لایه‌نه‌كانی عیراق له‌سه‌ر كاندیدانی وه‌زیرانی ناوخۆو به‌رگری رێكناكه‌ون

یه‌كلایكردنه‌وه‌ی كانديدانی وه‌زیری ناوخۆو به‌رگری و گه‌شتوگوزار بۆ دوای جه‌ژن دواده‌كه‌وێت

ئه‌مڕۆ 18-9- 2014 كۆبوونه‌وه‌ی ئاسایی ئه‌نجومه‌نی نوێنه‌رانی عیراق به‌ڕێوه‌ده‌چێت و تایبه‌ت ده‌بێت به‌ سوێندخواردنی ئه‌و په‌رله‌مانتارانه‌ی كه‌ تائێستا سوێندی یاساییان نه‌خواردوه‌، بۆهۆی ناكۆكی نێوان لایه‌نه‌ سیاسیه‌كانیش پرسی یه‌كلایكردنه‌وه‌ی كانديدانی وه‌زیری ناوخۆو به‌رگری و گه‌شتوگوزار بۆ دوای جه‌ژن دواده‌كه‌وێت.

د. فه‌رهاد قادر ئه‌ندامی ئه‌نجومه‌نی نوێنه‌رانی عیراق به‌ PUKmedia ی رایگه‌یاند: دانیشتنه‌كه‌ی ئه‌مڕۆی په‌رله‌مان تایبه‌ت ده‌بێت به‌ دوو ته‌وه‌رو له‌ ته‌وه‌ره‌ی یه‌كه‌مدا ئه‌و په‌رله‌مانتارانه‌ی كه‌ جێگره‌وه‌ن بۆ ئه‌و په‌رله‌مانتارانه‌ی بوون به‌ وه‌زیر سوێندی یاسایی ده‌خۆن و ئه‌و په‌رله‌مانتارانه‌شی كه‌ له‌ حكومه‌تی رابردوودا پۆستیان هه‌بووه‌و بوون به‌ په‌رله‌مانتار ئه‌مڕۆ سوێندی یاسایی ده‌خۆن.

وتیشی: هه‌ر له‌ كۆبوونه‌وه‌كه‌دا راپۆرتێك سه‌باره‌ت به‌ چالاكیه‌كانی ئه‌نجومه‌نی نوێنه‌رانی عیراق ده‌خوێندرێته‌وه‌ به‌ گفتوگۆی په‌رله‌مانتاران ده‌وڵه‌مه‌ند ده‌كرێت بۆ ئه‌وه‌ی بتوانرێت له‌ چوار ساڵی ئایینده‌دا كاری له‌سه‌ربكرێت و په‌رله‌مان باشترین خزمه‌ت به‌ كۆمه‌ڵانی خه‌ڵك بكات.
 
ئاماژه‌ی بۆئه‌وه‌شكرد: له‌ كۆبوونه‌وه‌ی رابردوودا سه‌رۆكی ئه‌نجومه‌نی نوێنه‌ران داوای له‌ سه‌رۆك وه‌زیرانی عیراق كرد كه‌ بۆ ئه‌مڕۆ كاندیدانی وه‌زیرانی ناوخۆو به‌رگری و گه‌شتوگوزاره یه‌كلایبكاته‌وه‌، به‌ڵام سه‌رۆك وه‌زیران ئه‌و داوایه‌ی ره‌تكرده‌وه‌و رایگه‌یاند كه‌ پێویستی به‌ كاتی زیاتره‌ بۆ رێكه‌وتن له‌سه‌ر ده‌ستنیشانكردنی ئه‌و كاندیدانه‌، بۆیه‌ پێده‌چێت سوێندخواردنی ئه‌و سێ وه‌زیره‌ دوابكه‌وێت بۆ دوای جه‌ژن.

له‌ دانیشتنی رۆژی سێ شه‌ممه‌ی رابردوو 16-9-2014  ده‌نگدان له‌سه‌ر دوو كاندید بۆ پۆستی وه‌زیری ناوخۆو وه‌زیری به‌رگری ئه‌نجامدرا كه‌ (ریاز غه‌ریب وه‌ك وه‌زیری وه‌زاره‌تی ناوخۆ) له‌سه‌ر پشی لایه‌نی شیعه‌و هه‌روه‌ها (جابر جابری وه‌ك وه‌زیری وه‌زاره‌تی به‌رگری) له‌سه‌ر پشكی سوننه‌ كاندید كرابوون، به‌هۆی رێككنه‌كه‌وتنی لایه‌نه‌ سیاسیه‌كان هیچ یه‌كێك له‌و دوو كاندیده‌ ده‌نگی پێویستیان به‌ده‌ستنه‌هێنا، به‌ هه‌مان شێوه‌ كاندیدی وه‌زیری گه‌شتوگوزاریش ده‌نگی پێویستی به‌ده‌ستنه‌هێناو ره‌تكرایه‌وه‌.

PUKmedia هۆزان فاتیح