دیارده‌ی دزیكردن له‌ حه‌ج زیادیكردوه‌

داوا ده‌كرێت حاجیان زیاتر ئاگاداری خۆیان بن له‌كاتی به‌جێگه‌یاندنی ئه‌ركه‌ ئاینیه‌كانیان

به‌ئاماده‌بوونی نوێنه‌رانی په‌رله‌مان و حكومه‌تی هه‌رێمی كوردستان و كۆمه‌ڵه‌ی كۆمپانیاكانی حه‌ج و عومره‌ی كوردستان، شێخ قاسم ره‌سوڵ به‌رزنجی به‌ڕێوه‌به‌ری گشتی حه‌ج و عومره‌ی وه‌زاره‌تی ئه‌وقاف له‌شاری مه‌ككه‌ له‌گه‌ڵ هه‌موو خاوه‌ن كۆمپانیاكانی حه‌جی ئه‌مساڵ كۆبۆوه‌و له‌سه‌ر رێوشوێنه‌كانی حه‌جی ئه‌مساڵ قسه‌ی كرد.

له‌به‌شێكی قسه‌كانیدا رایگه‌یاند: ئه‌مساڵ ده‌سته‌ی حه‌جی عیراق زۆر بێسه‌روبه‌ری پێوه‌دیاره‌و ته‌نانه‌ت هێشتا به‌رپرسه‌ باڵاكانی ئه‌و ده‌سته‌یه‌ نه‌هاتوون بۆ سعودیه‌ تا چاره‌سه‌ری كه‌موكورتیه‌ ئیداریه‌كانی سه‌فه‌ری حاجیانی عیراق و هه‌رێمی كوردستان بكه‌ن.

له‌به‌شێكی تری كۆبوونه‌وه‌كه‌دا باس له‌دیارده‌ی دزیكردن له‌حاجیانی هه‌رێم له‌شاری مه‌ككه‌ كراو به‌ڕێوه‌به‌ری گشتی حه‌ج و عومره‌ وتی: ئه‌م دیارده‌یه‌ ئه‌مساڵ زۆر بووه‌و جگه‌ له‌و حاجیانه‌ی كه‌پاره‌كانیان لێ دزراوه‌ ئێمه‌ی به‌رپرسانی حه‌جیش ئیحراج ده‌بین، چونكه‌ ناتوانین ئه‌و پاره‌یان هه‌مووی بۆ قه‌ره‌بوو بكه‌ینه‌وه‌و داوای كرد حاجیان زیاتر ئاگاداری خۆیان بن له‌كاتی به‌جێگه‌یاندنی ئه‌ركه‌ ئاینیه‌كانیان له‌شوێنه‌ قه‌ره‌باڵغه‌كانی ناو حه‌ره‌می كه‌عبه‌ی پیرۆزو شوێنه‌ گشتیه‌كانی شاری مه‌ككه‌.

له‌به‌شێكی تری كۆبوونه‌وه‌كه‌دا داوا له‌حاجیانی ئه‌مساڵی هه‌رێم كرا دیاری و كه‌لوپه‌لی زۆر نه‌كڕن له‌سعودیه‌، چونكه‌ ئه‌مساڵ وه‌ك ساڵانی رابردوو ئوتومبێلی بارهه‌ڵگرمان نیه‌ كه‌له‌رێگای وشكاییه‌وه‌ ئه‌و بڕه‌ زۆره‌ی خورماو ئاوی زه‌مزه‌م و كه‌لوپه‌لی جۆراوجۆرمان له‌سعودیه‌وه‌ بۆ بباته‌وه‌ بۆ كوردستان و هه‌ر حاجیه‌ ته‌نها رێگه‌ی پێده‌درێت جانتایه‌كی 25 كیلۆیی له‌كه‌لوپه‌ل له‌گه‌ڵ 10لیتر ئاوی زه‌مزه‌م له‌گه‌ڵ خۆی بباته‌وه‌و به‌رپرسانی حه‌ج داوایان له‌خاوه‌ن كۆمپانیاكانی حه‌ج و عومره‌ كرد حاجیه‌كانیان به‌م حاڵه‌ته‌ ئاشنا بكه‌ن و هه‌ر كێشه‌یه‌ك له‌فڕۆكه‌خانه‌ به‌هۆی زیادبوونی قورسایی كه‌لوپه‌لی حاجیان روبدات ئه‌وا خاوه‌ن كۆمپانیاكه‌ به‌رپرسیار ده‌بێت و حاجیه‌كه‌ش ده‌بێت غه‌رامه‌ بدات ئه‌گه‌رنا كه‌لوپه‌له‌كه‌ی بۆ بارناكرێت.

له‌به‌شێكی تری كۆبوونه‌وه‌كه‌دا ره‌خنه‌ له‌تیمه‌كانی پشكنینی ته‌ندروستی حاجیان له‌هه‌رێمی كوردستان گیرا به‌هۆی ئه‌وه‌ی له‌كاتی پشكنینی حاجیاندا ته‌نها سێ كه‌سیان گێڕاوه‌ته‌وه‌و رێگه‌یان داوه‌ به‌ده‌یان خه‌ڵكی په‌ككه‌وته‌و كه‌مئه‌ندام و نه‌خۆشی درێژخایه‌ن و نه‌خۆشی ده‌رونی له‌گه‌ڵ حاجیاندا بێنه‌ حه‌جی ئه‌مساڵ كه‌لێره‌ بوونه‌ته‌ هۆی كێشه‌ بۆ حاجیان و به‌رپرسانی حه‌ج و حه‌مله‌داره‌كان و ته‌نانه‌ت بوونه‌ته‌ هۆی كێشه‌ بۆ ئه‌و تیمه‌ پزیشكیه‌ی كه‌ئێستا یاوه‌ری حاجیانن.

PUKmedia تایبه‌ت