بێ به‌رامبه‌ر كورسی بۆ خوێندكارانی كه‌ركوك و ناوچه‌ دابڕێنراوه‌كان دابینده‌كرێت

ته‌رخانكردنی (26) كورسی خویندنی بێ به‌رامبه‌ر

زانكۆی (لوبنانی فه‌ڕه‌نسی - هه‌ولێر)یش كورسی خوێندن بۆ خوێندكارانی كه‌ركوك و ناوچه‌ دابڕێندراوه‌كان دابینده‌كات

دوای ئه‌وه‌ی له‌ به‌رواری 16/7/2014 وه‌زاره‌تی خوێندنی باڵاو توێژینه‌وه‌ی زانستی له‌ نووسراوێكدا به‌ ژماره‌ (5/13887) داوای له‌ زانكۆ تایبه‌تییه‌كان كرد، له‌به‌ر رۆشنایی ئه‌و گۆڕانكارییانه‌ی به‌سه‌ر عیراق و ناوچه‌ كوردستانییه‌كانی ده‌ره‌وه‌ی هه‌رێمدا هاتووه‌، ژماره‌یه‌ك كورسی خوێندن به‌پێی توانای زانكۆكانیان به‌بێ به‌رامبه‌ر بۆ خوێندكارانی كه‌ركوك و ناوچه‌ كوردستانییه‌كانی ده‌ره‌وه‌ی هه‌رێمی كوردستان دابینبكه‌ن، له‌ به‌رامبه‌ردا ژماره‌یه‌ك له‌ زانكۆكان به‌ده‌م ئه‌و داواكارییه‌ی وه‌زاره‌ته‌وه‌ هاتن و له‌وچوارچێوه‌یه‌شدا سه‌رۆكایه‌تی زانكۆی لوبنانی فه‌ڕه‌نسی/ هه‌ولێر ژماره‌یه‌ك كورسی خوێندن بۆ خوێندكارانی كه‌ركوك و ناوچه‌ دابڕێندراوه‌كان كرد.


سه‌رۆكایه‌تی زانكۆی لوبنانی فه‌ڕه‌نسی/ هه‌ولێر له‌ نووسراوێكدا كه‌ بۆ وه‌زاره‌تی خوێندنی باڵاو توێژینه‌وه‌ی زانستی-یان ره‌وانه‌كردووه‌، بڕیاریانداوه‌ به‌ ته‌رخانكردنی (26) كورسی خویندنی بێ به‌رامبه‌ر، له‌گه‌ڵ (52) كورسی تر به‌ داشكاندنی (50%) نرخی خوێندن بۆ ده‌رچووانی پۆلی شه‌شه‌می ئاماده‌یی كه‌ دانیشتوی كه‌ركوك و ناوچه‌ كوردستانییه‌كانی ده‌ره‌وه‌ی هه‌رێمی كوردستانن.


له‌ به‌رامبه‌ردا ئه‌و به‌ده‌نگه‌وه‌هاتنه‌ی زانكۆی لوبنانی فه‌ڕه‌نسی/ هه‌ولێر، د.یوسف گۆران وه‌زیری خوێندنی باڵاو توێژینه‌وه‌ی زانستی له‌ نووسراوێكدا به‌ ژماره‌ (1096) سوپاس و پێزانینی وه‌زاره‌تی خوێندنی باڵاو توێژینه‌وه‌ی زانستی پێشكه‌ش به‌ سه‌رۆكایه‌تی زانكۆی جیهان/ دهۆك كردووه‌ له‌پای ته‌رخانكردنی ئه‌و ژماره‌ كورسیه‌ی خوێندن بۆ خوێندكارانی كه‌ركوك و ناوچه‌ كوردستانییه‌كانی ده‌ره‌وه‌ی هه‌رێم، هه‌روه‌ك هیواشی خواستووه‌ كه‌ نموونه‌ی ئه‌وجۆره‌ چالاكیانه‌ زیاتر بێت بۆ زیاتر خزمه‌تكردن به‌ بواری زانست و پێگه‌یاندن له‌و ناوچانه‌.


PUKmedia  راگه‌یاندنی وه‌زاره‌تی خویندنی باڵاو توێژینه‌وه‌ی زانستی