قۆناغی دووه‌می كۆنتڕۆڵكردنه‌وه‌ی جرف السخر ده‌ست پێده‌كات

قۆناغی دووه‌م بریتیه‌ له‌پوچه‌ڵكردنه‌وه‌ی بۆمبه‌ چێنراوه‌كان كه‌ له‌لایه‌ن تیرۆریستانه‌وه‌ به‌جێماون

وته‌بێژی فه‌رمانده‌یی ئۆپه‌راسیۆنه‌كانی سوپای عیراق له‌پارێزگایی بابل رایده‌گه‌یه‌نێت " دوای كۆتایهاتنی قۆناغی یه‌كه‌می كۆنتڕۆڵكردنه‌وه‌ی (جرف السخر) به‌سه‌ركه‌وتووی ئه‌مڕۆ قۆناغی دووه‌م ده‌ستپێده‌كات".

فه‌رمانده‌ كه‌ریم جه‌بر وته‌بێژی فه‌رمانده‌یی ئۆپه‌راسیۆنه‌كانی سوپای عیراق له‌پارێزگایی بابل له‌به‌یاننامه‌یه‌كیدا كه‌ وێنه‌یه‌كی بۆ PUKmedia نێردراوه‌ رایگه‌یاندووه‌: قۆناغی یه‌كه‌می كۆنتڕۆڵكردنه‌وه‌ی ناوچه‌ی (جرف السخر) رۆژی هه‌ینی كۆتایی هات و ئه‌مڕۆ شه‌ممه‌ قۆناغی دووه‌م ده‌ست پێده‌كات كه‌ كاره‌كانی قۆناغی دووه‌م بریتیه‌ له‌پوچه‌ڵكردنه‌وه‌ی بۆمبه‌ چێنراوه‌كان كه‌ له‌لایه‌ن تیرۆریستانه‌وه‌ به‌جێماون بۆ زیان گه‌یاندن به‌هێزه‌كانی سوپای عیراق.

هه‌ر له‌ به‌یاننامه‌كه‌دا ئه‌وه‌ش هاتووه‌: (جرف السخر) ئێستا له‌ژێركۆنتڕۆڵی هێزه‌كانی سوپای عیراقه‌و به‌ده‌یان تیرۆریست كوژراون و ژماره‌یه‌كی زۆریش خۆیان راده‌ستی هێزه‌كانی سوپای عیراق كردووه‌.

له‌و راگه‌یه‌ندراوه‌دا ئه‌وه‌ش ئاشكراكراوه‌  كه‌ تیرۆریستان زیاتر له‌ 600 بۆمبی چێنراویان له‌ڕێگه‌ گشتیه‌كان و شوێنه‌ گشتیه‌كاندا چاندووه‌، هه‌رچه‌ند ئه‌وه‌ كاریگه‌ری ئه‌وتۆی نه‌بووه‌ له‌به‌رامبه‌ر پێشڕه‌وی هێزه‌كانی سوپای عیراق، به‌ڵام له‌م قۆناغه‌دا بۆ ته‌واو كێوماڵكردنی پاشماوه‌ی تیرۆریستان به‌هه‌نگاوێكی هه‌ستیارداده‌نرێت و تا كۆتایی سه‌عاته‌كانی ئه‌مڕۆ قۆناغی دووه‌میش كۆتایی پێدێت.

PUKmedia سامان عه‌لی