منداڵێك چه‌ند قوتو شیری خواردووه‌ بۆی هه‌ڵگیراوه‌‌

ئاره‌نگی ته‌مه‌ن 4 ساڵان

دایك و باوكێكی دانیشتووی شاری كه‌لار ته‌واوی قوتوی ئه‌و شیرانه‌ی كه‌ منداڵه‌كه‌یان له‌ دوو ساڵی ته‌مه‌نیدا خواردوویه‌تی وه‌كو یادگاری هه‌ڵیانگرتووه‌، باوكی منداڵه‌كه‌ش باس له‌وه‌ ده‌كات كه‌ وه‌كو یه‌كێك له‌ یادگاره‌ گه‌وره‌كانی ژیانی له‌ ده‌فته‌ری یاداشته‌كانیدا بۆمان تۆماركردووه‌.

دلێر عه‌بدولڕه‌حمان باوكی ئاره‌نگی ته‌مه‌ن 4 ساڵان له‌ باره‌ی ئه‌و كاره‌یانه‌وه‌ به‌ PUKmedia ی راگه‌یاند: ئاره‌نگ كه‌ تاكه‌ منداڵمانه‌ له‌ رۆژی 7/12/2010 له‌دایكبووه‌، هه‌ر له‌ سه‌ره‌تای له‌دایكبوونییه‌وه‌ به‌تایبه‌ت كه‌ له‌ دوو ساڵی یه‌كه‌مدا شیری قوتوی ده‌خوارد، بڕیامانداوه‌ ته‌واوی ئه‌و قوتوانه‌ی كه‌ شیره‌كه‌ی ناوی به‌كارهێناوه‌ وه‌كو یادگارییه‌ك بۆی كۆبكه‌ینه‌وه‌ تا ئه‌وكاته‌ی گه‌وره‌ ده‌بێت.

وتیشی: شیری قوتوه‌كان به‌پێی ساڵی یه‌كه‌م و دووه‌می ته‌مه‌نی ره‌قه‌میان هه‌یه‌، دوای دوو ساڵه‌كه‌ بۆمان كردووه‌ به‌ كیسه‌، كیسه‌كانمانیش بۆ هه‌ڵگرتووه‌، ژماره‌ی ئه‌و قوتوه‌ شیرانه‌ش 172 قوتو بووه‌ كه‌ له‌ ماوه‌ی دوو ساڵی سه‌ره‌تای ته‌مه‌نی به‌كاریهێناوه‌، جگه‌ له‌وه‌ش به‌رواری به‌كارهێنانه‌كه‌شمان له‌ ژێره‌وه‌ی قوتوه‌كه‌ نووسیوه‌.

باوكی ئاره‌نگ سه‌باره‌ت به‌ ژیانی منداڵه‌كه‌ی رایده‌گه‌یه‌نێت كه‌ هه‌موو ساڵێك ده‌فته‌رێكی یادگاری بۆ داده‌نێم كه‌ تایبه‌ت به‌ رووداوه‌كانی ژیانی، ئێستا جگه‌ له‌ تۆماركردنی ئه‌و قوتوه‌ شیرانه‌ شتی تریشمان بۆ كردووه‌، بۆ نموونه‌ هه‌رچی ئه‌و پێلاوانه‌ی بۆمان كڕیوه‌و به‌كاریهێناوه‌ ژماره‌یان 30 دانه‌یه‌.

وتیشی: ته‌نانه‌ت چه‌ندجار نه‌خۆش كه‌وتووه‌و چه‌ند ده‌رزیمان لێداوه‌، چه‌ندجار برینداربووه‌و چه‌ندجار سوتاوه‌، هه‌مووی تۆماركراون به‌ كات و به‌رواری رووداوه‌كه‌وه‌، له‌گه‌ڵ ئه‌وه‌شدا 12 هه‌زار وێنه‌و گرته‌ی ڤیدیۆی تایبه‌ت به‌ ژیانی تۆماركراوه‌و بۆی هه‌ڵگیراوه‌.

هه‌روه‌ها  ئاماژه‌ی بۆ ئه‌وه‌شكرد كه‌ منداڵه‌كه‌ی زۆر حه‌زی له‌ پیشه‌ی پۆلیسی هاتوچۆیه‌و به‌رده‌وام یاری به‌ ئۆتۆمبێله‌كانی ده‌كات و له‌ ته‌مه‌نی 6 مانگییه‌وه‌ ئاكاونتی فه‌یسبوكم بۆ داناوه‌.

ده‌باره‌ی ئایینده‌ی منداڵه‌كه‌ی وتی: خۆم كاری رۆژنامه‌نووسی ده‌كه‌م، بۆیه‌ زۆر ئاره‌زووی ئه‌رشیف ده‌كه‌م، بۆیه‌ بڕیارمدا ئه‌وه‌ له‌ ژیانی منداڵه‌كه‌مدا بكه‌م، به‌ جیاواز له‌ ژیانی منداڵه‌كانی تر، بڕیاریشمداوه‌ كه‌ گه‌وره‌بوو بیخه‌ینه‌ ده‌ستی خۆی بزانین چیان لێده‌كات.

PUKmedia  سامان یاروه‌یس