هه‌ڵبژاردنی د. فوئاد مه‌عسوم خه‌رپانییه‌كانی خۆشحاڵكرد

له‌رابردووشدا دكتۆر فواد مه‌عسووم چه‌ندین خزمه‌ت گوزاری پێشكه‌ش به‌ گونده‌كه‌ كردووه‌

به‌دووری كه‌متر له‌ هه‌شت كلۆمه‌ترو له‌ بناری شاخه‌كانی قه‌ڵارێزین و به‌نه‌ن و چه‌ند شاخێكی دیكه‌ گوندێك هه‌یه‌ ناوی (خه‌رپانیه‌) كه‌ شوێنگه‌ی ئه‌سڵی بنه‌ماڵه‌ی مه‌لا  مه‌عسومه‌ كه‌ باوی د.فواد مه‌عسوم سه‌رۆك كۆماری نوێی عیراق ده‌كات و ئه‌وان ده‌ڵین مایه‌ی شانازمانه‌ له‌ گونده‌كه‌ماندا كه‌سێك ده‌بێته‌ سه‌رۆك كۆماری عیراق و هه‌میشه‌ش ئاماده‌ین بۆ هه‌ر كارێك كه‌ به‌خزمه‌ت گه‌یاندن بێت به‌ ئاراسته‌ی دكتۆر فوئادی هاو گوندمان .

جه‌مال حسێن هه‌ورامی كه‌ پێشمه‌رگه‌یه‌كی دێرینی گونده‌كه‌یه‌ ده‌ڵێت: خه‌رپانی  گوندێك بووه‌ له‌ مێژه‌وه‌ تاوه‌كو ئێستا شوێن ده‌ستی له‌ كایه‌ جیاوازه‌كانی كۆمه‌ڵگادا دیار بووه‌ له‌ سه‌رده‌مانێكدا مه‌لا مه‌عسوم و مه‌لا عه‌بدوڵڵا و چه‌ند مامۆستایه‌كی دیكه‌ خاوه‌ن حوجره‌ بوون، له‌ گونده‌كه‌دا و ده‌یان زاناو مورید و زاهید روویان له‌ گونده‌كه‌ كردووه‌ .

ده‌شڵێت د.فواد مه‌عسوم به‌رده‌وام سه‌ردانی خه‌رپانی كردووه‌و هه‌ر جارێك رێگه‌ی كه‌وتبێته‌ هه‌ڵه‌بجه‌ سه‌ردانی كردوین و چه‌ندین جاریش جه‌ختی له‌وه‌ كردۆته‌وه‌ كه‌  گۆڕی زۆرێك له‌ بنه‌ماڵه‌كه‌ی  له‌ گوندی خه‌رپانیه‌ .

كه‌مال هه‌ورامی نوسه‌رو رووناكبیری خه‌رپانی ده‌ڵێت: بێگومان كه‌سایه‌تی د.فواد مه‌عسوم كه‌سایه‌تیه‌كه‌ شایسته‌یه‌ به‌ سه‌روًك كۆماری و له‌ خه‌باتی شاخ و شاردا ئه‌و خاوه‌ن بیرو ئه‌ندێشه‌یه‌كی جوان بووه‌ ، ئێمه‌ وه‌ك خه‌رپانه‌یه‌كان شانازی ده‌كه‌ین، نه‌وه‌یه‌كی گونده‌كه‌مان له‌ بازنه‌یه‌كی فراواندا پێشكه‌ش به‌ كوردستان و عیراقیه‌كان ده‌كه‌ین دڵنیاین د.فواد زۆر جوان رۆڵده‌گێڕێت .

شێخ ساحب شێخ حه‌مه‌ غه‌ریب دانشتوی گونده‌كه‌ و له‌ گوندی خه‌رپانی به‌ PUKmedia ی راگه‌یاند: ئێمه‌ گه‌لێك خۆشحاڵین دكتۆر فواد  بۆته‌ سه‌رۆك كۆماری عیراق و ئه‌وه‌ شانازیه‌كه‌ی گه‌وره‌یه‌ بۆ گه‌لی كورد به‌ گشتی و گونده‌كه‌ی ئێمه‌ به‌ تایبه‌تی .

وتیشی: بنه‌ماڵه‌ی د.فواد خاوه‌ن كه‌سانی زیره‌ك و به‌توانا بوون و تائیستاش زیره‌كی و به‌توانایان باس ده‌كرێت .

ئه‌گه‌رچی دكتۆر فواد مه‌عسوم له‌ ساڵی 1935 له‌  قه‌زای كۆیه‌ له‌دایكبووه‌، به‌ڵام مه‌لا مه‌عسوم باوكی له‌ گوندی خورپانی ژیاوه‌ و له‌ ساڵه‌كانی 1900 وه‌ ئه‌و گونده‌ی له‌به‌ر ده‌سه‌ڵاتی ئه‌و كاته‌ی ده‌ربه‌گه‌یاتی چه‌ند كه‌سێكی ده‌ره‌وه‌ی گونده‌كه‌وه‌ جێ هێشتووه‌ و چۆته‌ خانه‌قین و پاشان له‌ كۆیه‌ نیشته‌جێ بووه‌، به‌ڵام گۆڕی به‌شێكی بنه‌ماڵه‌كه‌یان ئیستاشی له‌گه‌ڵدا بیت له‌ گونده‌كه‌دایه‌ .

له‌رابردووشدا دكتۆر فواد مه‌عسووم چه‌ندین خزمه‌ت گوزاری پێشكه‌ش به‌ گونده‌كه‌ كردووه‌ و ئیستاشی له‌گه‌ڵ دابێت هه‌میشه‌ پشتگیریانه‌.

گوندی خه‌رپانی ده‌كه‌وێته‌ ناوچه‌ی هه‌ورامانه‌وه‌ و له‌ رووی ئیداریه‌وه‌ سه‌ربه‌ ناحیه‌ی بیاره‌یه‌ و  خاوه‌ن مێژوویه‌كی دێرینه‌ و له‌ مێژووی خۆیدا جارێك رووبه‌رووی رووخان و كاولكردن بۆته‌وه‌و له‌ ساڵی 1955 قوتابخانه‌ی تێدا دروستكراوه‌ و له‌ ناو لادێكه‌شدا چه‌ندین كه‌سایه‌تی ئاینی و خاوه‌ن بڕوانامه‌ی به‌رزو روشنبیرو راگه‌یاندكاری هه‌بووه‌و كه‌ له‌ ئێستادا ئه‌و كه‌سایه‌تییانه‌ له‌ناو شاری هه‌ڵه‌بجه‌دا دیارن .

PUKmedia فه‌رحان حه‌مه‌خان/ هه‌ڵه‌بجه‌