له‌كۆبانێ شه‌ڕێكی سه‌خت هه‌يه‌

تیرۆرستان زیانی زۆریان پێگه‌یشتووه‌

سه‌رچاوه‌یه‌ك له‌ناو كۆبانێ رایده‌گه‌یه‌نێت، له‌ئێستادا شه‌ڕێكی سه‌خت له‌باشورو رۆژهه‌ڵاتی شاره‌كه‌ له‌نێوان تیرۆرستان و هێزه‌كانی پارستنی گه‌ل هه‌یه‌و به‌و هۆیه‌شه‌وه‌ تیرۆرستان چه‌ندین كوژراویان هه‌یه‌.

سه‌رچاوه‌یه‌ك كه‌ نه‌یویست ناوی ئاشكرا بكرێت به‌ PUKmedia ی راگه‌یاند: له‌ئێستادا شه‌ڕێكی قورس له‌ناو كۆبانێ هه‌یه‌ و به‌و هۆیه‌شه‌وه‌ تیرۆرستان زیاتر له‌ 20 كه‌سیان لێكوژراوه‌.
سه‌رچاوه‌كه‌ وتیشی: شه‌ڕه‌كه‌ له‌باشوور و رۆژهه‌ڵاتی شاره‌كه‌ به‌رده‌وامی هه‌یه‌و هێزه‌كانی یه‌په‌گه‌ش به‌ توندی وه‌ڵامیان ده‌ده‌نه‌وه‌و تونیویانه‌ له‌ گه‌ڕه‌كی كانیا كوردان پێشڕه‌وی بكه‌ن.

له‌لایه‌كی تره‌وه‌ ئاری هه‌ركی چالاكوانی سیاسی له‌نزیك كۆبانێ رایگه‌یاند: دیسان چه‌ته‌كانی داعش هه‌وڵیاندا له‌ په‌لامارێكی خۆكوژیدا خۆیان به‌هێزه‌كانی یه‌په‌گه‌دا بتێقێننه‌وه‌، به‌ڵام به‌ر له‌وه‌ی خۆكوژه‌كه‌ بگاته‌ شوێنی ئامانجی، له‌لایه‌ن هێزه‌كانی یه‌په‌گه‌وه‌ كوژرا.

وتیشی: له‌م هه‌فته‌یه‌دا ئه‌مه‌ 14 كه‌سی خۆكوژه‌ كه‌ تیرۆرستان ده‌ینێرن بۆ زیان گه‌یاندن به‌هێزه‌كانی یه‌په‌گه‌، به‌ڵام خۆبه‌ختانه‌ هه‌موو هه‌وڵه‌كانیان پوچه‌ڵكراونه‌ته‌وه‌.

PUKmedia سامان یاروه‌یس