زانیاری له‌سه‌ر ونبووانی هه‌ڵه‌بجه‌ كۆده‌كرێته‌وه‌

نۆرینی DNA بۆ خێزانه‌كان و دواتریش بۆ منداڵه‌كه‌ ده‌كرێت

بڕیاره‌ رۆژی چوارشه‌ممه‌ 29/10/2014 وه‌فدێكی وه‌زاره‌تی كاروباری شه‌هیدان (تیمی تایبه‌تی گۆڕه‌ به‌كۆمه‌ڵه‌كان) به‌ سه‌رپه‌رشتی په‌ری نوری عه‌زیز به‌ڕێوه‌به‌ری گشتی سه‌ردانی هه‌ڵه‌بجه‌ بكه‌ن، له‌و سه‌ردانه‌شدا زانیاری تایبه‌ت له‌سه‌ر پێش ونبوون له‌ خانه‌واده‌ی هه‌ر 49 منداڵه‌ ونبووه‌كه‌ی هه‌ڵه‌بجه‌ وه‌ربگرن.

له‌وباره‌یه‌وه‌ په‌ری نوری عه‌زیز به‌ڕێوه‌به‌ری گشتی گۆڕه‌ به‌كۆمه‌ڵه‌كان له‌ وه‌زاره‌تی شه‌هیدان به‌ PUKmedia ی راگه‌یاند: تیمه‌كه‌مان ئه‌و كادرانه‌ له‌خۆده‌گرێت كه‌ له‌لایه‌ن رێكخراوی نێوده‌وڵه‌تی ICMPـه‌وه‌ راهێنانیان بۆ كراوه‌ له‌سه‌ر وه‌گرتنی زانیاری دروست له‌سه‌ر بێسه‌روشوێنه‌كانی هه‌ڵه‌بجه‌ كه‌ ژماره‌یان 49 خانه‌واده‌ن، ئه‌وه‌ش له‌ رێگای ئه‌و فۆڕمه‌ تایبه‌ته‌ی كه‌ رێكخراوی ناوبراو وه‌كو ستانداردی جیهانی كاری له‌سه‌ر ده‌كات.

وتیشی: دوای كۆكردنه‌وه‌ی ئه‌و زانیارانه‌ به‌ شێوه‌ی داتابه‌یس تۆمارده‌كرێن، به‌جۆرێك كه‌ سه‌رجه‌م زیانیارییه‌كان له‌سه‌ر ئه‌م خێزانانه‌ له‌خۆده‌گرێت تا هه‌ركاتێك كه‌سێك دۆزرایه‌وه‌ یان منداڵێك داوایكرد كه‌ ونبووه‌، ئه‌وا له‌ رێگای به‌راوردكردنی زانیاری له‌گه‌ڵ ئه‌و زانیارییانه‌ی كۆده‌كرێنه‌وه‌ و نۆرینی DNA كه‌ بۆ خێزانه‌كان و دواتریش بۆ منداڵه‌كه‌ ده‌كرێت، به‌راورد بكرێن بۆ ئه‌وه‌ی بگه‌ڕێندرێنه‌وه‌ بۆ خانه‌واده‌كانیان.

جێی باسه‌، له‌گه‌ڵ بۆردومانكردنی هه‌ڵه‌بجه‌و په‌راگه‌نده‌بوونی ژماره‌یه‌كی زۆری خانه‌واده‌ی ئه‌و شاره‌، ژماره‌یه‌ك منداڵ ونبوون و 50 خێزان ناویان له‌ كۆمه‌ڵه‌ی قوربانی هه‌ڵه‌بجه‌و به‌ڕێوه‌به‌رایه‌تی شه‌هیدان و ئه‌نفالكراوانی هه‌ڵه‌بجه‌ تۆماركردووه‌و ته‌نها كه‌سێك به‌ ناوی زمناكۆ تائێستا به‌ دایكی شادبووه‌ته‌وه‌و كاری وه‌زاره‌تی كاروباری شه‌هیدانیش له‌مباره‌یه‌وه‌ی درێژه‌ی هه‌یه‌.

PUKmedia  فوئاد عوسمان