كۆبانێ.. تیرۆرستان چه‌كی كیمیاوی و میكرۆبیان به‌كارهێناوه‌

به‌شێك له‌برینداره‌كان چاره‌سه‌ریان بۆ كراوه‌

سه‌رۆكی ئه‌نجومه‌نی دادوه‌ری گشتی له‌كۆبانێ وتی، نه‌خۆشی پێست و نیشانه‌ی ناسروشتی له‌جه‌سته‌ی خه‌ڵك و ئه‌و هێزانه‌ ده‌ركه‌وتووه‌ كه‌ پارێزگاری له‌كۆبانێ ده‌كه‌ن، ئه‌مه‌ش ده‌گه‌ڕێته‌وه‌ بۆ به‌كارهێنانی چه‌كی كیمیاویی میكرۆبی كه‌له‌شاری كۆبانێ له‌لایه‌ن تیرۆرستانی داعشه‌وه‌ به‌كارهێنراوه‌.
 
فه‌رحان حاج عیسۆ سه‌رۆكی ئه‌نجومه‌نی دادوه‌ری گشتی شاری كۆبانێ له‌وباره‌یه‌وه‌ به‌ ئاژانسه‌ جیهانییه‌كانی راگه‌یاندوه‌،  تیرۆریستانی داعش ئه‌مه‌ بۆچه‌نده‌هه‌مینجاره‌ چه‌كی كیمیاوی و بارگاوی به‌میكرۆب، به‌رامبه‌ر به‌هێزه‌كانی یه‌كینه‌كانی پاراستنی گه‌ل له‌ناو شاری كۆبانێ به‌كارده‌هێنن و چه‌ند حاڵه‌تێكیش تۆماركراون، كه‌ به‌شێوه‌یه‌كی ناسروشتی نیشانه‌ی جۆراوجۆری مه‌ترسیدار له‌سه‌ر جه‌سته‌ی شه‌ڕه‌ڤانه‌كانمان ده‌رده‌كه‌وێت ،
حاج عیسۆ راشیگه‌یاندوه‌، له‌و حاڵه‌تانه‌ی كه‌ تۆماركراون بریتین له‌برینی پێست و ئازاری گوێ و خوێن به‌ربوونی لوت و سوتانی چاوه‌كان، هه‌روه‌ها له‌ئێستادا له‌لایه‌ن ئه‌نجومه‌نێكی پزیشكیه‌وه‌ ده‌ست به‌لێكۆڵینه‌وه‌ له‌و باره‌یه‌وه‌ كراوه‌و دوای ته‌واوبوونی لێكۆڵینه‌وه‌ راپۆرتێك له‌و باره‌یه‌وه‌ بۆرایگشتی بڵاوده‌كرێته‌وه‌ .

سه‌رۆكی ئه‌نجومه‌نی دادوه‌ری كۆبانێ جه‌ختی له‌وه‌شكرده‌وه‌، به‌شێك له‌برینداره‌كان چاره‌سه‌ریان بۆ كراوه‌و له‌لایه‌ن ئه‌نجومه‌نی پزیشكییه‌وه‌، هه‌روه‌ها نمونه‌ی ئه‌و برینانه‌ وه‌رگیراوه‌ بۆ ئه‌وه‌ی بزانرێت هۆكاری دروستبوونی ئه‌و جۆره‌ برینانه‌ چیه‌ .
 
فرحان حاج عیسۆ ئه‌وه‌شی روونكردۆته‌وه‌،  تیرۆریستانی داعش گروپێكی تیرۆریستی توندڕه‌ون كه‌كاریان سه‌ربڕین و كوشتنی خه‌ڵكی بێتاوان و  به‌كارهێنانی چه‌كی قه‌ده‌غه‌كراوه‌، بۆیه‌ دوورنیه‌ ئه‌و كاره‌ش به‌ئاسانی له‌ناو شاری كۆبانێدا ئه‌نجامبده‌ن ،
رۆژنامه‌ی ( ئیشبیگل ) ی ئه‌ڵمانی ئه‌وه‌ی بڵاوكردۆته‌وه‌، شه‌وی 22/10 له‌ئه‌نجامی ئه‌و شه‌ڕانه‌ی كه‌له‌چه‌ند قۆڵێكی كۆبانێوه‌ هه‌بووه‌ ئه‌و خه‌ڵكه‌ی له‌ناوشاردا ماونه‌ته‌وه‌ تووشی ته‌نگه‌نه‌فه‌سی بوون و به‌شێكی تریانیش هه‌ستیان به‌سوتان و برینی پێسته‌كانیان كردووه‌.

PUKmedia سامان یاروه‌یس