایی پێ بێنێت.
دووه‌م: په‌یوه‌ست به‌ کۆبانێ و رۆژئاڤا به‌گشتی، ئه‌مڕۆ خیتاب و هه‌ڵوێستی و سیاسی کورد وێڕای هه‌ر جۆره‌ ناکۆکییه‌ک به‌ئاڕاسته‌ی یه‌ک گوتاری و یه‌ک هه‌ڵوێستی ده‌چێت، ئه‌مه‌ ته‌نیا بناغه‌یه‌که‌ بۆ داهاتوویه‌کی باشتر. بۆیه‌ ئه‌م زه‌مینه‌یه‌و ها‌وکارییه‌ی کورد له‌ناوخۆدا خه‌ریکه‌ ده‌یڕه‌خسێنێت بۆ رووبه‌روبوونه‌وه‌ی تیرۆر، پێگه‌ی کورد چ له‌سه‌ر ئاستی جیهانی چ له‌سه‌ر ئاستی وڵاتانی ئیقلیم، ده‌کرێت وه‌ک پێگه‌یه‌کی حساب بۆکراو له‌ناو دنیای سیاسی رۆژئاوادا جێی خۆی بگرێت.
پێده‌چێت چوونی پێشمه‌رگه‌ بۆ کۆبانێ خاڵی وه‌رچه‌رخانی ئه‌و مێژووه‌ بێت، که‌ تاوه‌کو ئێستا له‌ناو هه‌ناوی ئیسنانی کورد دا په‌نگ ده‌خواته‌وه‌، ئه‌م رۆشتنه‌ له‌گه‌ڵ خۆیداو هاوخه‌باتی له‌یه‌ک سه‌نگه‌ردا، هه‌مان فۆڕمی ئه‌و خه‌باته‌یه‌ که‌ تاوه‌کو ئێستا کورد نه‌یتوانووه‌ به‌م به‌رفراوانییه‌ به‌رگری لێ بکات. بۆیه‌ رۆشتنی هێزی پێشمه‌رگه‌ له‌باشووره‌وه‌ بۆ رۆژئاڤا ته‌فسیری ئه‌و قۆناغه‌مان بۆ ده‌کات، که‌ خه‌می نه‌ته‌وه‌یی کورد خه‌مێکه‌و ده‌بێت پارێزگاری لێ بکرێت، هه‌روه‌ک چۆن ئه‌و خه‌مه‌ زۆر با ئاسانی له‌و پێشوازییه‌ی هاووڵاتیانی باکووری کوردستاندا به‌دیار که‌وت.
ئه‌و پێشوازی و نمایشه‌ی کورد له‌ باکووری کوردستان بۆ پێشمه‌رگه‌ رێکیخست، هه‌روا نمایشێکی رواڵه‌تی‌و هه‌ست و سۆزی نییه‌، به‌ڵکو نمایشێکه‌ که‌ زیاتر بۆنی به‌گری و بۆنی ئه‌و تێگه‌یشتنه‌ی لێ دێت، که‌ کورد گه‌شتۆته‌ قۆناغێک که‌ قۆناغی به‌رگری کورده‌ له‌ کورد. ئه‌م په‌یامه‌و کۆده‌نگیه‌ی کورد‌ به‌تایبه‌ت بۆ تورکیا په‌یامێکی هه‌ستیارو گرنگ ده‌بێت. چونکه‌ هه‌رچی تورکیایه‌ له‌ ژێر زه‌ختێکی ناوخۆی مه‌ترسیداردایه‌ په‌یوه‌ست به‌ چاره‌سه‌رکردنی کێشه‌ی کورد.
سه‌رنجه‌کان به‌هه‌ر ئاقارێکدا بن، ئه‌و هاوکاریه‌ی باشوور بۆ رۆژئاڤا، ده‌کرێت ناسنامه‌ی پێشمه‌رگه‌ له‌ رووبه‌روبوونه‌وه‌ی جه‌نگی دژی تیرۆردا که‌ به‌شێکی زۆری وڵاتانی بۆ ئه‌م مه‌به‌سته‌‌ خستۆته‌ یه‌ک به‌ره‌وه‌، له‌و ناسنامه‌ لۆکاڵییه‌ ده‌ربچێت، که‌ ته‌نیا په‌یوه‌ست بێت به‌ هێزێکی هه‌رێمییه‌وه‌. به‌دیوه‌که‌ی تریش ئه‌م هاوکاریه‌ دیسان ده‌بێت وه‌ک له‌ ده‌ره‌وه‌ی هه‌رجۆره‌ ناکۆکیه‌کی سیاسیی نێوان باشوورو رۆژئاڤا سه‌یر بكرێت. چونکه‌ ئه‌م هاوکاریه‌ هاوکارین بۆ دۆخێکی تایبه‌ت له‌ رووبه‌ڕوبوونه‌وه‌ی تیرۆردا. بۆیه‌ له‌ ده‌ره‌وه‌ی ئه‌م هاوکارییه‌ پیاده‌کردنی هه‌ر جۆره‌ سیاسه‌تێک که‌ له‌ده‌ره‌وه‌ی ئه‌و خه‌مه‌ نه‌ته‌وه‌ییه‌ بێت. ده‌بێت بڵێین لانگی له‌ پێگه‌و سیاسه‌تی داهاتووی کورد به‌ڕووی دنیای ده‌ره‌وه‌و وڵاتانی ئیقلیم دێته‌ ئاراوه‌.

ته‌حسین ته‌ها چۆمانی‌

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket