سلێمانی.. خولێكی تایبه‌ت به‌ میدیاكاران ده‌كرێته‌وه‌

سه‌باره‌ت به‌ گرنگیدان به‌ پرسی كه‌مئه‌ندامان كرايه‌وه‌

رۆژی 27-8-2014 ده‌زگای وارفین بۆ پرسی ژنان له‌ژێر ناونیشانی (به‌ره‌وه‌ سیاسه‌تێكی میدیایی ئامانجدار بۆ پرسی كه‌مئه‌ندامان) له‌ هۆتێل ئه‌رین-ی شاری سلێمانی خولێكی تایبه‌تی بۆ میدیاكاران سه‌باره‌ت به‌ گرنگیدان به‌ پرسی كه‌مئه‌ندامان كرده‌وه‌.

خوله‌كه‌ به‌ئاماده‌بوونی ژماره‌یه‌ك له‌ كه‌مئه‌ندامان به‌ڕێووه‌چوو، له‌لایه‌ن چه‌ند رۆژنامه‌نوس و چالاكی كۆمه‌ڵگه‌ی مه‌ده‌نیه‌وه‌ تیشك خرایه‌ سه‌ر كێشه‌و گرفته‌كانی ژیانی كه‌مئه‌ندامان و ئه‌ركی میدیا بۆ به‌دواداچوونی گرفته‌كانیان و هۆشیاركردنه‌وه‌ی هاووڵاتیان له‌ ماف و  ئه‌رك و یاساكانی تایبه‌ت به‌ كه‌مئه‌ندامان، هه‌روه‌ها  باس له‌ كاریگه‌ری میدیا كرا بۆ گۆڕینی تێڕوانینی كۆمه‌ڵگه‌، تا به‌چاوی به‌زه‌ییه‌وه‌ سه‌یری كه‌مئه‌ندامان نه‌كرێت، به‌ڵكو كاربۆ پیشاندانی تواناكانیان بكرێت و هه‌وڵی تێكشكاندنی بۆچوونه‌ سلبیه‌كان به‌رامبه‌ر به‌ كه‌مئه‌ندامان بدرێت.

 به‌پێویستیش زانرا میدیاكان هه‌وڵی به‌شداریپێكردنی كه‌سانی كه‌مئه‌ندام و خاوه‌ن توانا بده‌ن بۆئه‌وه‌ی له‌ڕێگای خۆیانه‌وه‌ كار بۆ  گۆڕینی تێڕوانینی كۆمه‌ڵگه‌ بكه‌ن، چونكه‌ كه‌مئه‌ندامان توێژێكی گرنگی كۆمه‌ڵگه‌ن و ده‌توانن له‌ زۆربه‌ی كایه‌كانی ژیاندا خزمه‌تبكه‌ن.

كه‌مئه‌ندامانی به‌شداربووی خوله‌كه‌ ره‌خنه‌ی ئه‌وه‌یان له‌ كه‌ناڵه‌كانی راگه‌یاندن گرت كه‌ به‌رده‌وام له‌ كاتی ناڕه‌زایی و خۆپیشاندانه‌كاندا گرنگی به‌ پرسی كه‌مئه‌ندامان ده‌ده‌ن له‌كاتێكدا رۆژانه‌ به‌ده‌ست چه‌ندین كێشه‌و گرفته‌وه‌ ده‌ناڵێنن و پێویستیان به‌ ئاوڕلێدانه‌وه‌ هه‌یه‌، هه‌روه‌ها داوایانكرد پرسی كه‌مئه‌ندامان بكرێته‌ پرسێكی گرنگ و له‌ هه‌ندێك لایه‌ندا بچوكنه‌كرێته‌وه‌، پێیان وابوو میدیا رۆڵێكی به‌رچاو كاریگه‌ر ده‌بینێت له‌ گه‌یاندنی گرفته‌كانیان به‌ كۆمه‌ڵگه‌ به‌گشتی و لایه‌نی په‌یوه‌ندیدار به‌تایبه‌تی، به‌پێویستیان زانی كردنه‌وه‌ی خولی تایبه‌ت به‌ هۆشیاركردنه‌وه‌ی میدیاكاران له‌ گرنگیدان به‌ پرسی كه‌مئه‌ندامان به‌رده‌وامی پێبدرێت.

له‌ماوه‌ی به‌ڕێوه‌چوونی خوله‌كه‌دا كه‌ دوو رۆژ به‌رده‌وام بوو له‌لایه‌ن رۆژنامه‌نوس و چالاكوانانی كۆمه‌ڵگه‌ی مه‌ده‌نیه‌وه‌ زانیاری پێویست سه‌باره‌ت به‌ چۆنێتی روماڵكردنی  هه‌واڵه‌كانی تایبه‌ت به‌ كه‌مئه‌ندامان خرایه‌ڕوو.

له‌وباره‌ی كردنه‌وه‌ی خوله‌كه‌وه‌ خه‌نده‌ زرار به‌ڕێوه‌به‌رى به‌رنامه‌ی ده‌زگاى وارفین بۆ پرسى ژنان به‌ PUKmedia ی رایگه‌یاند: ئامانج له‌ كردنه‌وه‌ی ئه‌م خولانه‌ هۆشیاركردنه‌وه‌ی میدیاكارانه‌ بۆئه‌وه‌ی له‌ڕێگای  كاركردن له‌ پرسی كه‌مئه‌ندامان هه‌وڵ بۆ گۆڕینی تێڕوانین و بۆچوونی كۆمه‌ڵگه‌ سه‌باره‌ت به‌ كه‌مئه‌ندامان بدرێت به‌وه‌ی كه‌مئه‌ندامان توێژكی چالاكی كۆمه‌ڵگه‌ن و توانایی كاركردن و خستنه‌ڕووی به‌هره‌كانیان هه‌یه‌و شایه‌نی رێزن نه‌ك به‌زه‌یی، بۆیه‌ پێویسته‌ میدیا به‌ به‌رپرسیارێتیه‌وه‌ مامه‌ڵه‌ له‌گه‌ڵ پرسه‌كانیان بكات كه‌ئه‌وه‌ش ته‌نها به‌ چه‌ند به‌رنامه‌یه‌ك ناكرێت به‌ڵكو پێویستی به‌  كارو به‌دواداچوونی به‌رده‌وام  هه‌یه‌.

وتیشی:  ئه‌م خوله‌ له‌ هه‌ریه‌ك له‌ شاره‌كانی دهۆك و سلێمانی به‌ڕێوه‌چووه‌و بڕیاره‌ له‌ شاری هه‌ولێریش بكرێته‌وه‌.

PUKmedia  هۆزان فاتیح