تیرۆرستان سێ سه‌ربازی سوپای عیراق شه‌هید ده‌كه‌ن و بۆریه‌كی نه‌وتیش ده‌ته‌قێننه‌وه‌

پاشان ته‌رمه‌كانیان دۆزرایه‌وه‌

پێش نیوه‌ڕۆی ئه‌مڕۆ 17-4 له‌سه‌ر ڕێگای تكریت- خورماتوو تیرۆرستان سێ سه‌رنشینی ئۆتۆمبێلێكیان رفاندو پاشان ته‌رمه‌كانیان دۆزرایه‌وه‌.

سه‌رچاوه‌یه‌ك له‌ پۆلیسی خورماتوو به‌ PUKmedia ی راگه‌یاند: ئه‌مڕۆ پاش ئه‌وه‌ی تیرۆرستان له‌سه‌ر ڕێگای تكریت- خورماتوو بازگه‌یه‌ك داده‌نێن، له‌و بازگه‌یه‌دا سێ سه‌رنشینی ئۆتۆمبێلێك ده‌ڕفێنن و له‌دوای دوو سه‌عات له‌ رفاندنیان له‌سه‌ر هه‌مان رێگا ته‌رمه‌كانیان فڕێده‌ده‌ن كه‌ ئاسه‌واری گوللـه‌ به‌ جه‌سته‌یانه‌وه‌ دیاره‌.

ئه‌و سه‌رچاوه‌یه‌ وتیشی: ئه‌و سێ كه‌سه‌ سه‌ربازی سوپای عیراقن و له‌كاتی گه‌ڕانه‌وه‌یاندا بۆ خورماتوو رفێندراون.
راشیگه‌یاند: سێ سه‌ربازه‌ رفێندراوه‌كه‌ له‌ نه‌ته‌وه‌ی توركمانن و دانیشتوی قه‌زای خورماتوون، پاش دۆزینه‌وه‌ی ته‌رمه‌كانیان له‌لایه‌ن پۆلیسه‌وه‌ ره‌وانه‌ی پزیشكی دادوه‌ری كراون.

له‌لایه‌كی تریشه‌وه‌ پێش نیوه‌ڕۆی ئه‌مڕۆ ژماره‌یه‌ك چه‌كداری نه‌ناسراو له‌ پارێزگای تكریت بۆریه‌كی نه‌وتیان ته‌قانده‌وه‌.

سه‌رچاوه‌یه‌كی ئه‌منی له‌ پارێزگای سه‌ڵاحه‌دین به‌ PUKmedia ی راگه‌یاند: ژماره‌یه‌ك چه‌كداری نه‌ناسراو له‌ پارێزگای تكریت بۆریه‌كی نه‌وتیان ته‌قاندۆته‌وه‌و نه‌وتی بۆریه‌ ته‌قێندراوه‌كه‌ تێكه‌ڵ به‌ ئاوی دیجله‌ بووه‌و بوه‌ته‌ هۆی پیسكردنی ئاوه‌كه‌.

سه‌رچاوه‌كه‌ وتیشی: هه‌ر به‌هۆی دوكه‌ڵی ئاگره‌كه‌وه‌ ژینگه‌ی ناوچه‌كه‌ پیسبووه‌و مه‌ترسی بۆ سه‌ر دانیشتوانه‌كه‌ی دروستكردوه‌و به‌وهۆیه‌شه‌وه‌ خوێندن له‌ زانكۆو په‌یمانگاكانی نزیك ناوچه‌كه‌ راگیراوه‌و 7 خوێندكاریش به‌هۆی تێكچوونی باری ته‌ندروستیانه‌وه‌ ره‌وانه‌ی نه‌خۆشخانه‌ كراون، تیمه‌كانی ئاگر كوژێنه‌وه‌ش خه‌ریكی كۆنتڕۆڵكردنی ئاگره‌كه‌ن.

PUKmedia ریڤان گه‌رمیانی