سلێمانی.. داوا له‌ لیسته‌كان ده‌كرێت پابه‌ندبن به‌ بانگه‌شه‌یه‌كی هێمنه‌وه‌

كۆبونه‌وه‌ی ئه‌منی له‌ قائیمقامیه‌ت

به‌مه‌به‌ستی دانانی پلان و ڕێوشوێنێكی گونجاو و نوێ‌ بۆ پارێزگاری كردن له‌ ئاسایشی ناوشار و پاراستنی گیانی هاووڵاتیان و هه‌روه‌ها ڕه‌خساندنی بارودۆخێكی ئارام و هێمن بۆ به‌ڕێوه‌چونی بانگه‌شه‌ی هه‌ڵبژاردن.

ئه‌مڕۆ 20-4 له‌ دیوانی قائیمقامیه‌تی سلێمانی ئاوات محه‌مه‌د قائیمقامی سلێمانی و سه‌رۆكی لیژنه‌ی ئه‌منی سلێمانی له‌گه‌ڵ ئه‌ندامانی لیژنه‌ی ئه‌منی و نوێنه‌رانی لایه‌نه‌ سیاسییه‌كانی به‌شداربووی هه‌ڵبژاردنی 30-4 كۆبوویه‌وه‌ .

له‌ كۆبوونه‌وه‌كه‌دا جه‌خت له‌سه‌ر له‌سه‌ر جێبه‌جێكردنی هه‌موو بڕیار و رێنماییه‌كانی بانگه‌شه‌ی هه‌ڵبژاردن كرایه‌وه‌ بۆ ئه‌وه‌ی بانگه‌شه‌ دوور له‌ توندوتیژی و رووداوی نه‌خوازراو و دڵته‌زێن تێبپه‌ڕێت .

له‌ كۆنگره‌یه‌كی رۆژنامه‌وانیشدا ئاوات محه‌مه‌د سه‌رۆكی لیژنه‌ی ئه‌منی شاری سلێمانی رایگه‌یاند: لیژنه‌یه‌كی لێكۆڵینه‌وه‌یان له‌ باره‌ی رووداوه‌كه‌ی شه‌وی رابردووی به‌رده‌م لقی چواری پارتی دیموكراتی كوردستان پێكهێناوه‌ و لیژنه‌كه‌ لیكۆڵینه‌وه‌كانی ده‌ستپێكردووه‌ و له‌ هه‌وڵدایه‌ بۆ ئاشكراكردنی ئه‌و كه‌سانه‌ی كه‌ له‌پشت ئه‌م رووداوه‌وه‌ن.

 وتیشی: ده‌ستێك هه‌یه‌ كه‌ ده‌یه‌وێت ئه‌م ئارامی و ئاسایشه‌ی شاری سلێمانی بشێوێندرێت و بۆ ئه‌وه‌ی نا سه‌قامگیری سیاسی و كۆمه‌ڵایه‌تی بهێنرێته‌ ئاراوه‌ كه‌ ئه‌مه‌ به‌ هیچ شێوه‌یه‌ك قبوڵكراو نییه‌ و هێزه‌ ئه‌منیه‌كان هه‌موو هه‌وڵێكی خۆیان ده‌خه‌نه‌گه‌ڕ بۆ رێگریكردن له‌ هه‌ر هه‌وڵێكی له‌م جۆره‌.

 وتیشی: هه‌ر كه‌سێك له‌ پشت ئه‌و رووداوه‌ و هه‌ر رووداوێكی ئاژاوه‌ گێری و دروستكردنی نا ئارامیه‌وه‌ بێت به‌ توندی به‌ره‌نگاری ده‌بینه‌وه‌ و رێگه‌ ناده‌ین ئارامی و ئاسایشی شار و هاووڵاتیان و لایه‌نگرانی هیچ لیست و لایه‌نێكی سیاسی رووبه‌ڕووی مه‌ترسی ببێته‌وه‌ .

ئاوات محه‌مه‌د ئاشكرایكرد، بۆ زیاتر پاراستنی ئارامی و ئاسایشی شاری سلێمانی بڕیاریانداوه‌ ژماره‌ی هێزه‌ ئه‌منیه‌كان له‌ به‌رده‌م باره‌گای حزبه‌كان و شه‌قامه‌ سه‌ره‌كی و شوێنه‌ گشتیه‌كاندا زیاد بكرێن بۆ ئه‌وه‌ی به‌شێوه‌یه‌كی باشتر بتوانرێت رێگری له‌ سه‌رهه‌ڵدان و دروستبوونی هه‌ر رووداوێكه‌ نه‌خوازراو بكرێت.
 
سه‌رۆكی لیژنه‌ی ئه‌منی سلێمانی راشیگه‌یاند: ئه‌ركی هێزه‌ ئه‌منیه‌كان پاراستنی سه‌رو ماڵی هاووڵاتیان و دابینكردنی ئارامی و  ئاسایشی زیاتره‌ و له‌م رووه‌وه‌ هه‌موو هه‌وڵێكی خۆمان ده‌خه‌ینه‌گه‌ڕ و ئه‌ركی پاراستنی شاری سلێمانی و پاراستنی گیانی هاووڵاتیان و بانگه‌شه‌كاران به‌بێ جیاوازی ده‌خه‌ینه‌ ئه‌ستۆی خۆمان و هه‌موو لایه‌ك دڵنیا ده‌كه‌ینه‌وه‌ هه‌نگاوی پێویستیش له‌م باره‌یه‌وه‌ ده‌نێین.



ئاوات محه‌مه‌د سه‌رۆكی لیژنه‌ی ئه‌منی سلێمانی راشیگه‌یاند: له‌ كۆبونه‌وه‌كه‌دا داوامان له‌ نوێنه‌ری هه‌موو لایه‌نه‌ سیاسیه‌كان كرد كه‌ لایه‌نگرانی خۆیان ئاڕاسته‌ بكه‌ن كه‌ پابه‌ندبن به‌ شێوازێكی شارستانی بانگه‌شه‌وه‌ و دوور بكه‌ونه‌وه‌ له‌ گرژی و ئاڵۆزی و هه‌روه‌ها لایه‌نه‌كان پابه‌ندبن به‌ كاتی كۆتایی هاتنی بانگه‌شه‌ كه‌پێش ده‌ستپێكردنی بانگه‌شه‌ بڕیاردرا له‌ سه‌عات 9 ی شه‌و كۆتایی پێ بێت .

ئاماژه‌ی بۆ ئه‌وه‌شكرد، داوایه‌كیان ئاڕاسته‌ی هه‌موو لایه‌نه‌ سیاسه‌كان كردووه‌ كه‌ پێویسته‌ راگه‌یاندنی حزبه‌كان به‌زمانێكی ئارامتر و دوور له‌ (ناو زڕاندن) بانگه‌شه‌ بكه‌ن و هانی خه‌ڵكی بدرێت پابه‌ندبن به‌ یاساو رێنماییه‌كانه‌وه‌ نه‌ك به‌ پێچه‌وانه‌وه‌ هه‌وڵی دروستبونی بارگرژی و ئاڵۆزی بده‌ن.

 
له‌ كۆتایی كۆنگره‌كه‌شدا ئاوات محه‌مه‌د رایگه‌یاند: له‌ماوه‌ی 20 رۆژی رابردووی بانگه‌شه‌ی هه‌ڵبژاردنه‌كانی ئه‌نجومه‌نی نوێنه‌رانی عیراق و ئه‌نجومه‌نی پارێزگاكانی هه‌رێم ئه‌و سه‌رپێچیانه‌ی تۆماركراون له‌ چاو بانگه‌شه‌ی هه‌ڵبژاردنه‌كانی پێشووتردا كه‌متربووه‌.

PUKmedia