سزادانی تاونبارانی ده‌ستدرێژیكردنه‌ سه‌ر كچه‌ ئاواره‌كه‌ی رۆژئاوا ژنان دڵخۆشده‌كات

كه‌یسه‌كه‌ له‌ به‌رژه‌وه‌ندی سه‌روه‌ریی یاسا یه‌كلایی كرایه‌وه‌

سێ شه‌ممه‌ 23-9-2014 دادگای تاوانه‌كانی یه‌كه‌می هه‌ولێر له‌ كه‌یسی ده‌ستدرێژیكردنه‌ سه‌ر (یاسه‌مین حاجی حه‌سه‌ن) كچه‌ ئاواره‌كه‌ی رۆژئاوای كوردستان كه‌ له‌ مانگی كانوونی دووه‌می ئه‌مساڵ له‌لایه‌ن چه‌ند تاوانبارێكه‌وه‌ ده‌ستدرێژی كرایه‌سه‌رو ده‌نگدانه‌وه‌یه‌كی میدیایی زۆری به‌دوای خۆیدا هێنا، كه‌یسه‌كه‌ له‌ به‌رژه‌وه‌ندی سه‌روه‌ریی یاسا یه‌كلایی كرایه‌وه‌، تاوانباران سزای جیاجیایان به‌سه‌ردا سه‌پێندراو.

 به‌وبۆنه‌یه‌شه‌‌وه‌ ئه‌نجومه‌نی باڵای كاروباری خانمان ده‌ستخۆشی له‌بڕیاری سزادانی تاوانبارانی كه‌یسی یاسه‌مین  حاجی حه‌سه‌ن ده‌كات.

نوێنه‌ری ئه‌نجومه‌نی باڵای كاروباری خانمان له‌ دادگاكه‌ په‌روین حه‌سه‌ن رایگه‌یاند: به‌خۆشحاڵییه‌وه‌ سێ له‌ تاوانباره‌كان سزای زیندانی بۆ ماوه‌ی 15 ساڵ و دووانه‌كه‌ی تریش سزای به‌ندكردن بۆ ماوه‌ی 7 ساڵیان به‌سه‌ردا سه‌پێندرا.

هه‌روه‌ها ئاماژه‌ی بۆ ئه‌وه‌شكرد:‌ جێگه‌ی خۆشحاڵییه‌ دادگا له‌ به‌رژه‌وه‌ندی سه‌روه‌ریی یاساو پاراستنی مافه‌ ره‌واكانی ژنان ئه‌م حوكمانه‌ی ده‌ركردووه‌، به‌و هیوایه‌ین له‌ رێگه‌ی دادگای تێهه‌ڵچوونه‌وه‌ هه‌وڵی سوككردنی ئه‌م سزایانه‌ نه‌درێت و به‌ر هیچ لێخۆشبوونێك نه‌كه‌ون.

 دووپاتیشیكرده‌وه‌:‌ به‌ده‌ركردنی ئه‌م حوكمانه‌ متمانه‌ زیاتر بۆ دادگاكان ده‌گه‌ڕێته‌وه‌و یاسا سه‌روه‌ر ده‌بێت بۆ یه‌كلاییكردنه‌وه‌ی كێشه‌كان.

PUKmedia دلێر ئیبراهیم- هه‌ولێر