وڵاتی چیك مه‌شق به‌ فڕۆكه‌وانانی عیراق ده‌كات

له‌ئێستادا عیراق پێویستیه‌كی زۆری پێیه‌تی

وه‌زاره‌تی به‌رگری كۆماری چیك رایگه‌یاند 31 فرۆكه‌وانی عیراقی له‌ناوه‌ندێكی تایبه‌تی كۆماری چیك مه‌شق و راهێنانیان پێده‌كرێت و ئاماژه‌ بۆئه‌وه‌شده‌كات كه‌ هاوكارییه‌ سه‌ربازییه‌كانی وڵاته‌كه‌ی بۆ عیراق به‌رده‌وامی ده‌بێت.

وه‌زاره‌تی به‌رگری كۆماری چیك له‌راگه‌یه‌ندراوێكیدا ئاماژه‌ی بۆ ئه‌وه‌كردووه‌: كۆمپانیای لۆم براگی ره‌سمی كه‌ په‌یوه‌ندی راسته‌وخۆی به‌وه‌زاره‌تی به‌رگری ئه‌و وڵاته‌وه‌ هه‌یه‌ كاره‌كانی بۆ راهێنانی 31 فرۆكه‌وانی عیراقی ده‌ستپێده‌كات له‌ناوه‌ندی راهێنانی باردوێس كه‌له‌نزیك شاری براگی پایته‌ختی ئه‌و وڵاته‌یه‌.

هه‌روه‌ها راشیگه‌یاندوه‌: راهێنانه‌كان له‌كۆتایی ساڵی 2014 و سه‌ره‌تایی ساڵی 2015ه‌وه‌ ده‌ستپێده‌كه‌ن و راهێنانی ئه‌و فڕۆكه‌وانانه‌ له‌سه‌ر فرۆكه‌ی شمه‌ك و گواستنه‌وه‌ی كه‌ره‌سته‌ی پێویستی جه‌نگی و مرۆییه‌ كه‌له‌ئێستادا عیراق پێویستیه‌كی زۆری پێیه‌تی.

له‌راگه‌یه‌ندراوه‌كه‌دا ئه‌وه‌ش باسكراوه‌: ئه‌و جۆره‌ هاوكاریانه‌ به‌رده‌وام ده‌بێت و وڵاتی كۆماری چیك هه‌وڵده‌دات زۆرترین هاوكاری سه‌ربازی پێشكه‌ش به‌ وڵاتی عیراق بكات و له‌ئاینده‌شدا له‌چه‌ند بوارێكی تری سه‌ربازیدا راهێنان به‌سه‌ربازانی عیراقی ده‌كات.
 
PUKmedia سامان یاروه‌یس