تاوانبارانی كه‌یسی مه‌لاله‌ یوسفی ده‌ستگیرده‌كرێن

مه‌لاله‌ یوسف زا

سوپای پاكستان رایگه‌یاند كه‌ رۆژی هه‌ینی 12-9-2014 له‌ ئۆپه‌راسیۆنێكی هاوبه‌شدا، هێزێكی ئه‌منی تایبه‌ت و پۆلیسی ئه‌و وڵاته‌ سه‌ركه‌وتوو بوون له‌ ده‌ستگیركردنی 10 تاوانیاری په‌یوه‌ست به‌ ته‌قه‌كردن له‌ چالاكوانی مه‌ده‌نی له‌ بواری مافه‌كانی منداڵ و برینداركردنی، هه‌روه‌ها ئه‌وه‌شیان ئاشكراكردووه‌ كه‌ سه‌رۆكی ئه‌و گروپه‌ ناوی (مه‌ولانا فه‌زلوڵڵا)یه‌و له‌لایه‌ن رێكخراوی تیرۆرستی تاڵیبانه‌وه‌ سه‌رپه‌رشتی ئه‌و پرۆسه‌یه‌ كراوه‌و تاوانباران دانیان به‌ تاوانه‌كه‌یاندا ناوه‌.

مه‌لاله‌ یوسف زا له‌ رۆژی 9ی ئۆكتۆبه‌ری ساڵی 2012 داو له‌ ته‌مه‌نی 15 ساڵاندا له‌لایه‌ن چه‌ند كه‌سێكی نه‌ناسراوه‌وه‌ ته‌قه‌ی لێكراو به‌سه‌ختی برینداركرا، دوای چه‌ند نه‌شته‌رگه‌رییه‌ك خرایه‌ ژێر چاودێری ته‌ندروستییه‌وه‌و ژیانی تا ئه‌وپه‌ڕی مه‌ترسی و نزیكبوونه‌وه‌ له‌ مه‌رگ ده‌ڕۆیشت، هه‌ربۆیه‌ بۆ چاره‌سه‌ری گونجاوتر ره‌وانه‌ی وڵاتی به‌ریتانیا كراو له‌لایه‌ن ژماره‌یه‌ك پزیشكی گه‌وره‌ی ئه‌و وڵاته‌وه‌ ئه‌وپه‌ڕی توانا خرایه‌گه‌ڕ بۆ ئه‌وه‌ی هیوای ژیانی بۆ بگه‌ڕێته‌وه‌و پزیشكه‌كانیش سه‌ركه‌وتنیان له‌و هه‌وڵانه‌یاندا تۆماركرد.

دوابه‌دوای ئه‌و كرده‌وه‌یه‌، سه‌ركرده‌كانی تاڵیبان له‌ به‌یاننامه‌یه‌كدا ئه‌و كرده‌وه‌ تیرۆرستییه‌یان له‌ئه‌ستۆ گرت و هۆكاره‌كانیان گه‌ڕانده‌وه‌ بۆ ئه‌وه‌ی كه‌ مه‌لاله‌ یوسف زا له‌ شێوه‌یه‌كی به‌ناوی خوازراو له‌سه‌ر ره‌وشی منداڵانی ژێر ده‌سه‌ڵاتی تاڵیبان و له‌ سایتی bbc بابه‌تی ره‌خنه‌ ئامێزو هه‌روه‌ها ئاماری مه‌ترسی له‌سه‌ر ژیانی ئه‌و منداڵانه‌ی بڵاوكردووه‌ته‌وه‌، گه‌وره‌ترین به‌ڵگه‌شی ئاشكرا كردبوو كه‌ زیاتر له‌ 200 خوێندنگا له‌لایه‌ن تاڵیبانه‌وه‌ تووشی وێرانكاری بوون و ئاماژه‌ی به‌ دروستبوونی گه‌وره‌ترین قه‌یرانی مرۆیی كردبوو له‌ناو وڵاتی پاكستان.

مه‌لاله‌ دوای ئه‌وه‌ی ئه‌و كرده‌وه‌ تیرۆرسته‌ی له‌ به‌رامبه‌ردا ئه‌نجامدرا، خه‌ڵاتی مافی مرۆڤی پاكستانی به‌ده‌ستهێناو دواتر خه‌ڵاتی ئاشتی یه‌كێتی ئه‌وروپای (ساخارۆف)ی پێدرا، له‌ ئێستاشدا له‌ وڵاتی پاكستان خاوه‌ن ناوه‌ندێكی فێركارییه‌ بۆ منداڵانی وڵاته‌كه‌ی.

PUKmedia  ئا/ سامان یاروه‌یس