هۆكارو چاره‌سه‌ری ئاڵوده‌بون به‌ئینته‌رنێت

.

ئاڵوده‌بون به‌ئینته‌رنێت به‌ یه‌كێك له‌ نه‌خۆشییه‌ ده‌رونییه‌كان داده‌نرێت پزیشكێكی نه‌خۆشییه‌ ده‌رونییه‌كانیش ده‌ڵێت كه‌ له‌ كه‌سی توشبودا ئه‌و دیارده‌یه‌ ده‌بێته‌ لاوازی په‌یوه‌ندی كۆمه‌ڵایه‌تی و هه‌ڵچونی ده‌رونی و كه‌م خه‌وی، ئه‌گه‌ری ئه‌وه‌ش هه‌یه‌ مناڵانیش توشی ئه‌م حاڵه‌ته‌ ببن.

له‌گه‌ڵ پێش كه‌وتنه‌كانی ته‌كنه‌لۆجیاو گه‌شه‌سه‌ندنی خزمه‌تگوزارییه‌كانی ئینته‌رنێت، مرۆڤایه‌تی  سودی زۆری وه‌رگرتووه‌ له‌ بواركانی په‌یوه‌ندیكردن و ئاڵوگۆرِكردنی بیرورِاكان و وه‌رگرتنی زانیاری و به‌ئاگابون له‌ هه‌واڵ و گۆڕانكارییه‌كانی دنیاو چه‌ندین سودی جۆراوجۆری تر، به‌شێك له‌ هاووڵاتیانیش له‌ كاتی پێویستدا خزمه‌تگوزارییه‌كانی ئینته‌رنێت به‌كارده‌هێنن بۆ كاروباری رۆژانه‌یان به‌پێچه‌وانه‌وه‌ به‌شێكی تر له‌هاووڵاتیان زیاد له‌ پێویست ئینته‌رنێت به‌كارده‌هێنن و چه‌ندین سه‌عات به‌ كاركردن له‌ سه‌ر خزمه‌تگوزارییه‌كانی ئینته‌رنێت و تۆرِه‌ كۆمه‌ڵایه‌تییه‌كان ده‌به‌نه‌ سه‌ر، له‌ شاری سلێمانی رۆژانه‌ ژماره‌یه‌كی زۆر له‌ هاووڵاتیان كاته‌كانیان به‌ به‌كارهێنانی ئینته‌رنێت به‌سه‌ر ده‌به‌ن و ته‌نانه‌ت به‌شێك هاووڵاتی بۆ ئه‌و مه‌به‌سته‌ رووده‌كه‌نه‌ سه‌نته‌ره‌كانی ئینته‌رنێتی شاره‌ك.

 له‌وباره‌وه‌ دكتۆر ئه‌فرام محه‌مه‌د حه‌سه‌ن، پزیشكی پسپۆرِی نه‌خۆشییه‌ ده‌رونییه‌كان به‌ PUKmedia ی راگه‌یاند:  زۆر به‌كارهێنانی ئینته‌رنێت و كه‌م خه‌وی به‌هۆی به‌كارهێنانی ئینته‌رنێته‌وه‌ جگه‌ له‌وه‌ی مرۆڤ  له‌ ته‌مه‌نه‌ جیاوازه‌كاندا روبه‌روی لاوازی په‌یوه‌ندی كۆمه‌ڵایه‌تی و حاڵه‌تی جۆراوجۆری ده‌رونی ده‌كاته‌وه‌ له‌ مناڵانیشدا به‌هۆی زۆر به‌كارهێنانی ئینته‌رنێت و به‌رنامه‌كانی ئایپادو یاری ئه‌لیكترۆنییه‌كان ئه‌گه‌ری ئه‌وه‌ هه‌یه‌ مناڵانیش به‌و دۆخه‌دا تێپه‌ڕن و توشی ئاڵوده‌بون به‌ ئینته‌رنێت ببن.

وتیشی: بۆیه‌ پێویسته‌ كاتێك كه‌سێك توشی حاڵه‌تی ئاڵوده‌بون به‌ ئیننه‌رنێت ده‌بێت سه‌ردانی پزیشكی پسپۆرِ بكات ئه‌و نه‌خۆشییه‌ش به‌رِێگای ده‌رمان و كاریگه‌ری په‌یوه‌ندی خێزانه‌كه‌ی له‌ سه‌ر كه‌سی ئاڵوده‌بو چاره‌سه‌ر ده‌كرێت .

ئه‌و پزیشكه‌ی بواری نه‌خۆشییه‌ ده‌رونییه‌كان ئامۆژگاری هاووڵاتیان ده‌كات كه‌ له‌كاتی  پێویستدا ئینته‌رنێت به‌كاربهێنن و ره‌چاوی كاتی خه‌وتن وپشوو بكرێت.
به‌ برِوای پسپۆرِانی بواری نه‌خۆشی ده‌رونی، ئینته‌رنێت و خزمه‌تگوزارییه‌كانی په‌یوه‌ندی راسته‌وخۆیان به‌ده‌رونی مرۆڤه‌وه‌ هه‌یه‌ پێویسته‌ له‌كاتی پێویستدا به‌كاربهێنرێت و نه‌بێته‌ هۆی سه‌رلاوازی په‌یوه‌ندی كۆمه‌ڵایه‌تی و تێكچونی باری ده‌رونی.

PUKmedia   پۆڵا ئه‌حمه‌د