هێزه‌كانی پێشمه‌رگه‌ ناحیه‌ی ره‌بیعه‌ كۆنـتڕۆڵده‌كه‌ن

ئه‌و تیرۆرستانه‌ به‌ره‌و خواروی ره‌بیعه‌ هه‌ڵدێن

دوای ئه‌وه‌ی سه‌عات 6ی به‌یانی ئه‌مڕۆ 30-9-2014 هێزه‌كانی پێشمه‌رگه‌ هێرشیان كرده‌ سه‌ر ناوچه‌كانی ده‌وروبه‌ری ناحیه‌ی ره‌بیعه‌و توانیان هه‌ردوو گوندی مه‌حمودیه‌و چلبارات و چه‌ند گوندێكی تر كۆنـتڕۆڵبكه‌ن، دواتر به‌ره‌و ناحیه‌ی ره‌بعه‌ پێشڕه‌ویان كردو كه‌مێك پێش ئێستا توانیان ئه‌و ناحیه‌یه‌ كۆنتڕۆڵبكه‌ن، تیرۆرستانی داعشیش له‌ هه‌ڵهاتنی به‌رده‌وامدان.

سه‌رچاوه‌یه‌كی باوه‌ڕپێكراو له‌ ناحیه‌ی ره‌بيعه‌ به‌ PUKmedia ی راگه‌یاند: دوای ئه‌وه‌ی سه‌رله‌به‌یانی ئه‌مڕۆ هێزه‌كانی پێشمه‌رگه‌ هه‌ردوو گوندی مه‌حمودیه‌و چلبارات و چه‌ند گوندێكی تریان له‌ سنوری ناحیه‌ی ره‌بیعه‌ی كۆنتڕۆڵكردو به‌ره‌و ره‌بیعه‌ پێشڕه‌ویان كرد، له‌ ئێستادا هێزه‌كانی پێشمه‌رگه‌ به‌ته‌واوه‌تی چوونه‌ته‌ ناو ناحیه‌كه‌و ته‌نها ده‌نگی ته‌قه‌یه‌كی كه‌م دێت.

وتیشی: تیرۆرستانی داعش له‌ هێرشه‌كانی پێشمه‌رگه‌دا ته‌نها به‌رگریان ده‌كرد، ئێستاش به‌به‌رده‌وامی ئه‌و تیرۆرستانه‌ به‌ره‌و خواروی ره‌بیعه‌ هه‌ڵدێن.

PUKmedia هۆزان فاتیح