د. به‌رهه‌م: ئه‌و پۆستانه‌ی بۆ یه‌كێتی دانراون جێگه‌ی قبوڵكردن نییه‌

بۆ مه‌به‌ستی پێكهێنانی حكومه‌ت و به‌شداری یه‌كێتی

بڕیاره‌ سبه‌ینێ‌ هه‌ردوو وه‌فدی‌ دانوستانكاری‌ یه‌كێتی‌ و پارتی‌ له‌سه‌ر پێكهێنانی‌ كابینه‌ی‌ هه‌شته‌می‌ حكومه‌تی‌ هه‌رێم و چۆنیه‌تی‌ به‌شداریكردنی‌ یه‌كێتی‌ تێیدا كۆده‌بنه‌وه‌.

د.به‌رهه‌م ئه‌حمه‌د ساڵح، سه‌رۆكی‌ وه‌فدی‌ دانوستانكاری‌ یه‌كێتیی‌ نیشتمانیی‌ كوردستان، ڕایگه‌یاند: سبه‌ینێ‌ هه‌ردوو وه‌فدی‌ دانوستانكاری‌ یه‌كێتی‌ و پارتی‌ كۆده‌بنه‌وه‌، تێیدا هه‌ڵوێستی‌ یه‌كێتی‌ له‌باره‌ی‌ چۆنیه‌تی‌ به‌شداریكردنیان له‌كابینه‌ی‌ هه‌شت ده‌خرێته‌ڕوو.

سه‌رۆكی‌ وه‌فدی‌ دانوستانكاری‌ یه‌كێتیی‌، وتیشی‌: ئه‌و پۆستانه‌ی‌ دراون به‌یه‌كێتی‌ قبوڵی‌ ناكه‌ین و داوای‌ حه‌ق و ئیستحقاقی‌ خۆمان ده‌كه‌ین كه‌ له‌وه‌ زیاتره‌ و تا ئێستا بڕیارماننه‌داوه‌ ده‌بینه‌ ئۆپۆزسیۆن یان ده‌چینه‌ حكومه‌ته‌وه‌ .

ئه‌م قسانه‌ی‌ سه‌رۆكی‌ وه‌فدی‌ دانوستانكاری‌ یه‌كێتیی‌ له‌میانه‌ی‌ كۆبونه‌وه‌یه‌كیدا هات له‌گه‌ڵ كارگێڕ و ئه‌ندامانی‌ مه‌ڵبه‌ندی‌ 1ی‌ رێكخستنی‌ سلێمانی‌ یه‌كێتیی نیشتمانیی كوردستان، هه‌رچه‌نده‌ ئێستا نێچیرڤان بارزانی‌ سه‌رۆكی‌ وه‌فدی‌ دانوستانكاری‌ پارتی‌ و كاندیدی‌ پارتی‌ بۆ سه‌رۆكی‌ كابینه‌ی‌ داهاتوو به‌سه‌ردانێكی ڕه‌سمی‌ له‌توركیایه‌، به‌ڵام بۆ كۆبونه‌وه‌كه‌ی‌ سبه‌ینێی‌ نێوان(یه‌كێـتی‌ و پارتی‌)، ئه‌گه‌رێكی‌ زۆر هه‌یه‌ ئاماده‌یی‌ هه‌بێت، به‌وپێیه‌ی‌ ته‌نها ئه‌و ده‌توانێت پرسی‌ پێكهێنانی‌ كابینه‌كه‌ له‌گه‌ڵ یه‌كێتی‌ یه‌كلایی‌ بكاته‌وه‌ و بڕیاری‌ كۆتایی‌ بدات.

رۆژی 17-4 له‌شاری‌ هه‌ولێر له‌ماڵی‌ نێچیرڤان بارزانی‌، پارتی له‌گه‌ڵ هه‌ریه‌كه‌ له‌ گۆڕان و كۆمه‌ڵی ئیسلامی رێككه‌وتنی‌ پێكهێنانی كابینه‌ی هه‌شتیان ئیمزاكرد.

PUKmedia له‌ SNN وه‌