داقوق.. بۆمبێك به‌هێزه‌كانی پێشمه‌رگه‌دا ده‌ته‌قێته‌‌

ژماره‌یه‌ك پێشمه‌رگه‌ شه‌هیدوو برینداربوون

سه‌رله‌به‌یانی ئه‌مڕۆ 30-9-2014 هێزی پێشمه‌رگه‌ هه‌ڵمه‌تێكیان بۆ سه‌ر بنكه‌و باره‌گاكانی داعش له‌سنوری قه‌زای داقوق ده‌ستپێكردو توانیویان هه‌ردوو گوندی (سه‌عدو خالد) كۆنترۆڵ بكه‌ن و به‌ره‌و گوندی وه‌حده‌ پێشڕه‌ویبكه‌ن هێزی پێشمه‌رگه‌ له‌هه‌وڵی كۆنترۆڵكردنی ئه‌و گونده‌شدایه‌، سه‌رچاوه‌یه‌كی ئاگادار له‌ناوچه‌كه‌ پێی راگه‌یاندین له‌شه‌ڕ و پێكدادانه‌كانی ئه‌مرۆدا چه‌ندین تیرۆرستی داعش كوژراون،دوای كۆنتڕۆڵكردنه‌وه‌ی ره‌بیه‌یه‌ك و  هه‌ڵگرتنه‌وه‌ی ئاڵایه‌كی داعشيش له‌لایه‌ن پێشمه‌رگه‌وه‌ بۆمبێكی چێندراو ته‌قیه‌وه‌و به‌وهۆیه‌وه‌ ژماره‌یه‌ك پێشمه‌رگه‌ شه‌هیدوو برینداربوون.


سه‌رچاوه‌یه‌كی باوه‌ڕپێكراو به‌ PUKmedia ی راگه‌یاند: ئه‌مڕۆ له‌چوارچێوه‌ی هه‌ڵمه‌ت و پێشڕه‌ویه‌كانی پێشمه‌رگه‌ له‌ناوچه‌كانی قه‌زای داقوق بۆ كۆنترۆڵكردنی چه‌ند گوندێك كه‌به‌ده‌ستی داعشه‌وه‌بوون، دوای كۆنترۆڵكردنی ره‌بیه‌یه‌ك كه‌به‌ده‌ست تیرۆرستانی  داعشه‌وه‌ بوو، هێزه‌كانی پێشمه‌رگه‌ هه‌وڵیاندا ئاڵای داعش له‌سه‌ر ره‌بیه‌كه‌ لابده‌ن و له‌و كاته‌دا بۆمبێك كه‌له‌لایه‌ن تیرۆرستانی داعشه‌وه‌ له‌ژێر ئاڵاكه‌ دانرابوو ته‌قیه‌وه‌و به‌هۆیه‌وه‌ دوو  پێشمه‌رگه‌ شه‌هیدو سێ پێشمه‌رگه‌ی تریش برینداربوون.

هه‌رله‌و باره‌یه‌وه‌ ئيدریس حاجی عادل جێگری لێپرسراوی مه‌ڵبه‌ندی كه‌ركوك و لێپرسراوی كۆمیته‌ی داقوقی یه‌كێتی به‌  PUKmedia ی راگه‌یاند: به‌ره‌به‌یانی ئه‌مڕۆ  هێزه‌كانی پێشمه‌رگه‌ هێرشیانكرده‌ سه‌ر گونده‌كانی وه‌حده‌و سه‌عدو خالد له‌ باشوری قه‌زای داقوق دوای شه‌ڕوپێكدادانێكی زۆر توانیان هه‌ردوو گوندی سه‌عدو خالد كۆنتڕۆڵبكه‌ن و به‌ره‌و كۆنتڕۆڵكردنی گوندی وه‌حده‌ش پێشڕه‌ویده‌كه‌ن.

وتیشی: له‌و هێرشانه‌ی هێزه‌كانی پێشمه‌رگه‌دا تیرۆرستانی داعش زیانێكی زۆریان به‌ركه‌وت و چه‌ندین تیرۆرست كوژران و چه‌ند ئۆتۆتمبێلێكیشیان سوتێنران.

ئاماژه‌ی بۆئه‌وه‌شكرد: له‌كاتی كۆنتڕۆڵكردنه‌وه‌ی ره‌بیه‌یه‌كدا هێزه‌كانی پێشمه‌رگه‌ ئاڵایه‌كی داعشیان به‌رزكرده‌وه‌، به‌ڵام به‌داخه‌وه‌ بۆمبێكی چێندراو كه‌له‌ژێر ئاڵاكه‌دا دانرابوو ته‌قیه‌وه‌و به‌وهۆیه‌وه‌ ژماره‌یه‌ك پێشمه‌رگه‌ شه‌هیدبوون.

   PUKmedia په‌یامنێرانمان