حاكم قادر: جه‌ژن ده‌كه‌ینه‌ هه‌وێنی برایه‌تی و پێكه‌وه‌ژیان

پاڕانه‌وه‌ ئه‌م ئه‌زموونه‌ی هه‌رێمی كوردستان پارێزراوبێت

پاشنیوه‌ڕۆی ئه‌مڕۆ 26-7-2014 حاكم قادر حه‌مه‌جان كارگێڕی مه‌كته‌بی سیاسیی یه‌كێتیی نیشتمانیی كوردستان سه‌ردانی مزگه‌وتی گه‌وره‌ و خانه‌قای سلێمانی كرد و له‌لایه‌ن مامۆستایانی ئایینیه‌وه‌ پێشوازی لێكرا.

سه‌ره‌تا حاكم قادر به‌یاوه‌ری شێخ سالاری حه‌فید سه‌ردانی مزگه‌وتی گه‌وره‌ی كرد و پیرۆزبایی هاتنی جه‌ژنی ره‌مه‌زانی پیرۆزی له‌ گه‌لی كوردستان به‌گشتی و موسوڵمانان به‌تایبه‌تی كرد و رایگه‌یاند: پێویسته‌ ئه‌م بۆنه‌ پیرۆزه‌ بكه‌ینه‌ هه‌وێنی برایه‌تی و پێكه‌وه‌ژیانی زیاتر و ره‌تكردنه‌وه‌ی توندڕه‌ویی و تیرۆر و تۆقاندن.

وتیشی: له‌ئێستادا عیراق و به‌شێك له‌ ناوچه‌ كوردستانیه‌كان روبه‌ڕووی تیرۆر و تۆقاندن بۆته‌وه‌ و به‌ناوی ئایینی پیرۆزی ئیسلامه‌وه‌ كاری دڕندانه‌ و له‌ناوبردن و ده‌ربه‌ده‌ركردنی كورد و ئێزدیی و شه‌به‌ك و خوشك و برا مه‌سیحییه‌كان له‌ نه‌ینه‌واو ناوچه‌كانی دیكه‌ ده‌كه‌ن و مزگه‌وت و مه‌زاری پێغه‌مبه‌ران ده‌ته‌قێننه‌وه‌.

حاكم قادر رۆڵی مامۆستا و پیاوانی ئایینی له‌ مزگه‌وتی گه‌وره‌ی سلێمانی به‌رزنرخاند له‌ پێگه‌یاندن و فێركردن له‌ ئێستا و رابردوودا و هیوای خواست رۆڵی مزگه‌وتی گه‌وره‌ وه‌ك سه‌نته‌ری پێگه‌یاندن په‌ره‌ی پێبدرێت.

دواتر حاكم قادر سه‌ردانی مزگه‌وتی خانه‌قای كرد و له‌لایه‌ن مامۆستا و وتاربێژی مزگه‌وته‌كه‌وه‌ پێشوازی لێكرا و پیرۆزبایی جه‌ژنی لێكردن و له‌وته‌یه‌كی كورتدا رۆڵی مامۆستایانی ئایینی و ناوه‌نده‌ ئایینیه‌كانی به‌رزنرخاند له‌ هۆشیار كردنه‌وه‌ و پێگه‌یاندن.

 وتی: ئه‌مڕۆ پێویست ده‌كات ئه‌و رۆڵه‌ زیاتر به‌رجه‌سته‌ بكه‌ن كه‌ تیرۆریستان به‌ناوی پیرۆزی ئیسلامه‌وه‌ كاری دژ به‌مرۆڤایه‌تی و به‌ها ئاینییه‌كان ده‌كه‌ن.

هه‌روه‌ك به‌بۆنه‌ی نزیكبوونه‌وه‌ی جه‌ژن و به‌ڕێكردنی مانگی پیرۆزی ره‌مه‌زانه‌وه‌، كارگێڕی مه‌كته‌بی سیاسیی هاوكاری پێشكه‌ش به‌ مامۆستایانی ئایینی و قۆرئان خوێنان و خزمه‌تكارانی مه‌رقه‌د و مزگه‌وتی گه‌وره‌ و خانه‌قا كرد و پیرۆزبایی جه‌ژنی لێكردن.

لای خۆشیانه‌وه‌ مامۆستا و قورئان خوێنان سوپاسی سه‌ردان و هاوكارییه‌كه‌ی كارگێڕی مه‌كته‌بی سیاسییان كرد و له‌خوای گه‌وره‌ پاڕانه‌وه‌ كه‌ ئه‌م ئه‌زموونه‌ی هه‌رێم و هێزی پێشمه‌رگه‌ی كوردستان پارێزراوبن، هه‌روه‌ك ته‌ئكیدیان كرده‌وه‌ كه‌ ئه‌و ره‌فتارانه‌ی تیرۆریستان دوورن له‌ ئایین و به‌های پیرۆزی ئیسلام.

PUKmedia