هه‌ولێر.. پیاوێك خۆی و ژنه‌كه‌ی و ژن خوشكێكی بریندار ده‌كات

له‌ئێستادا باری ته‌ندروستی ژنه‌كه‌ی و ژن خوشكه‌كه‌ی جێگیره‌

وته‌بێژی پۆلیسی هه‌ولێر رایده‌گه‌یه‌نێت، كه‌مێك پێش ئێستا له‌ گه‌رِه‌كی كارێزانی شاری هه‌ولێر پیاوێك ته‌قه‌ له‌ ژنه‌كه‌ی و ژن خوشكێكی كردو دواتریش دوو فیشه‌كی به‌خۆیه‌وه‌ ناو له‌ئێستاشدا هه‌رسێكیان ره‌وانه‌ی نه‌خۆشخانه‌ی فریاكه‌وتنی هه‌ولێر كراون.

رائید كاروان عه‌بدول كه‌ریم وته‌بێژی پۆلیسی هه‌ولێر به‌ PUKmedia ی راگه‌یاند: دوای ئه‌وه‌ی كه‌ له‌سه‌عات 3:30 خوله‌كی ئه‌م دوانیوه‌ڕۆیه‌دا به‌رواری 26-7-2014 مه‌فره‌زه‌كانمان له‌ رووداوێكی ته‌قه‌كردن له‌ گه‌رِه‌كی كارێزانی شاری هه‌ولێر ئاگاداركرانه‌وه‌، مه‌فره‌زه‌كانمان چوونه‌ شوێنی رووداوه‌كه‌و ده‌ركه‌وت كه‌ هاووڵاتییه‌ك كێشه‌ی له‌گه‌ڵ ماڵی خه‌زووریدا هه‌یه‌ و به‌و هۆیه‌وه‌ ده‌چێته‌ سه‌ریان و ته‌قه‌یان لێده‌كات.

وتیشی: له‌ ئه‌نجامی ئه‌و ته‌قانه‌دا، ئه‌و هاووڵاتیيه‌ خێزانه‌كه‌ی خۆی و ژن خوشكێكی بریندار ده‌كات و دواتر دوو فیشه‌كیش به‌ خۆیه‌وه‌ ده‌نێت.

ئه‌وه‌شی خسته‌ڕوو: له‌ئێستادا باری ته‌ندروستی ژنه‌كه‌ی و ژن خوشكه‌كه‌ی جێگیره‌، به‌ڵام باری ته‌ندروستی خۆی ناجێگیره‌و لێكۆڵینه‌وه‌ش له‌ رووداوه‌كه‌ ده‌ستیپێكردوه‌.

PUKmedia دیار ستار