قائیمقامی سلێمانی: رێگه‌ ناده‌ین نرخی غاز زيادبكرێت

گرفتی كه‌می غاز چاره‌سه‌رده‌كرێت

ماوه‌ی چه‌ند رۆژێكه‌ له‌سنوری پارێزگای سلێمانی گرفتی كه‌می غازی ماڵان سه‌ری هه‌ڵداوه‌ و دامه‌زراوه‌په‌یوه‌ندیداره‌كانی حكومه‌تیش رایده‌گه‌یه‌نن له‌هه‌وڵی به‌رده‌وامدان بۆ چاره‌سه‌ركردنی گرفته‌كه‌و رێگه‌ش به‌ زیادكردنی نرخی غاز ناده‌ن.
 
به‌مه‌به‌ستی چاره‌سه‌ركردنی ئه‌و گرفته‌ ئه‌مڕۆ دووشه‌ممه‌ 20-10, له‌ دیوانی قائیمقامیه‌ت، ئاوات محه‌مه‌د قائیمقامی سلێمانی له‌گه‌ڵ لایه‌نه‌په‌یوه‌ندیداكاندا كۆبوویه‌وه‌ و گفتوگۆ له‌باره‌ی هۆكاری سه‌رهه‌ڵدانی گرفته‌كه‌ كراو قائیمقامی سلێمانی هۆكاره‌كه‌ی بۆ كه‌مبوونه‌وه‌ی ئه‌و بڕه‌ گه‌ڕانده‌وه‌ كه‌ پێشتر له‌ناوخۆی هه‌رێم و به‌شێكی له‌لایه‌ن حكومه‌تی ناوه‌ندییه‌وه‌ دابینده‌كرا.

 وتیشی: پێشتر رۆژانه‌ 400 تۆن غاز ده‌گه‌یشته‌ پارێزگای سلێمانی، به‌ڵام ئێستا بڕه‌كه‌ بۆ نیوه‌ی ئه‌و بڕه‌ كه‌مكراوه‌ته‌وه‌.

 ئاماژه‌ی بۆ ئه‌وه‌شكرد: تاكاتی چاره‌سه‌ركردنی ئه‌و گرفته‌ رێشوێنی پێویست ده‌گرنه‌به‌ر له‌دابه‌شكردنی ئه‌و بڕه‌ی كه‌ ده‌گاته‌ سنوری پارێزگای سلێمانی بۆ ئه‌وه‌ی به‌شێوه‌یه‌كی گونجاو به‌سه‌ر هاووڵاتیانی شاری سلێمانی و قه‌زاو ناحییه‌كاندا دابه‌شبكرێت و هاوڵاتیان رووبه‌ڕووی گرفتی كه‌می غازنه‌بنه‌وه‌.

له‌ باره‌ی چاره‌سه‌ركردنی گرفته‌كه‌ش ئاوات محه‌مه‌د رایگه‌یاند: له‌هه‌وڵی به‌رده‌وامدان له‌ كه‌مترین ماوه‌دا گرفته‌كه‌ چاره‌سه‌ر بكه‌ن  بۆ ئه‌و مه‌به‌سته‌ش داوای له‌ وه‌زاره‌تی سامانه‌ سروشتیه‌كان كرد هه‌نگاوی خێرا بنێت بۆ چاره‌سه‌ركردنی گرفته‌كه‌ و دۆزینه‌وه‌ی رێگه‌چاره‌ی پێویست بۆی .

له‌ كۆبوونه‌وه‌كه‌شدا قائیمقامی سلێمانی به‌ڕێوه‌به‌ری فه‌رمانگه‌ په‌یوه‌ندیداره‌كانی راسپارد به‌شێوه‌یه‌كی ووردتر چاودێری دابه‌شكردنی ئه‌و بڕه‌ غازه‌ بكه‌ن، كه‌ ده‌گاته‌ پارێزگای سلێمانی و به‌شێوه‌یه‌كی یه‌كسان و به‌ ره‌چاوگرتنی ژماره‌ی دانیشتوانی شارو شارۆچكه‌كان دابه‌شی بكه‌ن.

راشیگه‌یاند: به‌هیچ شێوه‌یه‌ك رێگه‌ به‌ زیادكردنی نرخ ناده‌ن و نرخی ره‌سمی هه‌ر بوتڵێك غاز ته‌نها 6 هه‌زار  250 دیناره‌و داواشی له‌هاووڵاتیان كرد له‌كاتی زیادكردنی نرخدا لیژنه‌كانی لێ ئاگادار بكه‌نه‌وه‌ بۆ ئه‌وه‌ی ده‌ستبه‌جێ لێپرسینه‌وه‌ له‌گه‌ڵ ئه‌و كه‌سانه‌دا بكه‌ن كه‌ نرخ زیاد ده‌كه‌ن.

PUKmedia تایبه‌ت