گه‌رمیان.. توندوتیژی به‌رامبه‌ر ژنان كه‌میكردووه‌

70% حاڵه‌تی توندوتیژی به‌رامبه‌ر ژنان كه‌میكردووه‌

به‌پێی ئامارێكی به‌ڕێوه‌به‌رایه‌تی توندوتیژی دژ به‌ ژنانی گه‌رمیان، رێژه‌ی تاوان به‌رامبه‌ر به‌ ژنان به‌ به‌راورد له‌گه‌ڵ شه‌ش مانگی ساڵی رابردوو كه‌میكردووه‌، به‌ڕێوه‌به‌ری به‌ره‌نگاربوونه‌وه‌ی توندوتیژی دژ به‌ ژنانیش ئاشكرای ده‌كات كه‌ 70% حاڵه‌تی توندوتیژی كه‌میكردووه‌.

له‌وباره‌یه‌وه‌ موقه‌ده‌می یاسایی له‌میعه‌ محه‌مه‌د لێپرسراوی به‌ڕێوه‌به‌رایه‌تی به‌ره‌نگاربوونه‌وه‌ی توندوتیژی دژ به‌ ژنان له‌ گه‌رمیان به‌ PUKmedia ی راگه‌یاند: به‌پێی ئه‌و ئاماره‌ی له‌ ماوه‌ی ئه‌م چه‌ند مانگه‌ی ئه‌مساڵدا ئاماده‌كراوه‌، حاڵه‌ته‌كانی توندوتیژی به‌رامبه‌ر به‌ ژنان كه‌میكردووه‌ به‌ به‌راورد له‌گه‌ڵ شه‌ش مانگی ساڵی 2013 دا.

وتیشی: له‌ شه‌ش مانگی ساڵی 2013 دا سێ حاڵه‌تی كوشتن تۆماركراوه‌، به‌ڵام له‌ ئه‌مساڵدا دوو حاڵه‌تی كوشتن تۆماركراوه‌، حاڵه‌تی خۆكوشتن ساڵی رابردوو چوار حاڵه‌ت بووه‌، ئه‌مساڵ بووه‌ به‌ دوو، واتا 50% كه‌میكردووه‌، حاڵه‌تی سوتان ساڵی رابردوو 10 حاڵه‌ت بووه‌و ئه‌مساڵیش به‌هه‌مانشێوه‌ بووه‌، حاڵه‌تی خۆسوتان ساڵی رابردوو پێنج حاڵه‌ت بووه‌ ئه‌مساڵ بووه‌ به‌ دوو.

له‌میعه‌ محه‌مه‌د ئاماژه‌ی به‌وه‌شكرد كه‌ كۆی سكاڵاكان له‌ ساڵی رابردوودا 206 سكاڵا بووه‌، ئه‌مساڵ 374 سكاڵا تۆماركراوه‌، ئه‌مه‌ش ئه‌وه‌ ده‌گه‌یه‌نێت كه‌ وشیاری لای ژنان زیاتر بووه‌ كه‌ كێشه‌كانیان له‌ رێگه‌ی سكاڵاوه‌ یه‌كلایی ده‌كه‌نه‌وه‌، له‌هه‌مانكاتیشدا بۆمان ده‌ركه‌وتووه‌ كه‌ 70% توندوتیژییه‌كان به‌رامبه‌ر به‌ ژنان كه‌میكردووه‌، ئه‌مه‌ش ده‌گه‌ڕێته‌وه‌ بۆ دروستبوونی هۆشیاری زیاتر لای تاكه‌كانی كۆمه‌ڵ و ئه‌و سزایانه‌شی كه‌ دانراوه‌ به‌رامبه‌ر ئه‌و كه‌سانه‌ی توندوتیژی به‌رامبه‌ر به‌ ژنان ئه‌نجامده‌ده‌ن.

سه‌باره‌ت به‌ حاڵه‌ته‌كانی گێچه‌ڵی سێكسی، له‌میعه‌ محه‌مه‌د روونیكرده‌وه‌ كه‌ له‌ ئه‌مساڵدا گێچه‌ڵی سێكسی زیاتر بووه‌ به‌ به‌راورد له‌گه‌ڵ ساڵی رابردوو.

به‌ڕێوه‌به‌ری نوسینگه‌ی به‌ره‌نگاربونه‌وه‌ی توندوتیژی دژ به‌ ژنان له‌ گه‌رمیان نیگه‌رانیش بوو به‌رامبه‌ر به‌ هه‌ندێك له‌ كه‌ناڵه‌كانی راگه‌یاندن كه‌ وه‌ك پێویست هاوكاریان ناكه‌ن له‌ هۆشیاركردنه‌وه‌ی هاووڵاتیان بۆ ئه‌وه‌ی به‌ هه‌موو لایه‌ك به‌ره‌نگاری ئه‌و كه‌سانه‌ ببینه‌وه‌ كه‌ توندوتیژی به‌رامبه‌ر به‌ ژنان ئه‌نجامده‌ده‌ن.

PUKmedia  هه‌ردی ئه‌بوبه‌كر