كۆبانێ.. 8 په‌لاماری داعش تێكده‌شكێنرێن

به‌نیازبوون له‌هه‌شت شوێنه‌وه‌ په‌لاماری یه‌په‌گه‌ بده‌ن

ئێواره‌ی دوێنێ 20-10-2014 تیرۆریستانی داعش به‌نیازبوون له‌هه‌شت شوێنه‌وه‌ په‌لاماری یه‌كینه‌كانی پاراستنی گه‌ل (یه‌په‌گه‌) بده‌ن له‌ناو كۆبانێ، به‌ڵام له‌هه‌موو شوێنه‌كانه‌وه‌ تووشی تێكشان هاتوون و كوژراوێكی زۆریان هه‌یه‌.

ئاری هه‌ركی چالاكوانی سیاسی نزیك له‌یه‌په‌گه‌ به‌  PUKmedia ی راگه‌یاند: تیرۆریستانی داعش به‌رده‌وامن له‌هێرشكردنه‌ بۆسه‌ر كۆبانێ و یه‌كینه‌كانی پاراستنی گه‌لیش به‌توندی وه‌ڵامیان ده‌ده‌نه‌و زیانی زۆریان پێده‌گه‌یه‌نن.

وتیشی: دوێنێ له‌ رۆژهه‌ڵات ورۆژئاواو باشوری كۆبانێ له‌ هه‌شت شوێنه‌وه‌ شه‌ڕێكی زۆر دژوار تا به‌یانی به‌رده‌وامبوو، به‌ڵام له‌ هه‌موو لاكانه‌وه‌ یه‌په‌گه‌ تیرۆرستانی داعشیان تێكشكاندو به‌ ده‌یان تیرۆرست كوژران.
رونشیكرده‌وه‌: له‌ رۆژهه‌ڵاته‌وه‌ تیرۆرستان هێرشیان كرده‌ سه‌ر هێلی سنوری و ناوچه‌ی شاره‌داری له‌ باشوریشه‌وه‌ هێرشی گه‌وره‌یان ئه‌نجامدا، به‌ڵام هه‌موو هێرشه‌كان تێكشكێندران و زیانی زۆریان به‌ركه‌وت، ژماره‌ی ته‌واوی كوژراوه‌كانی دوژمن تا ئه‌م ساته‌ نه‌زانراوه‌.

ئاری هه‌ركی جه‌ختی له‌وه‌شكرده‌وه‌: تیرۆریستانی به‌ته‌واوه‌تی لاوازبوون، به‌ڵام هێشتا به‌رده‌وامن له‌په‌لاماردانی كۆبانێ، یه‌په‌گه‌و یه‌په‌ژه‌ش به‌وره‌یه‌كی به‌رزه‌وه‌ وه‌ڵامیان ده‌ده‌نه‌وه‌و به‌ته‌واوه‌تی وره‌ی داعش رووخاوه‌و زیانی زۆری به‌ركه‌وتووه‌.

PUKmedia سامان یاروه‌یس