سلێمانی.. 20 سواڵكه‌ر ده‌ستگیرده‌كرێن

هه‌نگاوی پێویست ده‌گیرێته‌به‌ر بۆ بنه‌بڕكردنی دیارده‌كه‌ له‌ سلێمانی

له‌ هه‌ڵمه‌تێكی لیژنه‌ هاوبه‌شه‌كانی قائیمقامیه‌تی سلێمانی و هێزه‌كانی پۆلیسدا له‌ شاری سلێمانی، ژماره‌یه‌كی به‌رچاو سواڵكه‌ر ده‌ستگیركران و بڕیاره‌ هه‌ڵمه‌ته‌كه‌ به‌رده‌وامبێت تا ئه‌وكاته‌ی دیارده‌كه‌ بنه‌بڕده‌كرێت.

به‌ مه‌به‌ستی رێگریكردن له‌ سواڵكردن و بنه‌بڕكردنی دیارده‌كه‌ له‌ شاری سلێمانی، ئه‌مڕۆ 22-8-2014 له‌سه‌ر فه‌رمانی قائیمقامی سلێمانی هه‌ڵمه‌تێكی به‌رفراوان به‌ڕێوه‌چوو بۆ ده‌ستگیركردنی هه‌موو ئه‌و كه‌سانه‌ی سه‌رقاڵی سواڵكردنن.

له‌و هه‌ڵمه‌ته‌ی لیژنه‌ هاوبه‌شه‌كانی قائیمقامیه‌تی سلێمانیدا كه‌ به‌ هاوكاری هێزه‌كانی پۆلیس و كارمه‌ندانی هاتووچۆ به‌ڕێوه‌چوو، له‌ مزگه‌وت و شه‌قامه‌كانی شاری سلێمانیدا ژماره‌یه‌كی زۆر سواڵكه‌ر ده‌ستگیركران و بۆ لێپرسینه‌وه‌ی یاسایی له‌گه‌ڵیان ره‌وانه‌ی بنكه‌كانی پۆلیس كران و بڕیاره‌ لێكۆڵینه‌وه‌ی ته‌واویان له‌گه‌ڵدا بكرێت، ئه‌و كه‌سانه‌ی كه‌ هه‌ژاری پاڵنه‌ریان بووه‌ بۆ سواڵكردن له‌لایه‌ن به‌ڕێوه‌به‌رایه‌تی چاودێری كۆمه‌ڵایه‌تییه‌وه‌ هاوكاریان بكرێت و ئه‌و كه‌سانه‌ش كه‌ سواڵكردنیان كردووه‌ به‌ پیشه‌ بۆ په‌یداكردنی پاره‌ لێپرسینه‌وه‌ی توندیان له‌گه‌ڵدا بكرێت و به‌هیچ شێوه‌یه‌ك رێگه‌یان پێنه‌درێت جارێكی تر سواڵ بكه‌ن و به‌ڵێننامه‌ش به‌ هه‌موو ئه‌و كه‌سانه‌ پڕبكرێته‌وه‌ كه‌ ده‌ستگیركراون.

له‌وباره‌یه‌وه‌ سۆران عه‌بدولغه‌فور سه‌رۆكی لیژنه‌ هاوبه‌شه‌كانی قائیمقامیه‌تی سلێمانی به‌ PUKmedia ی راگه‌یاند: له‌ هه‌ڵمه‌ته‌كه‌دا زیاتر له‌ 20 سواڵكه‌ریان ده‌ستگیركردووه‌و له‌سه‌ر فه‌رمانی قائیمقامی سلێمانی هه‌ڵمه‌ته‌كه‌ به‌رده‌وامده‌بێت بۆ ده‌ستگیركردنیكردنی ئه‌و كه‌سانه‌ی كه‌ سواڵده‌كه‌ن و هه‌موو هه‌نگاوێكی پێویست ده‌گیرێته‌به‌ر بۆ بنه‌بڕكردنی دیارده‌كه‌ له‌ شاری سلێمانی.

PUKmedia