كه‌ركوك.. مامۆستایان و فه‌رمانبه‌ران ده‌نگ به‌لیستی 266 ی یه‌كێتی ده‌ده‌ن

فه‌رمانبه‌ران و مامۆستایان خه‌مخۆری چاره‌نووسی كه‌ركوكن

ئه‌مڕۆ 19-4 د.نه‌جمه‌دین سه‌رۆك و كاندیدی ژماره‌ 1 ی لیستی ژماره‌ 266 ی (ی.ن.ك)  له‌ هۆڵی رۆشنبیری له‌ شاری كه‌ركوك به‌شداری كۆبوونه‌وه‌یه‌كی جه‌ماوه‌ری به‌رفراوانی مامۆستایان و فه‌رمانبه‌رانی ئه‌و شاره‌ی كرد.

له‌و كۆبوونه‌وه‌ به‌رفراوانه‌دا كه‌ ژماره‌یه‌كی به‌رچاو له‌ كاندیده‌كانی یه‌كێتی ئاماده‌یبوون، دوای به‌خێرهێنانی ئاماده‌بووان و خوێندنه‌وه‌ی وتاری هه‌ریه‌كه‌ له‌ هه‌ڤاڵان وه‌ستا ره‌سوڵ ئه‌ندامی سه‌ركردایه‌تی (ی.ن.ك) و  محه‌مه‌د وه‌هاب لێپرسراوی كۆمیته‌ی رێكخستنی فه‌رمانبه‌ران كه‌ تیایدا وێرای باسكردن له‌ گرنگی و بایه‌خی هه‌ڵبژاردنه‌كانی ئه‌مجاره‌ بۆ دیاریكردن و چه‌سپاندنی چاره‌نووسی شاری كه‌ركوك ئاماژه‌شیان به‌وپێشكه‌وتن و گه‌شه‌سه‌ندنانه‌ كرد له‌ماوه‌ی سێ ساڵی رابردوودا له‌سه‌رده‌ستی ئه‌ندازیاری ئاوه‌دانی شاری كه‌ركوك د.نه‌جمه‌دین كه‌ریم به‌ده‌ست هاتوون بۆ خزمه‌تی چین و توێژه‌ جیاجیاكانی شاره‌كه‌ به‌بێ جیاوازی نه‌ته‌وایه‌تی و ئاینی و مه‌زهه‌بی.

دواتر له‌نێو چه‌پڵه‌ڕێزان و پێشوازی گه‌رمی ئاماده‌بووان د. نه‌جمه‌دین ئه‌ندامی مه‌كته‌بی سیاسی و سه‌رۆك و كاندیدی ژماره‌ 1 ی لیستی ژماره‌ 266 ی (ی.ن.ك) له‌ كه‌ركوك وته‌یه‌كی پێشكه‌شكردو تیایدا تیشكی خسته‌سه‌ر هه‌موو ره‌هه‌نده‌كانی گۆڕه‌پانی سیاسی ئه‌مڕۆی كوردستان و عیراق و ناوچه‌كه‌.

سه‌باره‌ت به‌ رۆڵ و بایه‌خی چینی مامۆستایان و فه‌رمانبه‌ران د.نه‌جمه‌دین وتی: ئه‌گه‌ر هێز و لایه‌نه‌كانی تر ئێستا ئه‌م هۆڵه‌ به‌م شێوه‌یه‌ ببینن و بزانن ئه‌و هه‌موو مامۆستا و فه‌رمانبه‌ره‌ پشتیوانی له‌ یه‌كێتیی نیشتیمانیی كوردستان ده‌كه‌ن بێ سێ و دوو جانتاكانیان ده‌پێچنه‌وه‌ و ئه‌م شاره‌ به‌ جێدێڵن.

راشیگه‌یاند: وه‌ك چۆن یه‌كێتی له‌ رابردوودا داكۆكیكار و خه‌مخۆری مافی كه‌ركوك و كه‌ركوكیه‌كان بووه‌ له‌ ئێستاشدا ئه‌و لایه‌نه‌ی كه‌خۆی به‌خاوه‌نی كه‌ركوك ده‌زانێت حزب و لیسته‌ سه‌وزه‌كه‌ی جه‌نابی مام جه‌لاله‌، ئێستاش بۆ سه‌لماندنه‌وه‌ی ئه‌و راستیه‌ و به‌رده‌وام بوونمان له‌ خزمه‌تكردنی شاره‌كه‌ و به‌تایبه‌تیش هه‌واڵی سه‌ركه‌وتنی هه‌ڵبژاردن بگه‌یه‌نینه‌ جه‌نابی مام جه‌لال پێویسته‌ هه‌موو لایه‌كمان رۆژی 30 ئه‌م مانگه‌ بكه‌ینه‌ كه‌رنه‌ڤاڵێكی گه‌وره‌ و سندووقه‌كانی ده‌نگدان پڕ بكه‌ین له‌ لیستی سه‌وزی ژماره‌ 266 ی (ی.ن.ك).

هه‌ر له‌وته‌كه‌یدا، د.نه‌جمه‌دین له‌كه‌ركوك له‌ باسی خزمه‌تگوزاریه‌كاندا وتی: له‌وه‌ته‌ی ئێمه‌ خه‌نده‌قمان به‌ده‌وری شاری كه‌ركوك لێداوه‌ ره‌وشی ئه‌منی شاره‌كه‌ باشتر بووه‌، ئێمه‌ خه‌نده‌قمان لێدا بۆ جیابوونه‌وه‌ له‌ تیرۆر و تیرۆرستان، به‌ڵام خه‌ڵكانێكی تر خه‌ریكی خه‌نده‌ق لێدانن بۆ جیاكردنه‌وه‌ی سنووری باشوور و رۆژئاوای كوردستان.

له‌ كۆتایدا كاندیده‌كانی تریش له‌ نێو چه‌پڵه‌ رێزانی ئاماده‌بووان خۆیان ناساند.

PUKmedia كه‌ركوك