كه‌ی مووچه‌ی مامۆستایان ده‌درێت؟

به‌دڵنیاییه‌وه‌ هه‌فته‌ی ئایینده‌ ته‌واوی مووچه‌ی مامۆستایان ده‌درێت

به‌هۆی دواكه‌وتنی مووچه‌كانیان ئه‌مڕۆ 18-9-2014 له‌ شاری سلێمانی مامۆستایان بایكۆتی وانه‌وتنه‌وه‌یان له‌ هۆڵه‌كانی خوێندن كرد، ژماره‌یه‌كیش مامۆستا چوونه‌ به‌رده‌م نوسینگه‌ی سلێمانی په‌رله‌مانی كوردستان.

لای خۆیه‌وه‌ عیزه‌ت سابر ئه‌ندامی په‌رله‌مانی كوردستان له‌سه‌ر لیستی یه‌كێتیی نیشتمانیی كوردستان گوێی له‌ داوای ئه‌و مامۆستیانه‌ گرت و به‌ڵێنیدا كه‌ به‌دواداچون بۆ داواكانیان بكات.

راشیگه‌یاند: مامۆستایان مافی خۆیانه‌و ده‌بێت وه‌زاره‌تی په‌روه‌رده‌و وه‌زاره‌تی دارایی حكومه‌تی هه‌رێمی كوردستان به‌ زووترین كات مووچه‌ی مامۆستایان بدات.

هه‌ر له‌وچوارچێوه‌یه‌دا، ژماره‌یه‌ك مامۆستا به‌رده‌م به‌ڕێوه‌به‌رایه‌تی گشتی په‌روه‌رده‌ی پارێزگای سلێمانیان گرت و داوایانكرد مووچه‌یان پێبدرێت كه‌ ماوه‌ی 3 مانگه‌ وه‌ریان نه‌گرتووه‌، له‌لایه‌كی تریشه‌وه‌ هه‌ر ئه‌مڕۆ له‌ چه‌ند خوێندنگایه‌ك له‌ناو سه‌نته‌ری شاری سلێمانی مامۆستایان بایكۆتی وانه‌وتنه‌وه‌یان كردو پۆله‌كانیان به‌جێهێشت.

بۆ ئه‌و مه‌به‌سته‌ PUKmedia په‌یوه‌ندیكرد به‌ مامۆستا نه‌جمه‌دین عه‌لی به‌ڕێوه‌به‌ری گشتی په‌روه‌رده‌ی پارێزگای سلێمانی و رایگه‌یاند: به‌ڕێوه‌به‌ره‌ گشتییه‌كانی پارێزگاكانی هه‌رێمی كوردستان ئه‌مڕۆ له‌ كۆبوونه‌وه‌ی ئه‌نجومه‌نی وه‌زاره‌ت له‌گه‌ڵ وه‌زیری په‌روه‌رده‌ له‌ شاری هه‌ولێر گفتوگۆیان له‌وباره‌یه‌وه‌ كردووه‌و زانراوه‌ كه‌ له‌ ئێستادا سه‌رقاڵی ئاماده‌كردنی بڕی پێویستی مووچه‌ی مامۆستایانن.

وتیشی: به‌پێی چه‌ند زانیارییه‌ك، یه‌ك ملیار دینار ئاماده‌كراوه‌و كه‌مێك له‌بڕی مووچه‌ی مامۆستایان ماوه‌و ئه‌وه‌ش له‌م چه‌ند رۆژه‌دا دابینده‌كرێت و به‌دڵنیاییه‌وه‌ هه‌فته‌ی ئایینده‌ ته‌واوی مووچه‌ی مامۆستایان ده‌درێت.

PUKmedia عوسمان ئه‌بوبه‌كر