نوێكراوه‌ته‌وه‌.. پارتی و گۆڕان رێكەوتنەكەیان ئیمزاكرد

گۆڕان ده‌ڵێ چه‌ند وه‌زاره‌تێكیان پێداوین

پارتی و گۆڕان رێكەوتنێكیان ئیمزاكردو بەوتەی بەرپرسێكی پارتیش رێكەوتنەكەیان بۆ چوار ساڵی ئارامە، گۆڕانیش دەڵێ لەگەڵ پارتی رێكەوتون و چەند وەزارەتێكی پێداون.

ئەمڕۆ 17-4 وەفدی دانوستانكاری پارتی دیموكراتی كوردستان و بزوتنەوەی گۆڕان لەشاری هەولێر كۆبوونەوەو بۆ پێكهێنانی كابینەی نوێی حكومەت رێكەوتنێكیان ئیمزاكرد.

دوای ئیمزاكردنی رێكەوتنەكەشیان لەكۆنگرەیەكی رۆژنامەوانیدا بێ وەڵامدانەوەی پرسیاری رۆژنامەنوسان، هەریەك لەفازل میرانی سكرتێری مەكتەبی سیاسی پارتی و عومەر سەید عەلی نوێنەری بزوتنەوەی گۆڕان ئاماژەیان بەڕێكەوتنەكەی نێوانیان كرد.

فازل میرانی وتی: ئەو رێكەوتنە  هەنگاوێكە بۆ بوونی چوار ساڵی ئارام.
 
دواتریش عومەر سەید عەلی رایگەیاند: گەیشتین بەڕێكەوتن بۆ بەشداریكردنی لەكابینەی نوێ (سەرۆكی‌ پەرلەمان، وەزارەتی‌ پێشمەرگە، وەزارەتی‌ دارایی‌، وەزارەتی‌ پیشەسازی‌ و بازرگانی‌، وەزارەتی‌ ئەوقاف، دەستەی‌ وەبەرهێنان، جێگری‌ وەزیری‌ ناوخۆ)مان پێدراوە.

وتیشی: هەفتەی داهاتوو پەرلەمان كۆدەبێتەوە بۆ هەڵبژاردنی دەستەی سەرۆكایەتی.

PUKmedia تایبەت