وۆركشۆپێك تایبه‌ت به‌تواناسازی ئافره‌تان و كچانی لادێنشین

ماوه‌ی دوو رۆژ به‌رده‌وامده‌بێت

ئه‌مڕۆ 15/9/2014 له‌ هۆڵی هۆتێلی ڤان رۆیال له‌ هه‌ولێر، چالاكیه‌كانی وۆركشۆپێكی ئاژانسه‌كانی نه‌ته‌وه‌ یه‌كگرتووه‌كان به‌ هاوبه‌شی له‌گه‌ڵ ئه‌نجومه‌نی باڵای كاروباری خانمان و وه‌زاره‌تی پلاندانان و چه‌ند وه‌زاره‌تێكی تری په‌یوه‌ندیداری حكومه‌تی هه‌رێمی كوردستان، تایبه‌ت به‌ تواناسازی ئافره‌تان و كچانی لادێنشین له‌ هه‌رێمی كوردستان ده‌ستی به‌ كاره‌كانی كرد.

وتاری ده‌ستپێكی سه‌ره‌تای وۆركشۆپه‌كه‌ له‌لایه‌ن په‌خشان زه‌نگه‌نه‌ ئه‌مینداری گشتی ئه‌نجومه‌نی باڵای كاروباری خانمان پێشكه‌شكراو تیایدا ئاماژه‌ی بۆ گرنگی ئه‌م پرۆژه‌یه‌ كرد، بۆ گه‌شه‌پێدان و تواناسازی كچان و ژنانی لادێنشین له‌ڕووی كۆمه‌ڵایه‌تی و ئابووری و په‌روه‌رده‌یی و ته‌ندروستییه‌وه‌.

ئه‌مینداری گشتی ئه‌نجومه‌نی خانمان ئاماژه‌ی بۆ ئه‌وه‌شكرد كه‌ سه‌ره‌ڕای بایه‌خدانی ئاژانسه‌كانی نه‌ته‌وه‌ یه‌كگرتووه‌كان و لایه‌نه‌ په‌یوه‌ندیداره‌كان به‌ پرسی ئاواره‌كان له‌ هه‌رێمی كوردستان، ئه‌م پرۆژانه‌ش بۆ تواناسازی ژنانی لادێنیشین له‌ چالاكییه‌ گرنگ و بایه‌خداره‌كان ده‌بێت.

له‌لایه‌ن خۆیه‌وه‌ زاگرۆس فه‌تاح نوێنه‌ری وه‌زیری پلاندانان وێڕای ده‌ستخۆشی و به‌رز نرخاندنی ئه‌م پرۆژه‌یه‌، رۆڵی سه‌رجه‌م لایه‌نه‌ نێوده‌وڵه‌تی و ناوخۆییه‌كانی بۆ سه‌رخستنی به‌گرنگ وه‌سفكرد.

پاشان جۆرج جۆرجی نوێنه‌ری     ئاژانسی (UNFPA)ی سه‌ر به‌ نه‌ته‌وه‌ یه‌كگرتووه‌كان، له‌ رێگه‌ی داتاشۆ ناوه‌ڕۆكی پرۆژه‌كه‌ی خسته‌ڕوو كه‌ بایه‌خ به‌ سه‌رجه‌م لایه‌نه‌كانی تواناسازی ژنان ده‌دات له‌ ناوچه‌ لادێنشینه‌كاندا.

جێی باسه‌ هه‌ریه‌ك له‌ ئاژانسه‌كانی (UNFPA)، (UN-Women)، (UNESCO)، (FAO) له‌م پرۆژه‌یه‌دا به‌شدارن و ئه‌م وۆركشۆپه‌ش ماوه‌ی دوو رۆژ به‌رده‌وامده‌بێت.

PUKmedia دلێر ئیبراهیم - هه‌ولێر